تاراپتار كەلەسى جىلى قازاقستاندا يننوپروم حالىقارالىق ونەركاسىپتىك كورمەسىن وتكىزۋ جايىن تالقىعا سالدى.
يننوپروم كورمەسى 2010 -جىلدان بەرى ءداستۇرلى تۇردە ەكاتەرينبۋرگ قالاسىندا وتكىزىلىپ كەلەدى. اۋقىمدى شارا ونەركاسىپ وكىلدەرى ءۇشىن ساۋدا- ەكونوميكالىق قاتىناستاردى دامىتۋعا، جاڭا نارىقتاردى اشىپ، سەرىكتەستەردى تابۋعا، تاپسىرىس بەرۋشىلەر جانە جەتكىزۋشىلەر اراسىندا ديالوگ ورناۋىنا سەپتىگىن تيگىزەدى.
كەزدەسۋ بارىسىندا قايىربەك وسكەنبايەۆ حالىقارالىق كورمەنى ۇيىمداستىرۋ كەلەسى جىلدىڭ قازان ايىنا جوسپارلانعانىن اتاپ ءوتتى.
«بيىل قازاقستان يننوپروم-2022 كورمەسىنىڭ رەسمي سەرىكتەس ەلى بولدى. 1600 شارشى مەتردى قۇرايتىن قازاقستاندىق ەكسپوزيتسيا الاڭىنا حيميا، فارماتسيەۆتيكا ونەركاسىبى، ءتۇستى جانە قارا مەتاللۋرگيا، ماشينا جاساۋ، قۇرىلىس يندۋسترياسى مەن جەڭىل ونەركاسىپ سالالارىنان 200 دەن استام كومپانيا ورنالاستى. ءبىز ۇلكەن تاجىريبە جينادىق، ەندىگى رەتتە ەلىمىزدىڭ استاناسىندا وسىنداي شارانى وتكىزۋ ماقساتى تۇر»، - دەدى مينيستر.
ءوز كەزەگىندە، رەسەي فەدەراتسياسى ونەركاسىپ جانە ساۋدا ءمينيسترىنىڭ ورىنباسارى الەكسەي گرۋزديەۆ شارانى ۇيىمداستىرۋ جۇمىستارىنا بارىنشا قولداۋ كورسەتۋگە دايىن ەكەندىگىن جەتكىزدى. تاراپتار الداعى ۋاقىتتا كورمەگە قاتىسۋعا نيەتتى ءوندىرىس وشاقتارىمەن جۇمىس جۇرگىزبەك.