ورتالىق سايلاۋ كوميسسياسى شەتەلدىك ديپلوماتتارعا سايلاۋ پروتسەسىن ءتۇسىندىردى
«بۇل - قازاقستان تاۋەلسىزدىك العالى وتكىزىلىپ جاتقان جەتىنشى پرەزيدەنتتىك سايلاۋ. مۇنى ەلىمىزدەگى دەموكراتيانىڭ دامۋىنداعى تاعى ءبىر ماڭىزدى كەزەڭ دەپ ساناۋعا بولادى. بۇل سايلاۋ حالقىمىزعا قاسىم-جومارت توقايەۆتىڭ ءۇش جىل پرەزيدەنتتىگى تۋرالى، ءادىل قازاقستان ۇستانىمى تۋرالى پايىمداۋعا مۇمكىندىك بەرەدى. بۇل سايلاۋدا ءارتۇرلى ساياسي كوزقاراسى بار التى كانديدات دوداعا تۇسەدى، باسەكەگە تولى سايلاۋ وتكىزۋ ءۇشىن بارلىق جاعداي جاسالعان. پرەزيدەنتتىككە كانديداتتار قاتارىنا ساياسي پارتيالاردىڭ وكىلدەرى عانا ەمەس، ءارتۇرلى بىرلەستىك وكىلدەرى دە كىرەدى. ءبىر اتاپ وتەرلىگى، ءبىزدىڭ تاريحىمىزدا العاش رەت ەكى ايەل پرەزيدەنتتىككە ۇمىتكەر بولىپ وتىر. بۇل - قازاقستاننىڭ دەموكراتيالىق دامۋىنداعى تاعى ءبىر قادام. قازاقستان كوپتەگەن جىلدار بويى گەندەرلىك تەڭدىكتى قامتاماسىز ەتۋ مەن ايەلدەردىڭ بيزنەس پەن ساياساتتاعى ءرولىن ارتتىرۋ قادامدارىن جاساپ كەلەدى. قازىر ءبىز وسى كۇش-جىگەردىڭ جەمىسىن كورىپ وتىرمىز. ارينە، داۋىس بەرۋ قازاقستاننىڭ كوزقاراستارىنىڭ شىنايى كورىنىسى بولسا عانا سايلاۋ ناتيجەسى پرەزيدەنتكە ناقتى جانە مىقتى ماندات بەرەدى. وسىلايشا، ۇكىمەت سايلاۋدى ءادىل جانە اشىق ەتۋگە نيەتتى. پرەزيدەنت قاسىم-جومارت توقايەۆ سايلاۋ ناۋقانى زاڭعا سايكەس اشىق، جەرگىلىكتى جانە حالىقارالىق بايقاۋشىلاردىڭ كوپتەپ قاتىسۋىمەن وتكىزىلەتىنىن بىرنەشە رەت ايتتى»، - دەدى مۇحتار تىلەۋبەردى.
مۇحتار تىلەۋبەردى پرەزيدەنتتىك سايلاۋدى حالىقارالىق ۇيىمدار مەن قازاقستاندا اككرەديتتەلگەن ديپلوماتيالىق كورپۋس باقىلايتىنىن اتاپ ءوتتى.
«ءبىز بارلىق بايقاۋشىلارمەن ءوزارا جۇمىس ىستەسۋگە جانە سايلاۋدىڭ وبەكتيۆتى باعالانۋىنا ۇمىتتەنەمىز. قازاقستان الەمدىك قوعامداستىقتىڭ جاۋاپتى مۇشەسى ەكەنىن اتاپ وتكىم كەلەدى، سوندىقتان ءبىز سايلاۋدى ۇلتتىق زاڭناماعا جانە حالىقارالىق ستاندارتتارعا ساي وتكىزۋگە تولىعىمەن دايىنبىز»، - دەپ اتاپ ءوتتى سپيكەر.
مينيستر الداعى سايلاۋدىڭ بىرنەشە اسپەكتىلەرى تۋرالى دا ايتتى.
«بىرىنشىدەن، ماۋسىم ايىندا قابىلدانعان كونستيتۋتسيالىق تۇزەتۋلەر مەن رەفورمالاردان كەيىن پرەزيدەنتكە مەملەكەت باسشىسى بولعان كەزدە قانداي دا ءبىر ساياسي پارتيانىڭ مۇشەسى بولۋعا تىيىم سالىنعان. بۇل پرەزيدەنتتىڭ ساياسي كۇرەسكە قاتىسۋىن بولدىرماۋ مەن باسەكەلەستىككە ىقپال ەتۋى ءۇشىن جاسالدى. سول سەبەپتى پرەزيدەنت جىل باسىندا AMANAT باسقارۋشى پارتياسىنىڭ ءتوراعاسى قىزمەتىنەن كەتتى. وسىلايشا، بۇل سايلاۋدىڭ الدىڭعى سايلاۋدان ايىرماشىلىعى، قازىرگى پرەزيدەنت ساياسي پارتيانىڭ مۇشەسى رەتىندە ۇسىنىلمايدى.
