ۇيقىدان تۇرا سالا ىستەۋگە بولمايتىن نارسەلەر

استانا. قازاقپارات - بارلىعىنا بىردەي كەلەتىن امبەباپ تاڭعى ادەتتەر جوق. ءبىراق كوپتەگەن ادام ۇيقىدان تۇرا سالا جىبەرەتىن كەڭ تاراعان قاتەلىكتەر بار.

ولار دەنساۋلىققا زيان كەلتىرەدى نەمەسە جۇمىسقا كەشىگۋگە سەبەپ بولادى.

بىردەن كوفە ءىشۋ

كوفەنى جاقسى كورەتىن ادامدار قاتارىنا جاتساڭىز، ودان مۇلدەم باس تارتۋدىڭ قاجەتى جوق. كەي تاڭعى ەرەجەلەردى ساقتاساڭىز بولعانى. مىسالى، ۇيقىدان تۇرعان سوڭ الدىمەن 1 ستاقان جىلى سۋ ءىشىڭىز. ءبىراز ۋاقىت وتكەن سوڭ عانا باسقا سۋسىندارعا كوشىڭىز.

وياتقىشتىڭ قايتالاۋ باتىرماسىن باسۋ

قانشا جەردەن تاعى دا بەس مينۋت ۇيىقتاپ العىڭىز كەلىپ تۇرسا دا، وياتقىشتىڭ قايتالاۋ باتىرماسىن باسپاعان ءجون. سەبەبى جۇمىسقا كەشىگۋىڭىز مۇمكىن جانە 5-10 مينۋت قالعىپ، قايتا ويانعاننان كۇشىڭىز قالپىنا كەلمەيدى، كەرىسىنشە، ءوزىڭىزدى ودان ءارى شارشاڭقى جانە ءالسىز سەزىنەتىن بولاسىز.

ەلەكتروندى پوشتا مەن الەۋمەتتىك جەلىنى تەكسەرۋ

كوپشىلىك ادام ۇيقىدان ويانا سالا قولىنا سمارتفون الىپ، كەلگەن حاتتاردى تەكسەرە باستايدى. بۇل ادەت كۇيزەلىستىڭ ارتۋىنا جانە كۇنى بويى كوڭىل كۇيىڭىزدىڭ ناشار بولۋىنا ىقپال ەتۋى مۇمكىن. دۋشقا ءتۇسىپ، كيىنىپ، تاڭعى اس ءىشىپ بولعانعا دەيىن ۇيالى تەلەفونىڭىزعا ءمان بەرمەڭىز. اعزاڭىز بەن اقىل- ويىڭىزدىڭ تولىقتاي ويانۋىنا وسىنشاما ۋاقىت كەرەك.

توسەك جيناماۋ

كەي ادامدار ۇيقىدان تۇرعاننان كەيىن جانە ۇيدەن شىعاردا توسەك جينامايدى. «ادەتتەر كۇشى» كىتابىنىڭ اۆتورى چارلز داحيگگ توسەكتى ۇيقىدان تۇرا سالا جيناۋدىڭ ماڭىزدى ەكەنىن ايتادى. بۇل ءوزىڭىزدى كۇنى بويى كۇردەلى ىستەردى ورىنداۋعا دايىنداۋعا كومەكتەسەدى. توسەكتى جيناۋ ارقىلى ۇيقىدان تۇرا سالا ورىندالعان ءبىر ءىستى الاسىز، بۇل وزدىگىنشە تىزبەكتى رەاكسيانى ىسكە قوسادى. بۇل پايدالى ادەتتەردى جانە ءىستى سوڭىنا دەيىن جەتكىزۋدى ۇيرەنۋگە ىقپال ەتەدى.

قاراڭعىدا جينالۋ

برلىق ادام بىردەي ۇيقىدان تۇرا سالا جاپقىشتى اشىپ، جارىقتى قوسپايدى. ءبىراق ادامداردىڭ بيولوگيالىق ساعاتتارى جارىققا جانە قاراڭعىعا سەزىمتال. سوندىقتان قاراڭعىدا جينالساڭىز، ۇيقىڭىزدى اشا الماي، تاعى ۇيىقتاپ العىڭىز كەلىپ تۇرادى.

تاڭعى اس ىشپەۋ

ۇيدەن تاڭعى اس ىشپەي شىقپاعان دۇرىس. ايتپەسە، ماڭىزدى ىستەردى ورىنداۋعا قاجەتتى قولايلى ەنەرگيا دەڭگەيى جايلى ءسوز قوزعاۋدىڭ قاجەتى جوق. وعان قوسا، ول تۇسكى استا ارتىق تاماقتانۋ قاۋپىن ارتتىرادى.