بۇل توقتامعا عالىمدار تاجىريبەدەن كەيىن كەلگەن. ولار جۇرەگى توقتاپ ءبىر ءولىپ تىرىلگەن ادامداردى سىناقتان وتكىزگەن. تاجىريبەگە 567 ادام قاتىسقان. ولار 2017-جىلدىڭ مامىرىنان 2020-جىلدىڭ ناۋرىز ايىنا دەيىن زەرتتەۋدەن وتكەن. قىسقا ءولىمدى باسىنان كەشىرگەندەر باسىنان نە وتكەنىن سيپاتتاپ بەرگەن.
ولار الدىمەن مىنا سەزىمدەردى باستان كەشىرگەن:
• دەنەدەن ءبولىنۋ سەزىمى؛
• وقيعالاردى اۋىرتپالىقسىز جانە ازاپسىز قابىلداۋ؛
• ءومىردى باعالاۋ؛
• باسقالارعا قاتىستى ارەكەتتەرىڭىز، نيەتتەرىڭىز تۋرالى ويلاۋ.
عالىمدار بۇل يلليۋزيا نەمەسە نونسەنس ەمەس ەكەنىن دالەلدەي الدى، ويتكەنى رەانيماتسيا كەزىندە ميدىڭ جاسىرىن بەلسەندىلىگىنە سىناقتار جۇرگىزىلگەن.
«ءبىز ميدا بەلسەندى بولاتىن گامما، دەلتا، تەتا، الفا جانە بەتا تولقىندارىن تاپتىق. بۇل تولقىنداردىڭ كەيبىرى ادامدار سانالى ويلاۋ، ەستە ساقتاۋ جانە قابىلداۋ سياقتى جوعارى پسيحيكالىق فۋنكسيالاردى ورىنداعان كەزدە پايدا بولادى»، - دەيدى زەرتتەۋ جەتەكشىلەرىنىڭ ءبىرى، مەديتسينا عىلىمدارىنىڭ دوكتورى، رەانيماتولوگ سەم پارنيا.
بارلىق وسى تاجىريبەلەردى ولىمگە جاقىن تاجىريبەلەر دەپ اتاۋعا بولادى جانە عالىمدار العاش رەت ولاردى باقىلاعان. سونىمەن قاتار، زەرتتەۋشىلەر ولگەن ادام حابار مەن ەستەلىكتەردى ەشقانداي كۇيزەلىسسىز قابىلدايتىنىن ايتادى.
«ادامنىڭ سانا سەزىمى، دەنەنىڭ باسقا بيولوگيالىق فۋنكتسيالارى سياقتى، ءولىم كەزىندە تولىعىمەن توقتاماۋى مۇمكىن. بۇل قۇبىلىستىڭ ەۆوليۋتسيالىق ماقساتىن ەشكىم بىلمەسە دە، ول ولىمنەن كەيىن دە ادام ساناسىنا قاتىستى قىزىقتى سۇراقتاردى انىق كورسەتەدى»، - دەيدى عالىم.
ءولىم كەزىندە ميعا نە بولاتىنىن انىقتاۋ ءۇشىن قوسىمشا زەرتتەۋلەر قاجەت. عالىمدار العاشقى جۇمىسىنىڭ ناتيجەلەرىن چيكاگودا ءوتىپ جاتقان امەريكا جۇرەك قاۋىمداستىعىنىڭ عىلىمي سەسسياسىندا ۇسىندى.
«ماسسەگەت»