اقمولا وبلىسىنداعى ارنايى وپەراتسيا ناتيجەسىندە ءى ى م ۇيىمداسقان قىلمىسقا قارسى كۇرەس دەپارتامەنتى بولىمشەلەرىنىڭ قىزمەتكەرلەرى جەرگىلىكتى كاسىپكەرلەردەن اقشا بوپسالاعان قىلمىستىق توپتىڭ 6 مۇشەسىن ۇستادى.
«قىلمىستىق توپتىڭ قوقان-لوققى كورسەتىپ، كۇش قولدانۋ ارقىلى جەرگىلىكتى كاسىپكەرلەردىڭ بىرىنەن 2,5 ميلليون تەڭگە بوپسالاپ، ونىڭ Subaru Outback اۆتوكولىگىن تارتىپ العانى انىقتالدى. بۇگىنگى كۇنى ۇستالعانداردىڭ وبلىس اۋماعىندا ءبىرقاتار ۇقساس قىلمىستار جاساۋعا قاتىسى بارى بەلگىلى بولدى. جەدەل اقپارات بويىنشا بۇرىن بىرنەشە رەت قىلمىستىق جاۋاپكەرشىلىككە تارتىلعان كۇدىكتىلەر «ۇرىلار يدەولوگياسىن» ۇستانىپ، ونى جاستار اراسىندا ناسيحاتتاعان. سونداي- اق توپ مۇشەلەرى قارۋ قولدانىپ، اقشا بوپسالاعان. مۇندا ولار تالاپ قويۋ ءۇشىن جالعان سىلتاۋلاردى قولدانعان. ءتىنتۋ بارىسىندا ولاردان جابىرلەنۋشىلەردى قورقىتۋ ءۇشىن قولدانىلعان ەسىرتكى، سۋىق جانە اتىس قارۋى تاركىلەندى»، - دەلىنگەن حابارلامادا.
وسى فاكتىلەر بويىنشا ق ر ق ك-نىڭ 194-بابىنىڭ 2-بولىگىمەن «بوپسالاۋ» سوتقا دەيىنگى تەرگەۋ جۇرگىزىلۋدە. كۇدىكتىلەر قاماۋعا الىندى. تەرگەۋ جالعاسۋدا.