Massaget.kz ءتىلشىسى وڭتۇستىكتەن سولتۇستىككە قونىس اۋدارۋشىلارعا قانداي كومەك كورسەتىلەتىنىن انىقتادى.
بيىل ساۋىردە پرەمەر-ءمينيستردىڭ ەكس-ورىنباسارى (قازىر اقتوبە وبلىسىنىڭ اكىمى) ەرالى توعجانوۆ قازاقستاننىڭ وڭتۇستىك وڭىرلەرىنەن سولتۇستىككە قونىس اۋدارۋشىلارعا جاڭا جوبا ازىرلەنگەنىن ايتتى. ال ەڭبەك جانە الەۋمەتتىك قورعاۋ ءمينيسترى تامارا دۇيسەنوۆانىڭ سوزىنشە، باستاپقىدا بۇل شارالار ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021-جىلدارعا ارنالعان «ەڭبەك» مەملەكەتتىك باعدارلاماسى شەڭبەرىندە كوزدەلگەن بولاتىن.
«بيىلدان باستاپ ولار «قۋاتتى وڭىرلەر - ەل دامۋىنىڭ درايۆەرى» ۇلتتىق جوباسى شەڭبەرىندە ىسكە اسىرىلىپ جاتىر. ەرىكتى تۇردە قونىس اۋدارۋ ەكى ماسەلەنى شەشۋگە مۇمكىندىك بەرەدى: ءوز وڭىرلەرىندە جۇمىسقا ورنالاسا الماعان قازاقستاندىقتاردى جۇمىسپەن قامتاماسىز ەتۋ جانە جۇمىس بەرۋشىلەردى قاجەت ەڭبەك رەسۋرستارىمەن قامتاماسىز ەتۋ»، - دەدى ەڭبەك ءمينيسترى تامارا دۇيسەنوۆا.
ەسكە سالايىق، ءوڭىرارالىق ەرىكتى قونىس اۋدارۋعا جۇمىس ىزدەپ جۇرگەن ادامدار، جۇمىسسىزدار جانە ولاردىڭ وتباسى مۇشەلەرى قاتىسادى.
«قۋاتتى وڭىرلەر - ەل دامۋىنىڭ درايۆەرى» ۇلتتىق جوباسىمەن الماتى، جامبىل، ماڭعىستاۋ، تۇركىستان، قىزىلوردا وبلىستارى، سونداي-اق، الماتى، شىمكەنت جانە نۇر-سۇلتان قالالارى قونىس اۋدارۋشىلاردىڭ شىعۋ وڭىرلەرى بولىپ ايقىندالدى.
ۇلتتىق جوبا شەڭبەرىندە ەرىكتى تۇردە قونىس اۋدارۋعا قاتىسۋشىلار ءۇشىن سۋبسيديالار تۇرىندە مىناداي مەملەكەتتىك قولداۋ شارالارى ۇسىنىلادى:
وتباسىنىڭ ءاربىر مۇشەسىنە كوشۋگە 70 ا ە ك مولشەرىندە ءبىرجولعى تولەم (2022-جىلى - 222,6 مىڭ تەڭگە)؛
تۇرعىن ءۇيدى جالعا الۋ جانە كوممۋنالدىق قىزمەتتەرگە اقى تولەۋ شىعىندارىن جابۋ ءۇشىن تولەم 1 جىل ىشىندە اي سايىن تولەنەدى. تولەم مولشەرى قالاعا قونىس اۋدارعاندار ءۇشىن ءبىر ادام ءۇشىن 20 ا ە ك - تەن (61,3 مىڭ تەڭگە)، وتباسى مۇشەلەرىنىڭ سانى بەس جانە ودان كوپ ادام بولسا 30 ا ە ك- كە (91,9 مىڭ تەڭگە) دەيىن، اۋىلدىق جەرلەرگە قونىس اۋدارعاندار ءۇشىن - ءبىر ادام ءۇشىن 15 ا ە ك- تەن (45,9 مىڭ تەڭگە) باستاپ، وتباسى مۇشەلەرىنىڭ سانى بەس جانە ودان كوپ بولسا 21 ا ە ك- كە دەيىن (64,3 مىڭ تەڭگە).
ەرىكتى قونىس اۋدارۋشىلارعا جۇمىس ورىندارى جانە جۇمىسپەن قامتۋعا جاردەمدەسۋدىڭ باسقا دا شارالارى ۇسىنىلادى.
«سەرپىن باعدارلاماسى» - حالقى تىعىز ورنالاسقان ەلىمىزدىڭ وڭتۇستىك ايماقتارىنداعى جاستاردى كادر جەتىسپەۋشىلىگى بايقالعان قازاقستاننىڭ سولتۇستىك، باتىس جانە شىعىس وڭىرلەرىندە وقىتىپ، جۇمىسقا ورنالاستىرۋ.
سونداي-اق، ءوڭىرارالىق قونىس اۋدارۋعا جاردەم كورسەتەتىن جۇمىس بەرۋشىلەرگە كومەك كورسەتىلەدى.
ءوڭىرارالىق قونىس اۋدارۋعا جاردەم كورسەتەتىن جۇمىس بەرۋشىلەرگە كەمىندە 2 جىل مەرزىمگە تۇراقتى جۇمىسقا ورنالاسقان جانە تۇرعىن ۇيمەن قامتاماسىز ەتىلگەن ءاربىر قىزمەتكەر ءۇشىن 400 ا ە ك مولشەرىندە جۇمىسقا ورنالاسۋعا ءبىرجولعى سۋبسيديا تۇرىندە مەملەكەتتىك قولداۋ شارالارى كورسەتىلەدى.
مەملەكەت جۇمىس بەرۋشىلەرگە قونىس اۋدارۋشىلار ءۇشىن اۋىلدىق جەرلەردە جاڭا تۇرعىن ءۇي سالۋعا جۇمسالعان شىعىننىڭ 50 پايىزىنا دەيىن سۋبسيديالايدى.
ايتا كەتەيىك، بۇل جوبانى ىسكە اسىرۋ ءۇشىن 2022-جىلى 7,2 ميلليارد تەڭگە قاراستىرىلعان. بۇگىندە وڭتۇستىكتەن سولتۇستىككە 8,1 مىڭ ادام قونىس اۋدارعان.