بۇل تۋرالى اقپارات جانە قوعامدىق دامۋ ءمينيسترى دارحان قىدىرالى تۇركىستان وبلىسىنداعى ب ا ق باسشىلارىمەن كەزدەسۋىندە مالىمدەدى، دەپ حابارلايدى قازاقپارات ءتىلشىسى.
باسقوسۋدا دارحان قۋاندىق ۇلى كوپشىلىكتى بۇگىنگى كۇنى مينيسترلىك تاراپىنان اتقارىلىپ جاتقان جۇمىستارمەن تانىستىرىپ ءوتتى. سونداي- اق، جۋرناليستەردى دايىنداۋ مەن بىلىكتىلىگىن ارتتىرۋ جانە ستاتۋسىن كوتەرۋ تۇرعىسىنان جۇزەگە اساتىن جوبالار تۋرالى ايتتى.
«ماجىلىسكە ۇسىنىلۋى جوسپارلانىپ وتىرعان ماسس- مەديا تۋرالى زاڭنىڭ باسىم باعىتى بۇل جۋرناليستەردىڭ ستاتۋسىن كوتەرۋگە باعىتتالعان. بىرىنشىدەن، جۋرناليستەرگە الەۋمەتتىك جاعداي جاساۋ كوزدەلىپ وتىر. ءبىراق، بۇل جۋرناليستىڭ ءسوز بوستاندىعىن شەكتەمەيدى. جەڭىلدەتىلگەن نەسيە الۋىنا، باسپانامەن قامتىلۋىنا مۇمكىندىك بەرەدى» - دەدى ول.
سونداي- اق، مينيستر زاڭ جوباسىنا سايكەس ب ا ق وكىلدەرىنىڭ اقپاراتقا قولجەتىمدىلىگى ارتاتىندىعىن ايتىپ ءوتتى.
«جۋرناليستكە بەرىلەتىن جاۋاپتىڭ مەرزىمىن قىسقارتۋدى ۇسىنىپ جاتىرمىز. جۋرناليستتىك زەرتتەۋگە قاتىستى بولاتىن كەز كەلگەن اقپاراتقا جۋرناليست جەڭىل قول جەتكىزۋى كەرەك» - دەدى مينيستر.
كەزدەسۋدە دارحان قۋاندىق ۇلى باس رەداكتورلاردىڭ ۇسىنىستارىن تىڭداپ، اۋداندىق، قالالىق باسىلىمداردىڭ جاي- كۇيىنە قاتىستى تۋىنداعان سۇراقتارعا كەڭ كولەمدە جاۋاپ بەردى.
اۆتور
قايرات زاينيشيەۆ