بۇل تۋرالى قازاقپارات مەملەكەتتىك كىرىستەر كوميتەتىنىڭ باسپا ءسوز قىزمەتىنە سىلتەمە جاساپ حابارلايدى.
ەلەكتروندى كەزەك جۇيەسىن ىسكە قوسۋ ماقساتىندا ق ر قارجى مينيسترلىگىنىڭ مەملەكەتتىك كىرىستەر كوميتەتى مەن ق ر ۇ ق ك شەكارا قىزمەتى بىرلەسىپ، قازاقستاننان «دوستىق» پۋنكتى ارقىلى شىعاتىن كولىك قۇرالدارىن وتكىزۋدى ۇيىمداستىرۋدىڭ ۋاقىتشا سحەماسىن بەكىتتى.
23- قاراشادان باستاپ Qoldau.kz نەمەسە «CargoRuqsat» موبيلدى قوسىمشاسى (IOS نەمەسە Android) پلاتفورماسىنىڭ اۆتوماتتاندىرىلعان ەلەكتروندى كەزەك جۇيەسى قولدانىلادى.
قولدانىستاعى جۋرنالعا تىركەۋ جانە «دوستىق» وتكىزۋ پۋنكتىندە قاعاز رۇقساتتامالاردى بەرۋ 22- قاراشادان باستاپ توقتاتىلادى. قاعاز تاسىعىشتاعى كەزەكتىڭ قولدانىستاعى ءتىزىمى سيفرلاندىرىلىپ، اقپاراتتىق جۇيەگە ەنگىزىلەدى.
ەلەكتروندى كەزەك جۇيەسىن قۇرۋدىڭ ماقساتى - كولىك قۇرالدارىنىڭ، جۇكتەر مەن تاۋارلاردىڭ وتكىزۋ پۋنكتىنە كىرۋ كەزەكتىلىگىن قالىپتاستىرۋ پروتسەسىنىڭ اشىقتىعى مەن سيفرلاندىرىلۋىن قامتاماسىز ەتۋ، سونداي-اق ەلدىڭ ترانزيتتىك-كولىكتىك جانە ەكسپورتتىق الەۋەتىن ارتتىرۋ.
جۇيەنى ق ر ق م «اقپاراتتىق-ەسەپكە الۋ ورتالىعى» ا ق ماماندارى ازىرلەدى. بۇل جۇيە بارىنشا ىڭعايلى جانە اشىق بولىپ تابىلادى، جۇرگىزۋشى كورسەتىلگەن پورتالدا تىركەلگەننەن كەيىن نەمەسە موبيلدى قوسىمشا ارقىلى جول ءجۇرۋ ءۇشىن بوس كۇن مەن ۋاقىتتى تاڭدايدى. بۇل رەتتە جۇرگىزۋشى ءوز كەزەگى تۋرالى س م س- حابارلاما الادى.
ەستەرىڭىزگە سالا كەتەيىك، شەكارادا ەلەكتروندى كەزەك جۇيەسىن ىسكە قوسۋدى مەملەكەت باسشىسى قاسىم-جومارت توقايەۆ 20- قازاندا جەتىسۋ وبلىسىنىڭ جۇرتشىلىعىمەن كەزدەسۋ بارىسىندا تاپسىرعان بولاتىن.
«تاعى ءبىر وزەكتى ماسەلە - كارانتيندىك شەكتەۋلەرگە بايلانىستى قازاقستان-قىتاي شەكاراسىنداعى وتكىزۋ پۋنكتتەرىنىڭ جۇمىسىنىڭ كۇرت باياۋلاۋى. جۇرگىزۋشىلەردىڭ ءادىل نارازىلىعىن تۋدىراتىن جۇك كولىكتەرىنىڭ توپتالۋى بار. جاعدايدى تۇزەتۋ ءۇشىن «الاكول» جانە «نۇر جولى» شەكارالىق وتكىزۋ پۋنكتەرىندە ەلەكتروندى كەزەكتى ەنگىزۋدى جەدەلدەتۋ قاجەت»، - دەپ تاپسىردى مەملەكەت باسشىسى.
ۋاقىتشا سحەمامەن ق ر ق م مەملەكەتتىك كىرىستەر كوميتەتىنىڭ رەسمي ينتەرنەت-رەسۋرستارىندا (kgd.gov.kz) جانە ۆەب-سايتتا CargoRuqsat.kz CGR.qoldau.kz تانىسۋعا بولادى.