شىعىس قازاقستانداعى كيىز ءۇي كىتاپحاناعا باراتىن جاستار سانى ارتىپ كەلەدى
وسكەمەن قالاسىندا ورنالاسقان ورالحان بوكەي اتىنداعى كىتاپحانادا ءتۇرلى باعىتتاعى 10 نان استام ۇيىرمە بار. سونىڭ ءبىرى - VR- كيىز ءۇيى. كيىز ۇيگە كىرىپ، زاماناۋي تەحنولوگيانىڭ كومەگىمەن الەمنىڭ كەز كەلگەن جەرىنە ساياحات جاساۋعا بولادى. بۇل اسىرەسە مۇمكىندىگى شەكتەۋلى بالالارعا قىزىقتى.
«2022 -جىلدى بالالار جىلى دەپ جاريالاعان پرەزيدەنت قاسىم- جومارت توقايەۆ ءبىلىم سالاسىن دامىتۋ ءۇشىن جاڭا تەحنولوگيالاردى دا مەڭگەرۋ كەرەكتىگىن ايتقان بولاتىن. كىتاپحانامىز زامان تالابىنا ساي جابدىقتالعان. ەڭ العاش VR- كيىز ءۇيى اشىلعان كەزدە بىزدە تەك VR كوزىلدىرىك بولعان ەدى. سودان كەيىن ارنايى باعدارلامالاردى قولدانىپ، ءتۇرلى كورىنىستەر جاساي باستادىق. وسى ۇيىرمە اشىلا سالىسىمەن قىزىعۋشىلىق تانىتقاندار كوپ بولدى. ءقازىر كۇن سايىن وسىندا كەلەتىن جاستار سانى ارتىپ كەلەدى»، - دەيدى كىتاپحانا قىزمەتكەرى تاڭنۇر باشاي.
ونىڭ ايتۋىنشا، مۇنداعى نەگىزگى ماقساتتاردىڭ ءبىرى - وقىرمانعا وزدەرى وقىعان كىتاپتارىنداعى كەيىپكەرلەردىڭ بەينەسىن وسى قۇرىلعى ارقىلى كورسەتۋ. ءسويتىپ، جاستاردىڭ كىتاپقا دەگەن قىزىعۋشىلىعىن ارتتىرۋ. ماسەلەن، كىتاپحانا قىزمەتكەرلەرى ورالحان بوكەيدىڭ تۋعان جەرى مەن كەيىپكەرلەرىنىڭ بەينەسىن ءدال كورسەتكەن.
«سونداي- اق ورالحان بوكەي، مۇحتار اۋەزوۆ جانە شەرحان مۇرتازانىڭ ۇستەل باسىندا اڭگىمەلەسىپ وتىرعانىن بەينەلەدىك. كيىز ۇيدەگى VR كوزىلدىرىكتى كيىپ، ءوزىڭىزدى سول قالامگەرلەردىڭ قاسىندا وتىرعانداي سەزىنە الاسىز»، - دەيدى تاڭنۇر باشاي.