ءبىر مىڭنان استام قازاقستاندىق عالىم عىلىمنان كەتتى - كوميتەتتىڭ جاۋابى

استانا. قازاقپارات - ەلىمىزدىڭ عىلىم كوميتەتى عالىمداردىڭ كوپتەپ شەتەلگە كەتۋىنە قاتىستى رەسمي اقپارات بەردى، دەپ حابارلايدى قازاقپارات ءتىلشىسى.

ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا بىلاي سۇراق قويىلدى: «وسىدان بىرەر كۇن بۇرىن 1 مىڭنان استام عالىم عىلىمي جوبالاردان كەتتى دەگەن اقپارات تارادى. وسى قانشالىقتى راس؟ راس بولسا سەبەبى نەدە؟ سونىمەن قاتار كوپتەگەن عالىمدار شەتەلگە كەتىپ جاتىر، نەلىكتەن؟».

اتالعان ساۋالعا ق ر عىلىم جانە جوعارى ءبىلىم مينيسترلىگى عىلىم كوميتەتىنىڭ ءتوراعاسى دارحان احمەد-زاكي جاۋاپ بەردى.

«ءيا، ايتىلعان اقپارات تاراپ جاتىر. ونىڭ ءۇش سەبەبى بار دەپ ويلايمىز. ءبىرىنشى سەبەپ، باسقا سالالارعا قاراعاندا عىلىمدى قارجىلاندىرۋ تومەن بولدى. جالاقىنىڭ تومەندەۋىنە بايلانىستى. عالىمداردىڭ ورتاشا جالاقىسى 250 مىڭ تەڭگە. باسقا سالالارمەن سالىستىرساق بۇل از. ەكىنشى سەبەپ، وتاندىق عالىمدار شەتەلگە تاعىلىمدامادان وتۋگە بارىپ جاتىر. ونىڭ ىشىندە «بولاشاق» باعدارلاماسى دا بار. مەرزىمى ءارتۇرلى»، - دەدى دارحان احمەد-زاكي.

كوميتەت باسشىسى كەلتىرگەن ءۇشىنشى سەبەپ زەينەت جاسىنا كەلگەن عالىمداردىڭ سالادان كەتۋى.

«عىلىمدى دامىتۋ تۇجىرىمداماسىنا سايكەس زەينەتكە شىققان عالىمداردىڭ ورنىنا جاڭا بۋىن كەلەدى دەگەن جوسپار بار. سول ءۇشىن دە «جاس عالىم» جوباسىن قولعا الىپ جاتىرمىز»، - دەيدى ول.

ايتا كەتسەك، ەلىمىزدە سوڭعى ءۇش جىل ىشىندە عىلىم سالاسىنا بولىنەتىن قارجى كولەمى 70 پايىزعا ارتقان.

سونداي-اق، بريفينگ بارىسىندا ەندىگى ۋاقىتتا عىلىمدى قارجىلاندىرۋ تۋرالى شەشىمدى عالىمداردىڭ وزدەرى قابىلدايتىنى ايتىلدى.