بالاعا ماماندىق تاڭداۋعا قالاي كومەكتەسۋ كەرەك - مامان كەڭەسى
الميرا تۇرسىن بالانى قاي جاستان باستاپ كاسىبي تۇرعىدا ماماندىققا بەيىمدەۋ كەرەكتىگىن جانە ماماندىققا قاتىستى تاڭداۋ جاساۋ ماسەلەسى قاشان تۋىندايتىنىن ايتتى.
«كاسىپتىك باعدار بەرۋ اتا-انادان باستالادى جانە ول بالا ومىرگە كەلگەن كەزدەن باستاپ، ونىڭ دامۋىنا، مىنەز-قۇلقىنا، قابىلەتتەرىنە نازار اۋدارىپ، باقىلاۋ ارقىلى قالىپتاسادى. كاسىبي تۇرعىدا باعدار بەرمەس بۇرىن وسى نارسەلەرگە ءمان بەرۋ كەرەك. ال 4، 10-سىنىپتاردا كاسىپتىك باعدار بەرۋگە جۇگىنۋگە بولادى. ەگەر ول جۇيەلى ءارى بەلگىلى ءبىر كەزەڭ سايىن جۇرگىزىلىپ تۇرسا، بالانىڭ دامۋ ديناميكاسىن بايقاۋعا بولادى»، - دەيدى سپيكەر.
سونىمەن قاتار، ول اتا-انانىڭ ماماندىق تاڭداۋدا بالاعا ىقپالى قانداي بولۋى كەرەكتىگىن جانە وتباسىنداعى ءبىر ماماندىقتى جالعاستىرۋ ديناستياسىنا قاتىستى ويىن ايتتى.
«مۇنداي وتباسىلاردا ماماندىق تاڭداۋ دەگەن سۇراق تۋىندامايدى، سەبەبى ول باسىنان وتباسىندا تاڭدالىپ قويعان. مىسالى، دارىگەرلەر مەن پوليتسەيلەر وتباسىندا بالالار اتا-اناسىنىڭ ماماندىعىن تاڭداپ جاتادى. كەيدە كەيبىر ماماندىققا ادامنىڭ بەيىمى شىنىمەن گەنەتيكالىق جولمەن بەرىلەدى، بۇل عىلىمي دالەلدەنبەگەن، ءبىراق سونداي جايتتار بار. وعان قوسا، اعا بۋىننىڭ جيناعان تاجىريبەسى مەن ءبىلىمى بار، ول بالانىڭ كاسىبي دامۋىن جەدەلدەتەدى جانە جەتىلدىرە تۇسەدى. بۇل جەردە بالانىڭ ءوز قالاۋىن ءبىرىنشى ورىنعا قويۋ ماڭىزدى»، - دەيدى ا. تۇرسىن.
سونداي-اق، ول بالا بويىنداعى قابىلەتتى قالاي انىقتاۋعا بولاتىنىن ءتۇسىندىردى.
«بىرىنشىدەن، تەست جۇرگىزەمىن، بۇل جەكە قابىلەتتەردى انىقتاۋعا كومەكتەسەدى. تەستىلەۋ باعدارلاماسىنىڭ ءوزى ۇسىنىلاتىن ماماندىقتاردىڭ تىزىمدەرىن ۇسىنادى، كەڭەس بەرۋ كەزىندە ءبىز ناتيجەلەردى تالداپ، ماماندىقتاردى تالقىلايمىز. كەيدە مەكتەپ وقۋشىلارى ماماندىق جايلى تولىق بىلمەگەندىكتەن، ونى تاڭداي المايدى. نەمەسە بەلگىلى ءبىر ماماندىقتار تۋرالى ەشتەڭە بىلمەيدى»، - دەپ ءتۇسىندىردى مامان.
الميرا تۇرسىن بالا ەسەيە كەلە ونىڭ ماماندىق تاڭداۋدا ويى وزگەرە بەرسە، وعان تاڭدانۋدىڭ قاجەتى جوق ەكەنىن تىلگە تيەك ەتتى.
«دۇرىسى، كاسىبي باعدار بەرۋ مەكتەپتە، اسىرەسە وقۋعا تۇسكەنگە دەيىن جۇرگىزىلۋى كەرەك. سونىمەن بىرگە، ەرەسەك ومىردە دە ونىڭ تيىمدىلىگى جوعارى. ۋنيۆەرسيتەت قابىرعاسىنداعى 1-2- كۋرس كەزىندە، ستۋدەنتتەر ءوز بەيىنىن تاڭداعان ۋاقىتتا دا كاسىبي باعدار بەرۋ اسا ماڭىزدى. بۇنى مانساپتىڭ كەڭەس بەرۋ دەسە بولادى، ول كاسىبي باعدار بەرۋدىڭ ءبىر ءتۇرى»، - دەپ جالعاستىردى كوۋچ.
جاس وسپىرىمدەردىڭ ءوزى تاڭداعان ماماندىققا نەمقۇرايلى قاراۋى ءجيى كەزدەسەدى، مامان مۇنداي جاعدايدا نە ىستەۋ كەرەكتىگىنە جاۋاپ بەردى.
«قازىر بالالاردىڭ قىزىعۋشىلىقتارى مەن حوببيلەرىن، ومىرگە دەگەن قۇلشىنىستارىن باسۋعا اسەر ەتەتىن كوپتەگەن ەلەمەنت بار. ولار سول باياعى گادجەتتەر، كومپيۋتەرلىك ويىندار. بۇل جاڭداي جامان دەگەن ءسوز ەمەس، دەگەنمەن بۇل جاعدايدا ءبىر شارا قاجەت. مىسالى، كومپيۋتەرلىك ويىنداردى شامادان تىس وينايتىن، رەجيمى، ءتارتىبى جوق بالالار، وكىنىشكە وراي، وسىعان بەيىم. مۇنداي جاعدايلاردا اتا-انالاردىڭ بالالارىن، ولاردىڭ قىزىعۋشىلىقتارىن، كومپيۋتەردە قانشا ۋاقىت وتىراتىنىن، قايدا ۋاقىت وتكىزەتىنىن باقىلاۋى كەرەك»، - دەپ كەڭەس بەرەدى مامان.
الميرا تۇرسىن ماماندىق تاڭداۋدا ۇيىرمەلەردىڭ كومەگى قانشالىقتى دەگەن سۇراققا جاۋاپ بەردى.
«جاتتىقتىرۋشىلار موتيۆاتسيا بەرىپ، وعان قاجەت رەسۋرستى تابۋعا كومەكتەسەدى. ەگەر بالا قانداي دا ءبىر ۇيىرمەگە 2-3 اي بارىپ، ونى تاستاپ كەتكەن بولسا دا، ونىڭ ءبارىبىر پايداسى تيەدى. سەبەبى سول ارالىقتاعى ۋاقىتتى ول ءوزىن جەكە دامىتۋعا ارنادى»، - دەدى كوۋچ.