اكەسى مەن قىزى اراسىنداعى قارىم-قاتىناس ونىڭ ءوزى تۋرالى جانە ونىڭ ومىرىندەگى ەر ادامنىڭ ءرولى تۋرالى ۇستانىمىن قالىپتاستىراتىن فۋندامەنت سانالادى.
اكە - قىز ومىرىندەگى العاشقى ەر ادام وبرازى
قىز بالانىڭ ءوزى جانە قاسيەتتەرى تۋرالى ويى اكەسىنىڭ وعان جاساعان قاتىناسى ارقىلى قالىپتاسادى. ءبىز ءبارىمىز الەۋمەتتىك جاراتىلىستارمىز جانە ءبىز ءوزىمىزدى قوعام ارقىلى عانا جۇزەگە اسىرامىز. ءبىز كىم ەكەنىمىزدى قورشاعان ورتانىڭ ءبىز تۋرالى ايتقان سوزدەرى ارقىلى، ءىس-ارەكەتىمىزدىڭ سالدارى ارقىلى تۇسىنەمىز. الەۋمەتتىك الەم ءبىز ءوز كورىنىسىمىزدى كورەتىن اينا ىسپەتتى. سەزىمتال، جاناشىر اكەلەردىڭ قىزدارىنىڭ بولاشاقتا ءوزىن-ءوزى باعالاۋى جوعارى جانە تۇيىق اتا-انامەن وسكەندەرگە قاراعاندا نىق بولادى. العاشقىلارى قامقورلىق جاسايتىن، قورعايتىن جانە باعالايتىن اداممەن قارىم-قاتىناس ورناتۋعا بەيىم. ەكىنشىلەرى بەيسانالى تۇردە قاتال ەركەكتەردى تاڭدايدى، ويتكەنى اكەسىنە قامقورلىق كورمەگەن قىز، ونداي ادامعا كۇدىكپەن قارايدى نەمەسە ءوزىن وندايعا لايىقسىز سانايدى.
اكە قىزىنىڭ بولاشاعى جارقىن بولۋى جولىندا نە ىستەي الادى؟
اكەسىنىڭ ماحابباتى ارقىلى وزدەرىنىڭ سۇلۋلىعى مەن نازىكتىگىن تانۋعا مۇمكىندىك العان قىزدار ەرەسەك جاستا وزدەرىنىڭ شەكارالارى تۋرالى تۇسىنىگى بار تۇلعالارعا اينالادى جانە قارىم-قاتىناستا باقىتتى بولادى. ولار سانالى تۇردە: «ءسىز ماعان بۇلاي جاساماڭىز» دەپ ايتا الادى. اكەسىمەن قارىم-قاتىناسىنىڭ ارقاسىندا قىز ەرلەرمەن قارىم-قاتىناستىڭ قالاي قۇرىلاتىنى تۋرالى تۇسىنىكتى دامىتادى جانە بولاشاقتا سول پرينتسيپكە ساي تاڭداۋ جاسايدى.
اكە قىزىنا ونىڭ سۇلۋلىعىن، سۇيكىمدىلىگىن، قايتالانباستىعىن ايتىپ، ونىڭ جەتىستىكتەرىنە ءسۇيسىنىپ، ساتسىزدىككە ۇشىراعان جاعدايدا ونى قولداپ، قورعاپ، قامقورلىق تانىتسا، بۇل قاسيەتتەر ايەلدىڭ بولمىسىندا قالىپتاسادى. قىز ءوزىنىڭ كىم ەكەنىن جانە جاقسىلىققا لايىق ەكەنىن تۇسىنەدى. بۇل قاعيدا ونىڭ دۇنيەگە كوزقاراسىندا بەكىتىلگەن. مۇنداي ايەل ەشقاشان ءومىرىن ابيۋزەر نە تيرانمەن بايلانىستىرمايدى: جان دۇنيەسىندە قالىپتاسقان اكە بەينەسى بۇعان جول بەرمەيدى.