«ەگەمەن ەلىمىزدى وركەندەتۋ - ءبارىمىزدىڭ ورتاق ماقساتىمىز. بۇل جۇمىسقا ءتۇرلى سالا ماماندارى، سونىڭ ىشىندە ىسكەر ازاماتتار دا اتسالىسىپ ءجۇر. بيزنەس وكىلدەرى مەملەكەتتى دامىتۋ ىسىندە وتە ماڭىزدى ءرول اتقارادى. مەن كاسىپكەرلەرمەن كەزدەسكەندە بيزنەستىڭ الەۋمەتتىك جاۋاپكەرشىلىگى تۋرالى ءجيى ايتامىن. مۇنىڭ ايرىقشا ءمان- ماڭىزى بار. وتاندىق بيزنەستىڭ الەۋمەتتىك ماسەلەلەردى شەشۋگە اتسالىسقانى وتە دۇرىس. مەملەكەت بۇعان جان- جاقتى قولداۋ كورسەتەدى. ءبىز«بىر جاعادان باس، ءبىر جەڭنەن قول شىعارىپ» كۇش جۇمىلدىرساق قانا، ەلىمىزدى دامىتا الامىز. اتىراۋ وڭىرىندە ەل ومىرىنە بەلسەنە ارالاسىپ جۇرگەن مەتسەنات ازاماتتارىمىز بارشىلىق. وسى ورايدا، جەرگىلىكتى كاسىپكەرلەرگە جانە ءوڭىر تۇرعىندارىنا شىنايى ريزاشىلىعىمدى بىلدىرگىم كەلەدى»، - دەپ اتاپ ءوتتى پرەزيدەنت.
ونىڭ ايتۋىنشا، اتىراۋلىقتار ەلوردامىزدىڭ 20 جىلدىعىنا تاماشا تارتۋ جاساعانىن بۇكىل ەل بىلەدى.
ەسىلدىڭ ۇستىنە سالىنعان بەكىرە بالىعى ءتارىزدى كوپىر - استانانىڭ كوركىن اشا تۇسكەن بىرەگەي نىساننىڭ ءبىرى.
سول سياقتى تۇركىستانداعى« ۇلى دالا ەلى» ورتالىعى - اتىراۋ جۇرتىنىڭ سىيى. مۇنى مەملەكەت تە، حالقىمىز دا جوعارى باعالايدى.
ارينە، باسقا ايماقتار دا ورتاق ىسكە ءوز ۇلەسىن قوسىپ كەلەدى.
«وسىنداي جاناشىرلىق پەن ىنتىماقتىڭ ارقاسىندا ەلدىگىمىز نىعايادى. الايدا، ءبىز كەلەشەكتە ايماقتاردان وسىنداي سىيلىقتاردى تالاپ ەتپەيمىز، ءاربىر وبلىس مەيلى جاڭا بولسا دا، ءوز كۇشىمەن، ۇكىمەتتىڭ كومەگىمەن، ينۆەستورلاردىڭ قولداۋىمەن ءوز جۇمىسىن وزدەرى اتقارۋى كەرەك. جالپى، ءار وڭىردەگى ىسكەر ازاماتتار، ەڭ الدىمەن، ءوزىنىڭ تۋعان جەرىن كوركەيتۋگە اتسالىسۋى كەرەك. ءبىز قوعامدا ءوزارا جاۋاپكەرشىلىك يدەولوگياسىن، مەتسەناتتىق قىزمەتتى دارىپتەي بەرۋىمىز قاجەت. مۇنىڭ ءبارى وركەنيەتتى قوعام قۇرۋ ءۇشىن وتە ماڭىزدى. اركىم«اتىراۋعا اكەلەر مە ەم ءبىر تاۋدى» دەپ جىرلاعان تابىلدى دوسىموۆ سياقتى تۋعان جەرىن سۇيە السا، تۋعان ەلىنىڭ دامۋىنا ۇلەس قوسسا، وتانىمىز وركەندەي تۇسەرى ءسوزسىز. باتىس ايماقتارعا كەلگەندە ءاليا، مانشۇك، حيۋاز سياقتى قاھارمان قىزدارىمىز تۋرالى ايتپاۋ مۇمكىن ەمەس. حالقىمىز قاشاندا باتىرلارىن باعالاي بىلگەن. وسى ايماقتاعى اۋەجايلارىمىز قازاقتىڭ 3 باتىر قىزىنىڭ ەسىمىمەن اتالۋى - سونىڭ ايقىن كورىنىسى.«ەر ەسىمى - ەل ەسىندە» دەگەن ءسوز بار. ءبىز ۇرپاقتىڭ ساناسى سەرگەك بولسىن دەسەك، ەل ءۇشىن ەرلىك جاساعان ۇل- قىزدارىمىزدىڭ ەسىمىن ەستە ساقتاۋىمىز كەرەك. بۇل - مەن ءۇشىن مىزعىماس ۇستانىم»، - دەدى قاسىم- جومارت توقايەۆ.