وسى ارالىق سايلاۋدا كونگەرستى كىم باقىلايتىنى بەلگىلى بولادى. سوندىقتان امەريكالىقتار دا ساياسي ناۋقاندا بەلسەندى. ەلدە تىركەلگەن سايلاۋشىلار ەرتەرەك داۋىس بەرگەن، قالعانى ارالىق سايلاۋ بەلگىلەنگەن كۇنى، قاراشانىڭ 8- ءى تاڭداۋ جاساپ جاتىر.
بۇگىن ارالىق سايلاۋ ءوتىپ جاتىر. جالپى كونگەرسكە ارالىق سايلاۋ دەگەنىمىز، 2024 -جىلى بولاتىن پرەزيدەنتتىك سايلاۋعا دايىندىق ىسپەتتەس. باسەكە دەموكراتتار مەن رەسپۋبليكاشىلار اراسىندا وتەدى. ءار شتاتتىڭ حالقى گۋبەرناتورلارىن عانا ەمەس قوس پالاتانىڭ دەپۋتاتتارىن تاڭدايدى. وكىلدەر پالاتاسىنداعى 435 ورىن، سەناتتاعى 100 ورىننىڭ 35- ءى سايلاۋ بيۋللەتەنىندە تۇر. قازىر بيلىك باسىنداعى دەموكارتتار زاڭ بەكىتۋشى ورگانداعى ىقپالىن ساقتاپ قالۋعا تىرىسادى. ال رەسپۋبليكاشىلارعا وكىلدەر پالاتاسىندا نەمەسە سەناتتا باسىم تۇسسە جەتىپ جاتىر. ولار پرەزيدەنت دجو بايدەننىڭ كۇن تارتىبىندەگى زاڭ جوبالارىن قابىلداماي، شەكتەپ وتىرادى. ءتىپتى اق ۇيگە قارسى تەرگەۋ باستاۋى مۇمكىن.
گۆەن، داۋىس بەرۋشى:
- مەن ءۇشىن ينتەگراتسيا، ەلدەگى قىلمىس، مەملەكەتتىڭ قاۋىپسىزدىگى ماڭىزدى. ءبىز تەك ءبىر ادامدى تاڭدامايمىز، ءبىز تۇتاس كومانداعا داۋىس بەرەمىز. سوندىقتان ەل ءۇشىن كوماندا رەتىندە جۇمىس ىستەۋىمىز كەرەك.
اننا رەينەر، جەرگىلىكتى باسقارۋ ورگانىنا كانديدات:
- مەنىڭ تاجىريبەمدە حالىقتى ادەتتە اق ۇيدە نە بولىپ جاتقانى الاڭداتادى. قاي پارتيا ۇستەمدىككە يە بولادى؟ ەل نازارى سوعان اۋادى. ەندى نە بولارىن كورەمىز. دەگەنمەن ەكى پارتيا دا تارتىستى باسەكە كورسەتىپ جاتىر. سوڭعى 40 جىلدا بولماعان ينفلياتسيا، ازىق- تۇلىك پەن بەنزين باعاسىنىڭ قىمباتتاۋى ەلەكتورات تاڭداۋىنا اسەر ەتەتىنى انىق.
بۇگىنگى ساياسي ناۋقاندا دەموكراتتار ءبىراز قولداۋشىلارىنان ايىرىلىپ قالۋدان قاۋىپتەنەدى. ول دەگەنىمىز بايدەن باسىمدىق بەرىپ جاتقان زاڭ جوبالارى اياقسىز قالادى دەگەن ءسوز. سونىڭ ىشىندە حالىق نارازى بولعان جاساندى تۇسىك جاساتۋعا شەكتەۋ، وتباسىلىق جاعدايعا بايلانىستى دەمالىس الۋ، كليماتتى قورعاۋعا ارنالعان زاڭ جوبالارى بار. سوندىقتان بايدەن رەسپۋبليكاشىلار جەڭسە امەريكانىڭ نەگىزى سانالاتىن دەموكراتيا السىرەيدى، دەدى. ەل ارالاپ، حالىقپەن كەزدەسۋىندە «دەموكراتيا بيۋللەتەندە تۇر» دەگەن ۇندەۋ تاستادى.
دجو بايدەن، ا ق ش پرەزيدەنتى:
- سىزدەردە ەڭ ماڭىزدى سايلاۋعا ءبىر- اق كۇندەرىڭىز قالدى. مەن مۇنى ۇزدىكسىز قايتالاي بەرىپ، ءوزىمدى ىڭعايسىز سەزىنە باستادىم، ءبىراق ءبىزدىڭ ءومىرىمىز، الداعى بىرنەشە جىلداعى جاعداي وسى تاڭداۋعا بايلانىستى بولادى.
رەسپۋبليكاشىلار باسىم تۇسسە، ۋكرايناعا بەرىلەتىن كومەككە دە كەدەرگى جاساۋى مۇمكىن دەيدى ساراپشىلار. ارينە مۇلدەم توقتاتىپ تاستامايدى، ءبىراق ەكونوميكالىق جانە قارۋ- جاراق بەرۋدى باياۋلاتادى. ەگەر رەسپۋبليكاشىلار وكىلدەر پالاتاسىندا كوپ ورىنعا يە بولسا، ا ق ش- تىڭ ۇلتتىق قارىزىن الدىعا تارتىپ، بايدەننەن شىعىندى قىسقارتۋدى تالاپ ەتپەك.
مەرزىمىنەن بۇرىن داۋىس بەرۋدى باقىلايتىن US Electtions Project- ءتىڭ دەرەگى بويىنشا 40 ميلليون امەريكالىق جەكە بارىپ نەمەسە پوشتا ارقىلى تاڭداۋ جاساپ ۇلگەردى. كەيبىر شتاتتاردا سايلاۋ كۇنى بيۋللەتەندى پوشتامەن جىبەرۋگە رۇقسات ەتىلگەن. سوندىقتان كونگرەسستە كىمنىڭ ءباسى بيىك تۇسكەنىن ساناۋ ءۇشىن بىرنەشە كۇن ءتىپتى بار اپتاداي ۋاقىت كەرەك. جالپى العاندا بۇل ارالىق ساياسي ناۋقان كەلەسى پرەزيدەنتتىك سايلاۋعا دەيىن ا ق ش- تىڭ 2023-2024 -جىلدارعا ارنالعان ىشكى جانە سىرتقى ساياساتىنىڭ باعىتىن الدىن الا ايقىندايدى.
www.24.kz