احمەت بايتۇرسىن ۇلى ءمۇسىنىنىڭ اۆتورى: ەسكەرتكىش تۇلعانىڭ كەلبەتىمەن قوسا، ىشكى جان- دۇنيەسىن دە اشۋى ءتيىس

استانا. قازاقپارات - ۇلت ۇستازى احمەت بايتۇرسىن ۇلىنىڭ بەينەسىن ەرەكشە جاساعان ءمۇسىنشىنىڭ تۋىندىسى الەۋمەتتىك جەلىدە ەلدى ءسۇيسىندىرىپ، جۇرتتىڭ ىقىلاسىنا بولەنگەنىن بايقاعان ەدىك.

سوعان وراي، قازاقپارات ءتىلشىسى الەۋمەتتىك جەلىدە قىزۋ تالقىعا ءتۇسىپ جاتقان ءمۇسىننىڭ اۆتورىمەن تىلدەسىپ، تۋىندى تۋرالى سۇراپ- ءبىلدى.

احمەت بايتۇرسىن ۇلىن اينىتپاي بەينەلەگەن ءمۇسىننىڭ اۆتورلارى - بۇركىتبايەۆ ايدوس ءسابيت ۇلى جانە تيمۋر ميراس ۇلى ەرمۇحامەتوۆ ەكەن.

«بۇل ءمۇسىندى جاساپ جاتقانىمىزعا 1 ايعا جاقىندادى. نەگىزگى جۇمىستار ءبىتتى. بۇيىرسا، الماتى قالاسىنا قويىلادى. ءمۇسىن قولادان قۇيىلادى، تۇعىرى گرانيت تاستان جاسالعان. ءمۇسىنىڭ بيىكتىگى - 3,5 مەتر، تۇعىرى - 1,5 مەتر، جالپى بيىكتىگى 5 مەتر بولادى. احمەت اتامىزدى بىلمەيتىن كىسى جوق شىعار، ۇلت ۇستازىنىڭ بەينەسىن جاساۋدا ول كىسىنىڭ مۇراعاتتارداعى سۋرەتتەرىن قارادىق، جاس كەزىندەگى، قارتايعان كەزىندەگى بەينەلەرىن ىزدەدىك. ءومىر جولى تۋرالى قايتالاپ وقىدىق»، - دەيدى ءمۇسىننىڭ اۆتورى ايدوس ءسابيت ۇلى.

10 جىدان بەرى وسى سالادا جۇمىس ىستەپ كەلە جاتقان ازاماتتار بۇعان دەيىن دە كوپتەگەن تۇلعالاردىڭ ەسكەرتكىشىن جاساۋعا اتسالىسىپتى. ءبارى دە جۇرتتىڭ كوڭىلىنەن شىققان تۋىندىلار.

«بۇعان دەيىن الماتىدا اشارشىلىق قۇرباندارىنا قويىلعان ەسكەرتكىشتىڭ بەينەسىن جاسادىق. استانا قالاسىنا قويىلعان ءابۋ ناسىر ءال- فارابي، الماتىدا نۇرتاس وڭداسىنوۆ، ءشامشى قالداياقوۆتىڭ ەسكەرتكىشتەرىن جاسادىق. جاقىندا تاراز قالاسىندا قويىلعان شەرحان مۇرتازا اتامىزدىڭ ەسكەرتكىشى دە ءبىزدىڭ تۋىندى. تۇلعالارعا ارنالعان تۋىندىنىڭ ءساتتى شىعۋى، ونىڭ سىرتقى كەلبەتى عانا ەمەس ىشكى جان- دۇنيەسىنە ۇڭىلگەندىگىمىزدەن بولار. ءبىز ءوزىمىز كىرىسىپ، جاسايتىن تۇلعانىڭ ومىرىمەن تولىق تانىسامىز، وقىپ زەرتتەيمىز، سۋرەتتەرىن، بەينە ماتەريالدارىن اقتارامىز، سول ارقىلى ەسكەرتكىشكە مىنەزىن، جان- دۇنيەسىن سىڭىرۋگە تىرسامىز»، - دەيدى ايدوس ءسابيت ۇلى.

ەستەرىڭىزگە سالا كەتەيىك، قازاقتىڭ رۋحاني كوسەمى اتانعان الاش ارداقتىسى، ۇلت ۇستازى احمەت بايتۇرسىن ۇلىنىڭ تۋعانىنا بيىل 150 جىل تولىپ وتىر.

ۇلتتىڭ ۇلى تۇلعاسىن ۇلىقتاۋعا ارنالعان مەرەكەلىك شارا جانگەلدين اۋدانىنىڭ ورتالىعى تورعايدان باستاۋ العان بولاتىن. وندا ۇلى تۇلعا ەسكەرتكىشى ورناتىلىپ، تۋعان جەرى سارىتۇبەكتە اق كەسەنە بوي كوتەرگەن ەدى.

اۆتور

ريزابەك نۇسىپبەك ۇلى