فۋتبولدان الەم چەمپيوناتىندا قانداي ساۋەگەي جانۋارلار بولدى؟
Massaget.kz ءتىلشىسى فۋتبولدا بولعان ساۋەگەي جانۋارلار تۋرالى باياندايدى.
سەگىزاياق پاۋل
قازىر ساۋەگەي جانۋار كوپ. ءار ەلدە، ءار قالادا بىرنەشە جانۋارعا بولجام جاسالادى. ال بۇل ءسان 2008-جىلى باستالعان. سول كەزدە گەرمانيالىق ساۋەگەي، سەگىزاياق پاۋل ەۋرو-2008 كەزىندە بۇكىل الەمگە تانىلعان بولاتىن. اكۆاريۋمعا ەكى ەلدىڭ تۋى بەينەلەنگەن ىدىس سالىنادى. سەگىزاياق قاي ەلدىڭ ىدىسىنان تاماق جەسە، سول جەڭەدى دەپ سانالعان.
ول ءوزىنىڭ گەرمانيا قۇراماسىنىڭ ويىندارىنا بولجام جاسادى. سول تۋرنيردە التى ماتچتىڭ تورتەۋىن ءدال تاپقان.
ال 2010-جىلعى الەم چەمپيوناتى كەزىندە پاۋلدىڭ جۇلدىزى جاندى. سول «مۋنديالداعى» سەگىز ماتچتىڭ ءبارىن ءدال تاپقان. گەرمانيا سول الەم چەمپيوناتىندا سەربيادان، كەيىن جارتىلاي فينالدا يسپانيادان جەڭىلەتىنىن ءدال بولجاعان. فينالدا يسپانيا نيدەرلاندىنى جەڭەتىنىن دە ءدال انىقتاعان.
پاۋل ساۋەگەيلىك كارەراسىندا ەكى رەت قانا قاتەلەسكەن. 12 ويىننىڭ ناتيجەسىن تاۋىپتى.
سەگىزاياق 2010-جىلى قازاندا وبەرحاۋزەندەگى وكەاناريۋمدە قايتىس بولدى. سول كەزدە وكەاناريۋمدە تۋ ءتۇسىرىلىپ، كوڭىل ايتۋ كىتابى شىعارىلعان. قازىر ءدال سول وكەاناريۋم الدىندا پاۋلدىڭ ەسكەرتكىشى سالىنعان.
ءپىل نەللي
گەرمانيادا سەگىزاياق پاۋلدىڭ ورنىنا نەللي اتتى ءپىل ساۋەگەي بولا باستادى. ول كارەراسىن 2011-جىلى ايەلدەر اراسىنداعى الەم چەمپيوناتىندا باستاعان. نەلليدىڭ الدىنا ەكى قاقپا قويىلادى. قاقپا ۇستىندە ەكى ەلدىڭ تۋى بەينەلەنەدى. ءپىلدىڭ ماقساتى - گول سوعۋ. دوپ قاي كوماندانىڭ قاقپاسىنا كىرسە، سول جەڭىلەدى دەپ بولجانعان.
سول چەمپيوناتتا نەللي نەمىس فۋتبولشىلارىنىڭ بارلىق جەڭىسىن ءدال تاۋىپ كەلە جاتقان. ءبىراق شيرەك فينالدا ول جەڭىستى گەرمانياعا ەمەس، جاپوندارعا بەردى. بولجام جاساۋ ءساتى دراماعا تولى بولدى. ءپىل بەس مۇمكىندىگىندە جاپون قاقپاسىنا گول سوعۋعا وتە جاقىن بولعان، الايدا التىنشى سوققىسىنان كەيىن دوپ گەرمانيا قاقپاسىنا كىرىپ كەتتى. ويىن دا سولاي ءوتتى - نەمىستەر بىرنەشە رەت گول سوعۋعا وتە جاقىن بولعان، الايدا جاپونيا 1:0 ەسەبىمەن جەڭىسكە جەتتى.
ودان بولەك چەمپيوندار ليگاسىنىڭ فينالىنداعى «باۆاريا» مەن «بورۋسسيا» ماتچىندە ميۋنحەندىك كوماندا جەڭىسكە جەتەتىنىن نەللي ءدال بولجاعان.
