قازاقستان مەن تۇركيا اسكەري ىنتىماقتاستىعى اياسىندا كەلەر جىلدىڭ جوسپارى بەكىتىلدى
16:22, 10 - قاراشا 2022
استانا. قازاقپارات - ەلوردادا ق ر قورعانىس مينيسترلىگى حالىقارالىق ىنتىماقتاستىق دەپارتامەنتى باستىعىنىڭ جەتەكشىلىگىمەن قازاق-تۇرىك ەلدەرىنىڭ شتابتىق كەلىسسوزدەرى ءوتتى.
بۇل تۋرالى قازاقپارات ۆەدومستۆونىڭ باسپا ءسوز قىزمەتىنە سىلتەمە جاساپ حابارلايدى.
حالىقارالىق اسكەري ىنتىماقتاستىق قۇرىلىمدارىنىڭ باسشىلارى ەكى ەلدىڭ قورعانىس مينيسترلەرى مەن باس شتاب باستىقتارىنىڭ كەزدەسۋلەرىنىڭ قورىتىندىلارى بويىنشا تاپسىرمالاردىڭ ىسكە اسىرىلۋ بارىسىن، اسكەري ءبىلىم بەرۋدى، وقۋ-جاتتىعۋلارعا قاتىسۋدى، ءتۇرلى سالالاردا تاجىريبە الماسۋمەن قوسا، ىنتىماقتاستىقتىڭ اعىمداعى جاي-كۇيى مەن كەلەشەكتەگى باعىتتارىن تالقىلادى.
ناتيجەسىندە 2023-جىلعا ارنالعان جوسپارعا قول قويىلدى. ساپار بارىسىندا تۇرىك ەلىنەن كەلگەن قوناقتار قازاقستان رەسپۋبليكاسى قارۋلى كۇشتەرىنىڭ مەملەكەتتىك اسكەري-تاريحي مۇراجايىنا دا بارىپ قايتتى.