ىشكى ىستەر مينيسترلىگىنىڭ كوشى-قون قىزمەتى كوميتەتى وسىنداي ۇسىنىس كورسەتىلگەن قاۋلىنى جاريالادى، دەپ حابارلايدى قازاقپارات ءتىلشىسى.
«قازاقستان رەسپۋبليكاسىنا ۆيزا الۋدى تالاپ ەتپەيتىن تارتىپپەن كوشىپ كەلۋشىلەردىڭ قازاقستاندا بولۋىنا مەملەكەتتىك شەكارانى كەسىپ وتكەن كۇننەن باستاپ 180 كۇندىك جيىنتىقتا 90 كۇن وتكەنشە رۇقسات ەتىلەدى. بۇل ق ر مەملەكەتتىك شەكاراسىن كەسىپ وتكەن كۇننەن باستاپ كۇنتىزبەلىك 14 كۇن وتكەن سوڭ اياقتالاتىن يران، قىتاي حالىق رەسپۋبليكاسى جانە ءۇندىستاننىڭ ازاماتتارىنا اسەر ەتپەيدى»، - دەپ جازىلعان قۇجاتتا.
ايتا كەتەيىك، بۇرىنعى تالاپقا سايكەس، قازاقستان اۋماعىنا ۆيزاسىز كەلەتىن ازاماتتاردىڭ ەلىمىزدە 30 كۇن تۇرۋىنا رۇقسات ەتىلەتىن.
«كوشىپ كەلۋشىلەردىڭ رۇقسات ەتىلگەن بولۋ مەرزىمىن ەسەپتەۋدى ق ر ۇلتتىق قاۋىپسىزدىك كوميتەتى شەكارا قىزمەتىنىڭ لاۋازىمدى ادامى وتكىزۋ پۋنكتىندە 180 كۇن بۇرىن ناقتى كىرگەن كۇننەن باستاپ ساناپ شىعارۋ جولىمەن جۇزەگە اسىرادى. ەگەر كەلۋ كەزىندە كوشىپ كەلۋشىنىڭ وعان رۇقسات ەتىلگەن بولۋ مەرزىمىنەن اسىپ كەتكەنى انىقتالعان جاعدايدا، «حالىقتىڭ كوشى-قونى تۋرالى» زاڭىنداعى تارتىپپەن كەلۋدەن باس تارتۋ تۋرالى شەشىم قابىلدانادى»، - دەپ كورسەتىلگەن وزگەرىس ەنگىزىلگەلى وتىرعان قاۋلىدا.
دەگەنمەن، بۇل نورمالار قازاقستاندا ۋاقىتشا تۇرۋعا رۇقسات العان شەتەلدىكتەرگە قولدانىلمايدى.
سونىمەن قوسا، بۇرىنعى رەداكسيادا ەلگە زاڭسىز كوشىپ كەلۋشىلەردى قازاقستان اۋماعىنان شىعارۋ شىعىندارىن سول ادامدى ەلگە شاقىرعان نە ونىڭ ەڭبەگىن پايدالانعان جەكە نەمەسە زاڭدى تۇلعا وتەيتىن. ۇسىنىلىپ وتىرعان قاۋلىدا بۇل نورما الىنىپ تاستالعان.