قارقارالىدا احمەت بايتۇرسىنوۆقا ەسكەرتكىش ورناتىلدى

قارقارالى. قازاقپارات - قارقارالىدا ۇلت ۇستازى، الاشوردانىڭ بەلسەندى وكىلى احمەت بايتۇرسىن ۇلىنا ەسكەرتكىش ورناتىلدى، دەپ حابارلايدى قازاقپارات ءتىلشىسى.

ەسكەرتكىش قارقارالى ماڭىنداعى قورعانتاس تاۋىنىڭ ەتەگىنەن قازىلعان تۇتاس تاستان جاسالعان. ونىڭ اۆتورى - قارقارالى اۋدانى مەملەكەتتىك مۇراعاتىنىڭ باسشىسى ماناربەك كارىم. بۇل ءمۇسىنشىنىڭ ۇلت ۇستازىنا ارنالعان ەكىنشى جۇمىسى.

بۇعان دەيىن «الاش» پارتياسى كوشباسشىسىنىڭ 150 جىلدىعىنا ارنالعان ەسكەرتكىش قاراعاندىداعى احمەت بايتۇرسىن ۇلى اتىنداعى مەكتەپ-گيمنازياسىنىڭ اۋلاسىندا ورناتىلعان بولاتىن.

«قورعانتاس تاۋى قارقارالى قالاسىنىڭ باتىس بولىگىندە ورنالاسقان. مەن بۇعان دەيىن ءدال وسىنداي ەسكەرتكىش جاساپ، وسى تاۋدىڭ ەتەگىنەن الىنعان قاتتى تاستى قولداندىم. مىنە، وسى جولى دا سول تاستى قولداندىم. ەسكەرتكىشتىڭ ەنى - 2,2 مەتر، بيىكتىگى - 4,3 مەتر. ونىڭ سالماعى شامامەن 5 توننا. مۇنداي تاپسىرىستاردى ورىنداۋ مەن ءۇشىن ۇلكەن مارتەبە»، - دەيدى ءمۇسىنشى.

قارقارالى اۋداندىق ءبىلىم ءبولىمى عيماراتىنىڭ جانىنا قويىلعان ەسكەرتكىشتىڭ اشىلۋىنا قوعام بەلسەندىلەرى، پەداگوگتەر مەن قالا اكىمى ەرلان قۇسايىن قاتىستى.