كەيبىرى تاتۋ قانداي دا ءبىر تىلسىم كۇشتەن قورعايدى دەپ ويلاعان. ال بۇگىندە تاتۋ تىرتىقتى جاماۋ ءۇشىن نەمەسە ەرەكشەلەنۋدىڭ بەلگىسى رەتىندە سالىنادى. الايدا قوعامدا تاتۋعا بايلانىستى ءتۇرلى پىكىر بار.
Massaget.kz ءتىلشىسى تاتۋعا قاتىستى كەي اڭىزداردىڭ شىندىققا جاناسپايتىنىن انىقتادى.
تاتۋى بار ادامدى جۇمىسقا المايدى
tattoomarket.ru باسىلىمىنىڭ مالىمەتىنشە، بۇدان 20 جىل بۇرىن دەنەسىندە تاتۋى بار ادامعا راسىندا جۇمىسقا ورنالاسۋ قيىن بولعان. الايدا قازىر كوپ جۇمىس بەرۋشى ادامنىڭ سىرت كەلبەتىنە قاتىستى شارت قويمايدى، تەك تۇتىنۋشىلارعا كەدەرگى كەلتىرمەسە بولدى.
ال قازاقستان رەسپۋبليكاسى مەملەكەتتىك قىزمەتكەرلەرىنىڭ ار-نامىس كودەكسىندە قىزمەتكەردىڭ ءوزىن قالاي ۇستاۋى كەرەگى تۋرالى تالاپتار بەلگىلەنگەن. ءبىراق وندا سىرت كەلبەتكە قاتىستى قانداي دا ءبىر شەكتەۋ جوق.
بۇدان باسقا، بورتسەرىكتەرگە تاتۋيروۆكا سالۋعا بولمايدى، ال تاتۋيروۆكاسى بار ادامداردى جۇمىسقا المايدى دەگەن دە اڭىز بار. Massaget.kz ءتىلشىسى بۇل تۋرالى AirAstana بورتسەرىگىمەن سۇحباتتاستى.
«جوق، كەلىسىمشارتتا ول تۋرالى ەشتەڭە جازىلماعان. دەنەسىندە تاتۋى بار ادامدى جۇمىسقا الا بەرەدى. باستىسى، قول، تىزەدەن تومەن، مويىن سياقتى كورىنەتىن جەردە بولماۋى كەرەك. تاتۋ مەن قان تۋرالى ايتار بولسام، بورتسەرىكتەرگە قان تاپسىرۋعا بولمايدى»، - دەپ جاۋاپ بەردى AirAstana بورتسەرىگى ارۋجان.
دەمەك، تاتۋ جۇمىسقا ورنالاسۋعا كەدەرگى بولمايدى. سوندىقتان «تاتۋيروۆكاسى بار ادام جۇمىسقا ورنالاسا المايدى» دەگەن اڭىزدى جوققا شىعارۋعا بولادى.
دەنەسىندە ءتۇرلى تاتۋى بار ادام قان تاپسىرا المايدى
قوعامدا تاتۋيروۆكالارعا قاتىستى تاعى ءبىر اڭىز تاراعان. دەنەسىندە ءتۇرلى تاتۋى بار ادام قان مۇلدە تاپسىرا المايدى.
ەگەر تاتۋيروۆكا سالعانىڭىزعا ءبىر جىلدان اسسا، وندا بۇل اڭىز شىندىققا جاناسپايدى.
دارىگەرلەردىڭ ايتۋىنشا، دەنەگە سۋرەت سالدىرعاننان كەيىن دونور بولىپ قان تاپسىرۋ ءۇشىن ءبىرشاما ۋاقىت كەرەك. ول 4 ايدان 1 جىلعا دەيىن بولۋى دا مۇمكىن. سەبەبى تاتۋ سالدىرعاندا قانعا ينفەكسيا ءتۇسۋ قاۋپى بار. مىسالى ايتب (ادامنىڭ يممۋن تاپشىلىعى ۆيرۋسى) دەرتى اعزادا 5-6 اي بويى سەزىلمەۋى مۇمكىن. ال س گەپاتيتى 2 اپتادان 6 ايعا دەيىن سوزىلادى. سوندىقتان دا وزگەلەر جۇقتىرماۋ قاۋپى الدىن الا ەسكەرىلەدى.
