الماتىدا تروللەيبۋس پەن اۆتوبۋس سوقتىعىستى

الماتى. قازاقپارات - الماتىدا ارا قاشىقتىقتى ساقتاماۋ سالدارىنان اۆتوبۋس پەن تروللەيبۋس سوقتىعىستى، دەپ حابارلايدى قازاقپارات ءتىلشىسى.

جول اپاتى بۇگىن ساعات 14:20 شاماسىندا جاندوسوۆ كوشەسى بويىندا بولدى. بۇل تۋرالى الماتى قالالىق پوليسيا دەپارتامەنتىنىڭ انىقتاۋ باسقارماسىنىڭ باستىعى ولجاس ءشارىپوۆ حابارلادى.

«Yutong» ماركالى اۆتوبۋستىڭ جۇرگىزۋشىسى جاندوسوۆ كوشەسىمەن باتىس باعىتتا كەلە جاتىپ، ارا قاشىقتىقتى ساقتاماۋ سالدارىنان الدىدا كەلە جاتقان تروللەيبۋستى سوعادى. جول اپاتى ناتيجەسىندە اۆتوبۋس جولاۋشىسى 2002 -جىلى تۋعان قىز دەنە جاراقاتىن الدى. ول مەديتسينالىق كومەككە جۇگىندى»، - دەدى ولجاس ءشارىپوۆ.

اتالعان ماتەريال اۋەزوۆ اۋداندىق پوليتسيا باسقارماسى وندىرىسكە قابىلدادى.

ەسكە سالايىق، بۇعان دەيىن الماتىدا ەكى اۆتوبۋس سوقتىعىسقان بولاتىن.

جول اپاتى سالدارىنان 1 ادام كوز جۇمىپ، 15 ادام زارداپ شەكتى.

سونداي- اق بۇگىن الماتى قالاسىنىڭ اكىمدىگى كولىك جۇرگىزۋشىلەرىن اپاتتار قاۋپىنىڭ جوعارىلاۋىنا بايلانىستى جىلدامدىقتى تومەندەتۋگە، اۆتوكولىكتەر اراسىنداعى قاشىقتىقتى ارتتىرۋعا، مانيەۆر جاساۋدان اۋلاق بولۋعا شاقىردى. جاياۋ جۇرگىنشىلەردەن تروتۋارلاردا جۇرگەندە اباي بولۋدى، شۇعىل قاجەتتىلىكسىز ۇيدەن شىقپاۋدى سۇراعان بولاتىن.