«وسى جەردە دە كەيبىر وي- پىكىرىمدى ايتقىم كەلەدى. ءبىز مىقتى مەملەكەت قۇرىپ جاتىرمىز. ءبىراق ادىلدىك بولماسا، مىقتى مەملەكەتتىڭ ءوزى اۆتوكراتياعا اينالادى.
ەلدىڭ دامۋى ءۇشىن ادىلدىك تۇبەگەيلى ورنىعۋعا ءتيىس. ونسىز حالىقتىڭ مەملەكەتكە دەگەن سەنىمى دە بولمايدى. سوندىقتان ادىلدىك يدەياسى - مەنىڭ ساياسي باعدارىمنىڭ ەڭ باستى وزەگى. بۇل ماقساتقا جەتۋ ءۇشىن، ەڭ الدىمەن، زاڭدارىمىز ءادىل بولۋى كەرەك. ويتكەنى، مەملەكەتتىك ساياسات زاڭ ارقىلى جۇزەگە اسىرىلادى. رەفورمالاردىڭ باستى ماقساتى - حالىقتىڭ تۇرمىس ساپاسىن جاقسارتۋ»، - دەدى قاسىم- جومارت توقايەۆ.
ول وتكەن اپتادا ەلىمىز ءۇشىن ايرىقشا ماڭىزى بار ءبىرقاتار زاڭعا قول قويعانىن جەتكىزدى.
«ونىڭ ىشىندە سايلاۋ زاڭناماسىنا ەنگىزىلگەن وزگەرىستەردى ەرەكشە اتاپ وتكىم كەلەدى. جاڭا زاڭدار شىن مانىندە حالىقتىق سيپاتقا يە وكىلدى ورگاندار قالىپتاستىرادى.
ءبىزدىڭ مىندەتىمىز - ەل الدىندا ابىروي- بەدەلى بار، قولىنان ءىس كەلەتىن جاڭا تۇلعالاردىڭ ساياساتقا كەلۋىنە جاعداي جاساۋ. ارالاس سايلاۋ جۇيەسى دەپۋتاتتاردىڭ اتقارۋشى بيلىككە ىقپالىن كۇشەيتە تۇسەدى. سونداي- اق، وڭىرلەردىڭ ماسەلەسىن مەملەكەتتىك دەڭگەيدە ۋاقىتىلى كوتەرۋگە سەپتىگىن تيگىزەدى. پارتيا قۇرۋدىڭ جاڭا ءادىل ەرەجەلەرى ەنگىزىلدى»، - دەدى پرەزيدەنت.
ونىڭ پايىمىنشا، بۇل قادام ازاماتتاردىڭ ساياساتقا ارالاسۋ مۇمكىندىگىن ارتتىرادى. ولار مەملەكەتتىك ماڭىزى بار شەشىمدەردى قابىلداۋعا قاتىسا الادى.
«سونداي- اق، ەلىمىزگە باسقارۋشىلاردىڭ جاڭا بۋىنى كەرەك. اسىرەسە، جوعارى جانە ورتا بۋىن باسشىلارىنىڭ قۇرامىن جاڭارتۋ اسا ماڭىزدى. سول ءۇشىن مەملەكەتتىك قىزمەتكە اۋقىمدى رەفورما جۇرگىزۋدى جوسپارلاپ وتىرمىز.
ءتۇرلى سالاعا بىلىكتى ماماندار تارتۋ ءۇشىن بارىنە بىردەي مۇمكىندىك بەرىلەتىن بولادى. مەريتوكراتيا - باستى قاعيداتىمىز. اسىرەسە، باسقارۋ ىسىنە ايماقتارداڭ شىققان مىقتى مەنەدجەرلەردى تارتۋعا باسا ءمان بەرەمىز. ەل يگىلىگى ءۇشىن ەڭبەك ەتكىسى كەلەتىن ءبىلىمدى، دارىندى ازاماتتار ءار ايماقتا بار. ولارعا جول اشۋ - مەملەكەتتىڭ مىندەتى»، - دەدى قاسىم- جومارت كەمەل ۇلى.