تاتۋى بار ادامدارعا م ر ت- عا تۇسۋگە بولمايدى
م ر ت ماگنيت ءورىسىنىڭ پايدا بولۋىنا اسەر ەتەتىندىكتەن، كوبىنە دارىگەرلەر ناۋقاستاردان م ر ت تەكسەرىنەن وتپەستەن بۇرىن، بارلىق مەتال بۇيىمدى شەشۋدى سۇرايدى.
مۇنداي اڭىز تاتۋيروۆكالاردىڭ قۇرامىنداعى مەتالدىڭ كوپ بولۋىنا قاتىستى دەپ ايتىلىپ ءجۇر. ءبىراق قازىر تاتۋ سالاتىن سيا مەن ينەلەردە سىناپ سياقتى مەتال بولمايدى. ال كەي زاماناۋي پيگمەنتتەردە مەتال جوقتىڭ قاسى، سوندىقتان ول م ر ت تەكسەرىسىنەن ءوتۋ ءۇشىن ەشقانداي كەدەرگى كەلتىرمەيدى.
2019-جىلى گەرمانيا ينستيتۋتىنىڭ زەرتتەۋشىلەرى تاتۋيروۆكاسى بار 300 ەرىكتىنى زەرتتەپ، م ر ت ءتۇسىرۋ كەزىندە ەلەۋلى قاۋىپ بولماعانىن انىقتادى.
تىرتىق ۇستىنە تاتۋ سالۋ قاۋىپتى
inkppl.com باسىلىمىنىڭ مالىمەتىنشە، قازىر كوپ ادام دەنەسىندەگى تىرتىقتى تاتۋمەن جاسىرعىسى كەلەدى. ال قوعامدا تىرتىق ۇستىنە تاتۋ سالۋعا بولمايدى، بۇل جاراقاتتىڭ اسقىنۋىنا اسەر ەتۋى مۇمكىن دەگەن تۇسىنىك بار.
تاتۋ ماستەرلەرىنىڭ ايتۋىنشا، تىرتىق ۇستىنە تاتۋيروۆكا سالۋ قاۋىپتى ەمەس. ول ءۇشىن بار بولعانى كاسىبي تاتۋ-سۋرەتشىلەرگە جۇگىنۋ كەرەك، تەرىدەگى تىرتىقتىڭ تولىق جازىلۋىن كۇتۋ كەرەك جانە تىرتىق ءتۇرىن انىقتاپ، ونى جابۋعا جارامدى ەكەنىنە كوز جەتكىزۋ كەرەك.
تاتۋ-ستۋديالار ادەتتە تازا ەمەس
قوعامدا تاتۋ-ستۋديالار، ادەتتە، جەرتولەدە ورنالاسقان جانە ولار مۇلدە تازا ەمەس دەگەن جاڭساق پىكىر قالىپتاسقان. الايدا بۇل ولاي ەمەس. سەبەبى تاتۋ سالۋعا ارنالعان جابدىق بىرنەشە قايتارا كۆارتستەلەدى. ودان بولەك، ينە مەن ارنايى اپپاراتتى دا زالالسىزداندىرادى.
سونداي-اق، تەرىنى زاقىمدايتىن قانداي دا ءبىر پروتسەدۋرا مەديتسينالىق دەپ تانىلادى. سوندىقتان تاتۋ سالوندارىنىڭ قىزمەتى مىندەتتى ليتسەنزيالانۋى ءتيىس. ال بۇل جاعدايدا بارلىق سانيتاريا نورماسى جۇرگىزىلۋى كەرەك.