ەكىنشىدەن، بىلتىر زاڭناماعا تۇزەتۋلەر ەنگىزىلگەن سوڭ، بيۋللەتەندەرگە «بارىنە قارسىمىن» باعانى ەنگىزىلدى. بۇل باعان الداعى سايلاۋدا كۇشىنە ەنەدى. ەڭ باستىسى - پرەزيدەنتتىكتىڭ جاڭا مەرزىمى تۋرالى ايتا كەتەيىن. 1- قىركۇيەكتە پرەزيدەنت قاسىم-جومارت توقايەۆ ءوز جولداۋىندا پرەزيدەنتتىك مەرزىمىن قايتا سايلاۋ قۇقىعىنسىز جەتى جىلمەن شەكتەۋدى ۇسىندى. ول پرەزيدەنتتىك مانداتتى ءبىر مەرزىمگە شەكتەۋ مەملەكەت باسشىسىنىڭ ۇلتتىق دامۋدىڭ ستراتەگيالىق مىندەتتەرىنە بارىنشا ءمان بەرۋىنە ىقپال ەتەتىنىن ايتتى. مۇنى ءبىزدىڭ ەلىمىز ءۇشىن ناعىز دەموكراتيالىق سەرپىن دەپ ساناۋعا بولادى. ءبىر عانا جەتى جىلدىق مەرزىم بيلىكتى مونوپوليالاۋ قاتەرلەرىن جويادى جانە دەموكراتيانىڭ نەگىزگى قاعيداتتارىن نىعايتادى»، - دەيدى سىرتقى ىستەر ءمينيسترى.
ونىڭ ايتۋىنشا، الداعى سايلاۋ ەلدە جۇزەگە اسىرىلىپ جاتقان اۋقىمدى رەفورمالاردان كەيىن وتەدى. 10 كۇن بۇرىن مەملەكەت باسشىسى ازاماتتىق قوعام وكىلدەرىنىڭ قاتىسۋىمەن ماۋسىم رەفەرەندۋمىندا قابىلدانعان 6 ماڭىزدى زاڭعا قول قويدى. وسى زاڭداردىڭ كۇشىنە ەنۋى ساياسي جۇيەنى دەموكراتيالاندىرۋعا جانە مەملەكەتتىك بيلىك تارماقتارى اراسىنداعى پرەزيدەنتتىڭ وكىلەتتىكتەرىن شەكتەۋگە جانە پارلامەنتتىڭ ءرولىن كۇشەيتۋگە قاتىستى تەجەۋ مەن تەپە-تەڭدىك جۇيەسىن ودان ءارى جەتىلدىرۋگە ىقپال ەتەدى.
«پارلامەنت سايلاۋى كەلەسى جىلدىڭ ءبىرىنشى جارتىسىنا جوسپارلانعان. بۇل سايلاۋ كەزەڭى ءبىزدىڭ ساياسي، ۇكىمەتتىك جانە ەكونوميكالىق جۇيەلەرىمىزدى قايتا جانداندىرادى جانە مەملەكەتتىك باسقارۋدى ايتارلىقتاي جاڭعىرتادى. ءبىز پرەزيدەنت جانە پارلامەنت سايلاۋلارىنا حالىق كوپتەپ قاتىسادى دەپ ۇمىتتەنەمىز. ءبىزدىڭ ازاماتتار ۇلتىمىزدىڭ بولاشاعىن انىقتاۋدا شەشۋشى ءرول اتقارۋى ءتيىس. جاھاندىق گەوساياسي سىن-قاتەرلەردى ەسكەرسەك، الداعى سايلاۋ قازاقستان ءۇشىن عانا ەمەس، حالىقارالىق قوعامداستىق ءۇشىن دە ماڭىزدى. حالىقارالىق داعدارىستار جاھاندىق تۇراقسىزدىق پەن قاۋىپ-قاتەردىڭ سەبەبى بولىپ وتىرعانى بارشاعا ايان. وسىلايشا، تۇراقتى جانە گۇلدەنگەن قازاقستان حالىقارالىق قوعامداستىقتىڭ مۇددەسىنە ساي كەلەدى، ويتكەنى ءبىزدىڭ ەلىمىز كەڭ اۋقىمدى جاھاندىق ىنتىماقتاستىققا، ساۋدا مەن ديپلوماتياعا جاردەمدەسۋگە ۇمتىلادى. بۇل سايلاۋ وسى ماقساتتارعا جەتۋگە ىقپال ەتەدى. ءبىز حالىقارالىق ارىپتەستەرىمىز بەن بۇگىن وسىندا ۇسىنىلعان ەلدەر تاراپىنان ىنتىماقتاستىق پەن قولداۋ كۇتەمىز»، - دەپ تولىقتىردى مۇحتار تىلەۋبەردى.