پرەزيدەنت ءبىزدىڭ«قۋاتتى وڭىرلەر - قۋاتتى ەل» قاعيداتىن ۇستاناتىنىمىزدى ەسكە سالدى. قازاقستاننىڭ دامۋىنا ءاربىر ايماق سۇبەلى ۇلەس قوسىپ وتىر.
«باتىستا مۇناي وندىرىلسە، ورتالىقتا كومىر، شىعىستا مەتالل شىعادى. سولتۇستىك ايماقتار استىعىمەن ايگىلى بولسا، وڭتۇستىك ءتورت تۇلىگىمەن، باۋ- باقشاسىمەن تانىمال. ءبىر سوزبەن ايتساق، ءار ولكەنىڭ ءوز ەرەكشەلىگى بار. تۇپتەپ كەلگەندە، ءبارى - ءبىر- بىرىنەن بولە- جارا قاراۋعا بولمايتىن ءبىرتۇتاس قازاقستان»، - دەدى مەملەكەت باسشىسى.
پرەزيدەنتتىڭ پايىمىنشا، اتىراۋدىڭ ەكولوگيالىق احۋالىن جاقسارتىپ، كوگالداندىرۋ كەرەك.
ەكولوگيا حالىقتىڭ دەنساۋلىعى مەن تۇرمىس ساپاسىنا تىكەلەي اسەر ەتەتىنى بەلگىلى. سوندىقتان، تابيعاتتى قورعاۋ - مەملەكەت ءۇشىن ەڭ ماڭىزدى مىندەتتىڭ ءبىرى.
«ءىرى مۇناي- گاز كومپانيالارىنىڭ قىزمەتى ءوڭىردىڭ ەكولوگيالىق احۋالىنىڭ ناشارلاۋىنا اكەپ سوقتىرۋدا.«ساسىق سايداعى» («تۋحلايا بالكا» ) جاعداي بىرتىندەپ وڭالا باستادى. الايدا، اتىراۋ مۇناي وڭدەۋ زاۋىتىنىڭ قىزمەتىنە ەكولوگتاردىڭ كوڭىلى تولمايدى. جاقىندا عانا زاۋىتتا اۋقىمدى جاڭعىرتۋ جۇمىستارى جۇرگىزىلدى. دەگەنمەن، ونداعى تەحنولوگيالىق جانە باسقارۋ ۇدەرىستەرىنىڭ ساپاسىن ءالى دە جەتىلدىرە ءتۇسۋ قاجەت. ەكولوگتار زاۋىتتىڭ زياندى قالدىقتارى شەكتى نورمادان ءجيى اسىپ كەتەتىنىن ايتادى. بۇعان جول بەرۋگە بولمايدى»، - دەدى مەملەكەت باسشىسى.
ول ەكونوميكالىق كورسەتكىشتەردىڭ دە ماڭىزدى ەكەنىن العا تارتتى. ءبىراق، حالىقتىڭ دەنساۋلىعى - ودان دا ماڭىزدى. سوندىقتان، كاسىپورىندار تابيعاتقا زيانىن تيگىزبەۋى قاجەت.
«مەن مۇنى وبلىستاعى الپاۋىت وندىرىستەرگە، اسىرەسە، مۇناي- گاز كومپانيالارىنا قاراتا ايتىپ وتىرمىن. زياندى زاتتاردىڭ شەكتەن تىس شىعارىلۋىنا جول بەرمەي، قاتاڭ باقىلاۋ جاساۋ كەرەك. ەكولوگيالىق تولەمدەر تابيعاتتى قورعاۋ ماسەلەلەرىن ناقتى شەشۋگە جۇمسالۋعا ءتيىس. اۋانىڭ لاستانۋىنا قاتىستى تاعى ءبىر ماسەلە - قوقىس پوليگوندارى. اتىراۋدىڭ ىرگەسىندەگى ەسكى قوقىس پوليگونىن رەتكە كەلتىرۋ قاجەت. سونداي- اق، قاتتى تۇرمىستىق قالدىقتاردى ىرىكتەيتىن جاڭا كەشەندى تەزدەتىپ سالۋ كەرەك»، - دەدى قاسىم- جومارت كەمەل ۇلى.