الماتىدا وتكەن ەكىنشى ەنەرگەتيكالىق فورۋمدا وسى ماسەلە ايتىلدى. فورۋمنىڭ ءبىر سەسسياسى ورتالىق ازيا ەلدەرىندە تۇراقتى ەنەرگەتيكالىق جۇيەلەردى قالىپتاستىرۋ تاقىرىبىنا ارنالدى. ونى بەلگىلى قوعام قايراتكەرى ولجاس سۇلەيمەنوۆ اشتى.
بىرىككەن ۇلتتار ۇيىمىنىڭ مالىمەتى بويىنشا، بولاشاقتا مۇنايدىڭ ورنىن ليتي الماستىرۋى مۇمكىن. ليتيدى ماماندار «اق مۇناي» دەپ تە اتايدى. ليتيدىڭ قولدانۋ اياسى جىلدان جىلعا كەڭەيىپ كەلەدى. سونداي- اق سوڭعى جىلدارى سۋتەگى ەنەرگەتيكاسى تۋرالى ءجيى ءسوز بولىپ ءجۇر. «ەگەر ليتي مەن سۋتەگىن قاۋىپسىز ءوندىرۋ تەحنولوگياسىن ۇيرەنسەك، بولاشاقتا ەنەرگياعا دەگەن مۇقتاجدىقتىڭ الدىن الۋعا بولادى»، - دەيدى فورۋمعا قاتىسۋشىلار.
ەنەرگەتيكالىق فورۋمنىڭ ماقساتى - وسى سالادا ءتيىمدى شەشىم تابۋعا اتسالىسۋ. ب ۇ ۇ وكىلدەرىنىڭ ايتۋىنشا، قازاقستان جاسىل ەنەرگيانى دامىتۋ بويىنشا كوپتەگەن ەلدەرگە ۇلگى بولاتىنداي قىزمەت اتقارىپ وتىر.
دميتري مارياسين، ب ۇ ۇ ە ە ك اتقارۋشى حاتشىسىنىڭ ورىنباسارى:
- قازاقستاندا تابيعي بايلىقتاردىڭ الۋان ءتۇرى بار. ولاردى قالاي تۇراقتى ءوندىرۋ كەرەك؟ مىسالى، ليتي نەمەسە باسقا دا جاسىل ماتەريالداردى وندىرىستىك قالدىقتاردان قالاي وڭدەۋگە بولادى؟ ازىرگە بۇل تاقىرىپ قىزىعۋشىلىق تۋدىرا قويماۋى مۇمكىن. ءبىراق جاقىندا الەمنىڭ نازارى وسى سالاعا اۋاتىنى انىق. الەمدىك قارجى ينستيتۋتتارى مەن ءىرى دەمەۋشىلەر وسى سالاعا باسىمدىق بەرەتىن بولادى.
www.24.kz