اسپان استى ەلىندە كوروناۆيرۋس جۇقتىرۋشىلار سانىنىڭ كوبەيۋى قوسىمشا شەكتەۋ شارالارىنا اكەلۋى مۇمكىن، بۇل دا مۇنايعا دەگەن سۇرانىستى تومەندەتەدى، دەپ حابارلايدى قازاقپارات Oilprice-كە سىلتەمە جاساپ.
وتكەن دەمالىس كۇندەرى قىتاي ۇكىمەتىنىڭ شەنەۋنىكتەرى ۇكىمەتتىڭ كوروناۆيرۋستى ۇستاپ تۇرۋعا دەگەن كوزقاراسىن وزگەرتۋگە نيەتى جوق ەكەنىن ايتتى. بۇل مالىمدەمە اۋرۋ ورشىگەن جاعدايدا ەلدەگى اۋقىمدى كارانتين شارالارى جالعاساتىنىن بىلدىرەدى. قىتاي بيلىگىنىڭ COVID- كە قارسى قاتاڭ ستراتەگياسى الەمدەگى شيكى مۇنايعا دەگەن سۇرانىسقا دا اسەر ەتەدى دەپ كۇتىلۋدە.
سونىمەن قاتار، بەيجىڭ ءوزىنىڭ قاتاڭ كوروناۆيرۋس ستراتەگياسىن قايتا قاراۋى مۇمكىن دەگەن قاۋەسەت مۇناي باعاسىن از ۋاقىتقا بولسا دا كوتەردى. ناتيجەسىندە Brent ماركالى مۇناي وتكەن اپتادا % 2,9- عا قىمباتتاسا، WTI ماركالى مۇناي باعاسى % 5,4- عا ءوستى.
ءبىراق الەمنىڭ ەكىنشى ەكونوميكاسىنىڭ ساۋدا دەرەكتەرى كورسەتكەندەي، ازياداعى تاڭەرتەڭگى ساۋدا- ساتتىقتاعى سوڭعى جاڭارتۋلار ناتيجەسىندە شيكى مۇناي جۇما كۇنى جابىلعان باعادان شامامەن ءبىر پايىزعا تومەن ساتىلدى.
قىتاي ەكسپورتى جىلدىق ەسەپتەۋدە قازان ايىندا % 0,3- عا قىسقاردى. ال ساراپشىلار % 4,3- عا وسەدى دەپ بولجاعان ەدى.
سونىمەن قاتار، كەيبىر ساراپشىلار الەمنىڭ كەيبىر بولىكتەرىندە مۇنايعا دەگەن سۇرانىستىڭ تومەندەۋى بەلگىلەرى بايقالاتىنىن حابارلادى. مىسالى، ەۋروپا مەن امەريكا قۇراما شتاتتارىنداعى سۇرانىس 2019 -جىلدىڭ دەڭگەيىنە دەيىن تومەندەدى.
اۆتور
اياۋلىم التىنبەك