مىسىق احيلل
2018-جىلعى الەم چەمپيوناتى ۋاقىتىندا بۇكىل الەمگە احيلل اتتى ساڭىراۋ مىسىق جۇلدىز بولدى. ول پەتەربورلىق ەرميتاجدى كۇزەتەتىن مىسىق. ساڭىراۋ بولعان سوڭ اينالاسىن قورشاعان ادامداردىڭ ءسوزى، كامەرا داۋسى وعان بوگەت بولمايدى. مۋزەيدەگى قىزمەتكەرلەر دە احيلل ادەتتە اناليز جاساۋعا ماشىقتانعانىن ايتقان.
احيلل ءوز بولجامدارىن ەرميتاجدا جاسايدى. تاماق سالىنعان ەكى ىدىستىڭ جانىندا ماتچ وتكىزەتىن قۇرامالاردىڭ تۋى تۇرادى. مىسىق قاي ىدىستان تاماق جەسە، سول جەڭەدى دەگەن ءسوز.
مىسىقتىڭ الەم چەمپيوناتى ۋاقىتىندا ءبىرقاتار بولجامى ءدال كەلگەن. ول رەسەي ساۋد ارابياسىن، يران ماروككونى، ارتىنشا رەسەي مىسىر قۇراماسىن جەڭەتىنىن ءدال تاپقان. كەيىن برازيليا كوستا-ريكادان باسىم تۇسەتىنىن ءدال انىقتاعان. ءبىراق سول الەم چەمپيوناتى بارىسىندا مىسىق ءۇش رەت قاتەلەسكەن ەدى.
بىلتىر وتكەن ەۋروپا چەمپيوناتىندا دا احيلل جاقسى ناتيجە كورسەتتى. مىسىقتىڭ سەگىز بولجامىنىڭ جەتەۋى ءدال كەلگەنى حابارلاندى.
سەگىزاياق رابيو
جاپونيالىق «ساۋەگەي» سەگىزاياق رابيونىڭ تاعدىرى قاتالداۋ بولدى. ول جاپونيا قۇراماسىنىڭ توپتىق كەزەڭىندەگى ءۇش ماتچكە بولجام جاساعان.
ەكسپەريمەنت كەزىندە بالالارعا ارنالعان كىشكەنتاي باسسەين ۇشكە ءبولىندى - ءبىرىنشى جاپونيا تۋى، ەكىنشىسىندە قارسىلاس تۋى، ۇشىنشىسىندە «تەڭ ەسەپ» دەپ جازىلعان. ءار بولىكتە قورجىن بولدى. رابيو ءۇش بولىكتىڭ بىرىندەگى قورجىندى ۇستاۋى شارت.
رابيونىڭ بولجامىنان كەيىن جاپون جۇرتى ۇلتتىق قۇرامانىڭ ناتيجەسىن باقىلادى. جاپونيا قۇراماسى كولۋمبيانى جەڭىپ، سەنەگالمەن تەڭ ءتۇستى، كەيىن پولشادان جەڭىلىپ قالدى. رابيو ءدال وسىنداي بولجام جاساعان.
جاپوندار جاڭا ساۋەگەي سەگىزاياق شىقتى دەپ قۋانىپ ۇلگەرگەن جوق. ونى تەڭىزدەن ۇستاپ العان بالىقشى كيميو ابە بازارعا بارىپ، پولشاعا قارسى ماتچ الدىندا رابيونى كەسىپ، ەتىن ساتىپ جىبەرگەن. بالىقشى سەگىزاياقتىڭ ەتىنەن كوبىرەك اقشا تابامىن دەپ ويلاعان.
فۋتبول ماتچتەرىندە ساۋەگەيلىگىمەن كوزگە تۇسكەن ەڭ اتاقتى جانۋارلار وسىلار. نەگىزى 2008-جىلدان بەرى ءار ۇلكەن جارىستا الەمنىڭ تۇكپىر-تۇكپىرىنەن جۇزدەگەن جانۋار بولجام جاساپ كورگەن. ءبىراق كوبى ءجيى قاتەلەسىپ جاتاتىن.
بيىل كاتاردا وتەتىن الەم چەمپيوناتىندا كىم «ساۋەگەي» بولاتىنى بەلگىسىز. «مۋنديال» 20- قاراشادا باستالىپ، 18- جەلتوقسانعا دەيىن جالعاسادى. بۇعان دەيىن كاتارداعى الەم چەمپيوناتى تۋرالى جانكۇيەر ءبىلۋى كەرەك اقپاراتتاردى جازعان ەدىك.