بۇل تۋرالى سەناتتىڭ جالپى وتىرىسىندا مەملەكەت باسشىسىنىڭ 16-ناۋرىزداعى جولداۋىن ىسكە اسىرۋ ماسەلەلەرى بويىنشا زاڭ جوباسىن ءبىرىنشى وقىلىمدا تالقىلاۋ كەزىندە دەپۋتات ءلاززات سۇلەيمەن ايتتى، دەپ حابارلايدى قازاقپارات ءتىلشىسى.
ايتا كەتەيىك، بۇگىن پالاتانىڭ وتىرسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەت باسشىسىنىڭ 2022 -جىلعى 16-ناۋرىزداعى جولداۋىن ىسكە اسىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى ەكى وقىلىمدا قارالىپ، قابىلداندى .
«قۇجات سايلاۋ جۇيەسىن جەتىلدىرۋ، زاڭ شىعارۋ پروتسەستەرىن نورماتيۆتىك قۇقىقتىق رەتتەۋدى دامىتۋ، مەملەكەتتىك بيلىك تارماقتارى اراسىنداعى تەجەۋ مەن تەپە- تەڭدىك جۇيەسىن كۇشەيتۋ، سونداي- اق سالالىق زاڭداردىڭ ەرەجەلەرىن 5 -ماۋسىمدا وتكەن رەسپۋبليكالىق رەفەرەندۋمنىڭ ناتيجەسىندەگى قازاقستان حالقى قولداۋ كورسەتكەن كونستيتۋتسيانىڭ جاڭاشىلدىقتارىمەن سايكەستەندىرۋدى كوزدەيدى. جوبا اياسىندا 15 كودەكسكە جانە 46 زاڭعا تۇزەتۋلەر ەنگىزۋ كوزدەلىپ وتىر»، - دەدى ل. سۇلەيمەن.
وسى ورايدا ول زاڭنىڭ نەگىزگى تۇزەتۋلەرىنە توقتالدى.
«بىرىنشىدەن، قازاقستان حالقىنىڭ جەرگە مەنشىك قۇقىعىن زاڭنامالىق بەكىتۋ. ەلىمىزدەگى جەر جانە ونىڭ قويناۋى، سۋ كوزدەرى، وسىمدىكتەر مەن جانۋارلار دۇنيەسى، باسقا دا تابيعي رەسۋرستار حالىق مەنشىگى دەپ تانۋ رەفەرەندۋمدا قامتىلدى. ەندى ناقتى تۇزەتۋلەردى جەر، ورمان، سۋ، جەر قويناۋى جانە جەر قويناۋىن پايدالانۋ تۋرالى كودەكستەرگە ەنگىزۋ ۇسىنىلادى»، - دەدى سەناتور.
سونىمەن قاتار، پرەزيدەنتتىڭ جەرگىلىكتى اتقارۋشى ورگاندارعا قاتىستى جەكەلەگەن وكىلەتتىكتەرىن تاراتۋ ەسكەرىلگەن.
اتالعان قۇجاتتا ساياسي پارتيالار قىزمەتىن دامىتۋدىڭ باسەكەلەستىك مۇمكىندىكتەرىن كەڭەيتۋ قامتىلعان. بۇل نورما ەلىمىزدە جاڭا ساياسي پارتيالار قۇرۋ ءۇشىن جاعدايلار جاساپ، پارتيالاردى تىركەۋ ءراسىمىن ايتارلىقتاي جەڭىلدەتەدى.
«سايلاۋ جۇيەسى وزگەرتىلەدى. سايلاۋ پروتسەسى زاماننىڭ تالاپتارىنا ساي جەتىلدىرىلەدى. سونداي- اق 2023 -جىلدان باستاپ اۋداندار مەن وبلىستىق ماڭىزى بار قالالار اكىمدەرىن سايلاۋ پيلوتتىق جوبادا، 2025 -جىلدان تولىققاندى ەنگىزۋ ۇسىنىلادى. سونىمەن قاتار، دەپۋتاتتىق مانداتتى كەرى قايتارىپ الۋ تەتىگى ەنگىزىلەدى. بۇل ءوز كەزەگىندە حالىق قالاۋلارىنىڭ ءوز سايلاۋشىلارىنىڭ سەنىمدەرىن بارىنشا اقتاۋعا، سونىڭ ىشىندە سايلاۋالدى باعدارلامارىن ورىنداۋ مەن جەرگىلىكتى ماسەلەلەردى جەدەل شەشىپ وتىرۋ باعىتىندا ءارقاشان حالىقپەن كەرى بايلانىستا بولۋىنا كەپىلدىك بەرەدى»، - دەدى ل. سۇلەيمەن.