پرەزيدەنتتىڭ باعاسى ءبىزدىڭ شابىتىمىزعا قانات ءبىتىردى - احمەت بايتۇرسىن ۇلى ءمۇسىنىنىڭ اۆتورى
ءىس-شارا بارىسىندا پرەزيدەنت ەسكەرتكىش اۆتورلارىنىڭ جۇمىسىن جوعارى باعالاعان ەكەن. وسى رەتتە قازاقپارات ءتىلشىسى ءمۇسىندى جاساعان اۆتورلاردىڭ ءبىرى ايدوس ءسابيت ۇلىنا حابارلاسىپ، از-كەم اڭگىمەگە تارتقان ەدى.
ايتا كەتەيىك، مەملەكەت باسشىسى سالتاناتتى راسىمنەن كەيىن اقىننىڭ ۇرپاقتارىمەن، زيالى قاۋىم وكىلدەرىمەن، سونداي-اق ەسكەرتكىش اۆتورلارى ايدوس بۇركىتبايەۆپەن جانە تيمۋر ەرمۇحامەتوۆپەن اڭگىمەلەسىپ، سۋرەتكە ءتۇستى.
«ەسكەرتكىشتىڭ اشىلۋ راسىمىنەن كەيىن، پرەزيدەنت ءبىزدى ارنايى قاسىنا شاقىرىپ، قولىمىزدى الىپ، ريزاشىلىعىن ءبىلدىردى. ءبىزدىڭ قايدا وقىعانىمىزدى، بۇعان دەيىن قانداي جۇمىستار جاساعانىمىزدى سۇرادى. تيمۋر ەكەۋمىز مۇمكىندىگىنشە بۇعان دەيىن جاساعان جۇمىستارىمىز تۋرالى قىسقاشا ايتتىق. مەملەكەت باسشىسى بىزدەن «جەكە شەبەرحانالارىڭ بار ما؟» دەپ سۇرادى. ءبىز بار ەكەندىگىن ايتتىق.
«بۇل جۇمىس ماعان قاتتى ۇنادى، ءاربىر دەتالدارىنا مۇقيات كوڭىل ءبولىپ جاساعان ەكەنسىڭدەر. قانشاما جۇمىستاردى كورىپ ءجۇرمىن، كەيبىر مۇسىندەر كوڭىلىمە تولمايتىنى دا راس. ال سىزدەرگە كوپ راحمەت، جۇمىستارىڭ تابىستى بولسىن!» دەدى. بۇل باعا ءبىزدىڭ شابىتىمىزعا قانات بىتىرگەندەي بولدى. بۇيىرسا الداعى ۋاقىتتا بۇدان دا جاقسى جۇمىستار جاساۋعا تىرسامىز»، - دەيدى ءمۇسىننىڭ اۆتورى ايدوس ءسابيت ۇلى.
سونىمەن بىرگە، ەسكەرتكىش اۆتورى ءساتتى شىققان تۋىندىنىڭ ەرەكشەلىگىمەن ءبولىستى. ونىڭ ايتۋىنشا، تۇلعالارعا ارنالعان ەسكەرتكىش سول تۇلعانىڭ كەلبەتىمەن قوسا، ىشكى جان-دۇنيەسىن دە اشۋى ءتيىس ەكەندىگىن، ۇلكەن ىزدەنىس كەرەكتىگىن ايتادى.
«ءمۇسىن قولادان قۇيىلعان، تۇعىرى گرانيت تاستان جاسالعان. بيىكتىگى - 3,5 مەتر، تۇعىرى - 1,5 مەتر، جالپى بيىكتىگى 5 مەتر بولادى. احمەت اتامىزدى بىلمەيتىن كىسى جوق شىعار، ۇلت ۇستازىنىڭ بەينەسىن جاساۋدا ول كىسىنىڭ مۇراعاتتارداعى سۋرەتتەرىن قارادىق، جاس كەزىندەگى، قارتايعان كەزىندەگى بەينەلەرىن ىزدەدىك. ءومىر جولى تۋرالى قايتالاپ وقىدىق»، - دەيدى ايدوس ءسابيت ۇلى.
10 جىلدان بەرى وسى سالادا جۇمىس ىستەپ كەلە جاتقان ازاماتتار بۇعان دەيىن دە كوپتەگەن تۇلعالاردىڭ ەسكەرتكىشىن جاساۋعا اتسالىسىپتى. ءبارى دە جۇرتتىڭ كوڭىلىنەن شىققان تۋىندىلار.
«بۇعان دەيىن الماتىدا اشارشىلىق قۇرباندارىنا قويىلعان ەسكەرتكىشتىڭ بەينەسىن جاسادىق. استانا قالاسىنا قويىلعان ءابۋ ناسىر ءال-فارابي، الماتىدا نۇرتاس وڭداسىنوۆ، ءشامشى قالداياقوۆتىڭ ەسكەرتكىشتەرىن جاسادىق. جاقىندا تاراز قالاسىندا قويىلعان شەرحان مۇرتازا اتامىزدىڭ ەسكەرتكىشى دە ءبىزدىڭ تۋىندى. تۇلعالارعا ارنالعان تۋىندىنىڭ ءساتتى شىعۋى، ونىڭ سىرتقى كەلبەتى عانا ەمەس ىشكى جان-دۇنيەسىنە ۇڭىلگەندىگىمىزدەن بولار. ءبىز ءوزىمىز كىرىسىپ، جاسايتىن تۇلعانىڭ ومىرىمەن تولىق تانىسامىز، وقىپ زەرتتەيمىز، سۋرەتتەرىن، بەينە ماتەريالدارىن اقتارامىز، سول ارقىلى ەسكەرتكىشكە مىنەزىن، جان-دۇنيەسىن سىڭىرۋگە تىرسامىز»، - دەيدى ايدوس ءسابيت ۇلى.
ەستەرىڭىزگە سالا كەتەيىك، قازاقتىڭ رۋحاني كوسەمى اتانعان الاش ارداقتىسى، ۇلت ۇستازى احمەت بايتۇرسىن ۇلىنىڭ تۋعانىنا بيىل 150 جىل تولىپ وتىر.
اۆتور ريزابەك نۇسىپبەك ۇلى