ءدال وسى كۇنى رەسپۋبليكا بويىنشا تەڭگە اينالىمعا شىققان بولاتىن.
Massaget.kz ءتىلشىسى تەڭگە ترانسفورماتسياسى قالاي بولعانىنا شولۋ جاسادى.
العاش شىققان كەزدە 1 تەڭگە - 500 رۋبلگە تەڭ بولدى. تەڭگە اينالىمعا شىققاننان كەيىن اقشانى قازاقستاندىق تەڭگەگە ايىرباستاۋعا بەس كۇندەي ۋاقىت بەرىلگەن. ياعني 1993-جىلى 15- قاراشادا ساعات 08.00 دە باستالىپ، 20- قاراشادا ساعات 20.00 دە اياقتالعان. باستاپقىدا ۇلتتىق بانك 1 تەڭگەنى 1000 رۋبلگە باعالاعان بولاتىن. ارتىنشا ءتۇرلى الەۋمەتتىك جانە ساياسي ماسەلەلەر ەسكەرىلىپ 500 رۋبلگە ءتۇستى. ال 1 دوللار 4,75 تەڭگە بولعان.
قازاقستاندىق ۆاليۋتانىڭ العاشقى پارتياسى ۇلى بريتانيادا شىعارىلدى. ال تەڭگە گەرمانيادا باسىپ شىعارىلعان. ول ءۇشىن قازاق ۆاليۋتاسىنىڭ اتاسى سانالاتىن ديزاينەرلەر تيمۋر سۇلەيمەنوۆ، مەڭدىباي الين، اعىمسالى دۇزەلحانوۆ، قايروللا ابجالەلوۆتەر ەۋروپاعا بارعان. ارتىنشا قازاقستاننىڭ وزىندە بانكنوتا فابريكاسى اشىلىپ، جاڭا ۆاليۋتا شىعا باستادى.
باستاپقىدا 1-100 تەڭگە ارالىعىنداعى كۋپيۋرالار بولعان. ولاردا تانىمال تاريحي تۇلعالاردىڭ پورترەتتەرى بەينەلەنگەن ەدى.
1 تەڭگەدە الەمگە ايگىلى ويشىل ءال-فارابيدىڭ پورترەتى بولعان.
3 تەڭگەدە ايگىلى اقىن، ايتىس ونەرىنىڭ مايتالمانى ءسۇيىنباي ارون ۇلىنىڭ پورترەتى بولعان.
5 تەڭگەدە قازاقتىڭ ۇلى كۇيشى-كومپوزيتورى، قازاقتىڭ اسپاپتى مۋزىكا ونەرىنىڭ كلاسسيگى قۇرمانعازى ساعىرباي ۇلى بەينەلەنگەن.
10 تەڭگەدە - ۇلى عالىم شوقان ءۋاليحانوۆ.
20 تەڭگەدە ۇلى اقىن اباي قۇنانباي ۇلى بەينەلەنگەن.
50 تەڭگەدە - ءابىلقايىر حاننىڭ پورترەتى.
ال 100 تەڭگەدە 1771-1781-جىلدار ارالىعىندا بيلىك قۇرعان قازاق حاندىعىنىڭ 18-حانى ابىلاي حان بەينەلەنگەن ەدى.
بۇگىندە بۇل كۋپيۋرالاردىڭ ءبارى مونەتاعا اينالعان. ارتىنشا ءىرى سوماداعى كۋپيۋرالار پايدا بولا باستادى. مىسالى 1000 تەڭگە 1995-جىلى پايدا بولسا، 1996-جىلى العاش رەت 2000 تەڭگە باسىلىپ شىقتى. 1998-جىلدان باستاپ 5000 تەڭگەلىك كۋپيۋرا شىقتى. الايدا 2007-جىلدىڭ 14- قاراشاسىنان باستاپ ەسكى نۇسقاداعى كۋپيۋرالار اينالىمنان شىقتى.
