تاۋەلسىزدىك داڭعىلىنداعى كوپىر كەلەر جىلى اشىلادى - ەلوردا اكىمى

بۇل تۋرالى استانا قالاسىنىڭ اكىمى التاي كولگىنوۆ الەۋمەتتىك جەلىدەگى رەسمي پاراقشاسىندا مالىمدەدى، دەپ حابارلايدى قازاقپارات ءتىلشىسى.

«ەسىل وزەنى ارقىلى وتەتىن تاۋەلسىزدىك داڭعىلىنداعى كوپىر قۇرىلىسىنىڭ بارىسىمەن تانىستىم. بۇل كوپىر تاۋەلسىزدىك داڭعىلى، جاڭا تەمىرجول ۆوكزالى، قوشقاربايەۆ داڭعىلى، ناجىمەدەنوۆ كوشەسى، ازىرەت سۇلتان مەشىتى، بايتۇرسىنوۆ كوشەسى، قورداي، ايناكول، مومىش ۇلى داڭعىلى مەن سول جاعالاۋ اراسىنداعى قوسىمشا بايلانىستى قامتاماسىز ەتەدى. بۇل كوپىردى 2023 -جىلى اياقتاۋدى جوسپارلاپ وتىرمىز.

بۇدان باسقا، وسى جىلدىڭ تامىز ايىندا ۇلى دالا داڭعىلىنداعى جاڭا كوپىر ۇستىندەگى قوزعالىستى اشتىق. كوپىر ماڭگىلىك ەل داڭعىلىنا، ا. بايتۇرسىنوۆ، ر. قوشقاربايەۆ، ج. ناجىمەدەنوۆ كوشەلەرىنە، Nova City اۋدانىنا، «مىڭجىلدىق» اللەياسىندا كولىك اعىنىن سەيىلتۋگە، «نۇرلى جول» جاڭا ۆوكزالىنا، تەلمان جانە پرومىشلەننىي ەلدى مەكەندەرىنە، مەترو گيپەرماركەتىنە، جۇمابايەۆ داڭعىلىنا جانە جۇرگەنوۆ كوشەلەرىنە جەتۋ مۇمكىندىگىن ارتتىرادى»، - دەپ جازدى التاي كولگىنوۆ ءوزىنىڭ instagram پاراقشاسىندا.

اكىمنىڭ مالىمەتىنشە، وسى ايدا ا91 كوشەسىنەن استانا- قاراعاندى تاس جولىنا دەيىنگى ارالىقتا قوزعالىس قالپىنا كەلەدى. بۇل كوشە قاراعاندى تاس جولى، «نۇرلى جول» ۆوكزالى جانە قالانىڭ سول جاعالاۋى اراسىنداعى كولىك قاتىناسىن قامتاماسىز ەتەدى. سونىمەن قاتار، التاي كولگىنوۆ سوڭعى جىلدارى ەلوردا ماڭىنداعى ەلدى مەكەندەردە 400 دەن استام كوشە جوندەلگەنىن اتاپ ءوتتى.