جىل سايىنعى ءداستۇرلى كامپانيا ەكى اي بويى، 15-قىركۇيەكتەن 15-قاراشاعا دەيىن وتەدى، دەپ حابارلايدى قازاقپارات.
قازىرگى ۋاقىتتا استانالىقتار العاشقى مەديتسينالىق- سانيتارلىق كومەك كورسەتەتىن 38 مەديتسينالىق ۇيىمعا تىركەلە الادى. ولاردىڭ 16 سى - مەملەكەتتىك، قالعانى - جەكەمەنشىك كلينيكالار. بارلىق ەمحانالار اۋماقتىق قاعيدات بويىنشا جۇمىس ىستەيدى جانە پاتسيەنت ەمحانانىڭ قىزمەت كورسەتۋ اۋماعىندا تۇرعان كەزدە عانا ۇيدە مەديتسينالىق كومەك كورسەتىلەدى. بۇل ۋچاسكەلىك دارىگەردىڭ نەمەسە موبيلدى بريگادانىڭ كومەگى قاجەت بولعان جاعدايدا ونىڭ جەدەل جەتۋىنە، سونداي-اق، وتباسى مۇشەلەرىنىڭ ءبىر دارىگەرگە قارالۋىنا مۇمكىندىك بەرەدى.
العاشقى مەديتسينالىق- سانيتارلىق كومەك ۇيىمىنا تىركەلگەن پاتسيەنت ۋچاسكەلىك دارىگەردىڭ قابىلداۋى، ءوزىنىڭ دەنساۋلىق جاعدايىن باقىلاۋ، امبۋلاتوريالىق ءدارى-دارمەكپەن قامتاماسىز ەتۋ، سكرينينگتىك تەكسەرۋلەر، دياگنوستيكالىق زەرتحانالىق جانە اسپاپتىق زەرتتەۋلەر سىندى مەديتسينالىق كومەكتەرگە قول جەتكىزىپ، قاجەت جاعدايدا اۋرۋحاناعا جاتقىزۋعا جولداما الادى.
«تىركەۋ ناۋقانى كەزىندە ازاماتتار ءوزى تۇراتىن اۋماق شەڭبەرىندەگى مەملەكەتتىك قانا ەمەس، جەكەمەنشىك كلينيكالارعا دا تىركەلە الادى. ول ءۇشىن ەمحانا مەديتسينالىق ساقتاندىرۋ قورىنىڭ جەتكىزۋشىلەر تىزىمىندە بولۋى ءتيىس. بيىلعى ناۋقان بارىسىندا ەمحانا اۋىستىرعان ازاماتتار ءوزى تاڭداعان ەمدەۋ مەكەمەسىنىڭ قىزمەتىن 2023 -جىلدىڭ 1-قاڭتارىنان باستاپ پايدالانا الادى. جالپى، ەمحانا اۋىستىرۋ مىندەتتى ەمەس. بۇرىنعى ەمحانا قىزمەتىنە كوڭىلى تولاتىن ازاماتتار ءارى قاراي دا سول كلينيكانىڭ قىزمەتىن پايدالانا بەرسە بولادى»، - دەيدى «الەۋمەتتىك مەديتسينالىق ساقتاندىرۋ قورى» ك ە ا ق استانا قالاسى بويىنشا فيليالىنىڭ ديرەكتورى نۇرلىبەك قابدىقاپاروۆ.
مەديتسينالىق كومەكسىز قالماۋى ءۇشىن ازاماتتار تۇرعىلىقتى جەرى بويىنشا ەمحانادا نەمەسە ەلەكتروندىق ۇكىمەت ۆەب- پورتالىنداعى جەكە دەرەكتەردە (ە س ق ارقىلى اۆتوريزاتسيالاۋ) تىركەلۋ مارتەبەسىن تەكسەرۋى قاجەت.
«تىركەلۋ ورنىندا مامان-دارىگەردى تاڭداۋ ۋچاسكەدەگى تىركەلگەن تۇرعىنداردىڭ سانىن ەسەپكە الا وتىرىپ، جۇزەگە اسىرىلادى. جالعان اقپارات بەرىلگەن جاعدايدا؛ پاتسيەنتتىڭ ناقتى تۇرۋ مەكەنى ەمحانانىڭ قىزمەت كورسەتۋ ايماعىنان تىس جەردە ورنالاسقاندىعى انىقتالعان ۋاقىتتا؛ جالپى پراكتيكا دارىگەرىنە تىركەلگەن حالىقتىڭ سانى 1700 ادامنان، ۋچاسكەلىك پەدياترعا – 0 دەن 6 جاسقا دەيىنگى 500 بالادان، 0 دەن 14 جاسقا دەيىنگى 900 بالادان اسىپ كەتكەن جاعدايدا؛ تىركەلەتىن تۇلعانىڭ زاڭدى وكىلدىگىن راستايتىن قۇجات بولماعان كەزدە ەمحاناعا تىركەۋدەن باس تارتۋى مۇمكىن. ەمحاناعا تىركەۋ نەمەسە تىركەۋدەن دالەلدى باس تارتۋ 1 جۇمىس كۇنى ىشىندە ورىندالادى» - دەپ تۇسىندىرەدى №9-قالالىق ەمحانا وكىلى مايرا سارباس قىزى رىسپايەۆا.
ەستەرىڭىزگە سالامىز، تىركەۋ ناۋقانىنا الەۋمەتتىك مەديتسينالىق ساقتاندىرۋ قورىنىڭ مالىمەتتەر بازاسىنا ەنگەن ەمدەۋ مەكەمەلەرى عانا قاتىسادى. ولاردىڭ تولىق تىزىمىمەن قوردىڭ رەسمي سايتىنىڭ «ەمحانا تاڭداۋ» بولىگى ارقىلى تانىسۋعا بولادى.