2006-جىلى 200 تەڭگەدەن باستاپ 10 مىڭ تەڭگەگە دەيىن جاڭا سەرياداعى، مۇلدە جاڭا ديزاينداعى بانكنوتالار باسىلىپ شىقتى. 1993-جىلى اينالىمدا تيىندار دا بولعان. باستاپقىدا تيىن قاعاز كۇيىندە ەدى.
تەڭگەنىڭ ءىرى كۋپيۋرالارى ءار جىلدارى ءتۇرلى وزگەرگەن. مىسالى 200 تەڭگە باستاپقىدا قاعاز كۇيىندە بولسا، بۇگىندە ول مونەتاعا اينالعان.
200 تەڭگەنىڭ العاشقى نۇسقاسى
200 تەڭگەنىڭ قازىرگى نۇسقاسى
500 تەڭگەلىك كۋپيۋرا دا ءتۇرلى ترانسفورماتسياعا ۇشىراعان. العاشقى نۇسقادا ءال-فارابي مەن ارت جاعىندا قوجا احمەت ياسساۋي كەسەنەسى بەينەلەنگەن.
كۋپيۋرانىڭ بۇگىنگى نۇسقاسى.
1000 تەڭگەنىڭ العاشقى نۇسقاسى 500 تەڭگەنىڭ العاشقى نۇسقاسىنا ۇقسايتىن. ايىرماشىلىعى - تەك تۇسىندە ەدى.
جاڭا نۇسقادا قازاق ەلى مونۋمەنتى جانە ماڭعىستاۋ ولكەسىندەگى قىزىل قاتپارلى سۋ شايىپ كەتكەن بور قاباتتارى قىزىلكۇپتى بايقاۋعا بولادى.
ەڭ العاشقى 5000 تەڭگەدە دە ءال-فارابي بەينەلەنگەن.
بۇل 5000 تەڭگەنىڭ جاڭا، كۇنى بۇگىنگە دەيىن قولدانىپ جۇرگەن نۇسقاسى.
قازاقستاندىق تەڭگە 29 جاستا. كوپتى كورگەن: ديزاينى بىرنەشە رەت وزگەرىپ، ديەۆالۆاتسيا مەن ينفلياتسيانىڭ كۋاسى بولعان.
بۇگىندە ەڭ ۇلكەن بانكنوتا - 20 مىڭ تەڭگەلىك كۋپيۋرا. قازاقستاندىق بانكنوتالار ءتورت رەت الەمدە ەڭ ۇزدىك دەپ تانىلدى: 2011-جىلى - 10 مىڭ تەڭگەلىك، 2012-جىلى - 5 مىڭ تەڭگەلىك، 2013-جىلى - 1000 تەڭگەلىك كۋپيۋرا جانە 2016-جىلى - 20 مىڭ تەڭگەلىك كۋپيۋرا. حالىقارالىق ساراپشىلار كۋپيۋرانىڭ ديزاينى مەن قورعانىس دارەجەسىن ەسكەرگەن.
قازاقستاندىق ۆاليۋتا تۋرالى قىزىق دەرەكتەردىڭ ءبىرى - تەڭگە جازۋى قوس تىلدە جازىلعان دۇنيە جۇزىندەگى جالعىز ۆاليۋتا.
تەڭگەنىڭ سيمۆولى «ت» ارپىنە ۇقساس ەكەنى بەلگىلى. بۇل سيمۆولدىڭ تاڭدالۋىنا قاتىستى دا قىزىق دەرەك بار. 2006-جىلى ۇلتتىق بانك تەڭگەنىڭ سيمۆولىن انىقتاۋ ماقساتىندا بايقاۋ ۇيىمداستىرادى. كونكۋرسقا ۇسىنىلعان 30 مىڭ جۇمىستىڭ ىشىنەن ۆاديم داۆيدەنكو مەن سانجار امەرحانوۆتىڭ جۇمىسى ۇزدىك بولىپ تانىلعان. ولار ۇلتتىق بانكتەن ءبىر ميلليون تەڭگە جانە قازاقستاندىق بانكتەردىڭ بىرىنەن 5 مىڭ دوللار كولەمىندە سىياقى العان.