باعدات مۋسين ءبىرىنشى سىنىپ وقۋشىلارىنا جالعا پلانشەت بەرۋدى ۇسىندى
«ارىپتەسىم اسحات قانات ۇلى (ق ر وقۋ-اعارتۋ ءمينيسترى - اسحات ايماعامبەتوۆ - رەد. ) ۇسىنعانداي، «اۋىر ريۋكزاكتار» مەن مەكتەپتەردەگى سيفرلاندىرۋ دەڭگەيىن ارتتىرۋ ماسەلەلەرى پلانشەت قولدانۋ ارقىلى شەشىمىن تابۋى مۇمكىن. پلانشەتتەر سيفرلىق وقۋلىق رەتىندە نەمەسە ۇيدەن ونلاين ءبىلىم الۋ قۇرالى رەتىندە قولدانۋعا وڭ اسەرىن تيگىزەدى»، - دەدى ب. مۋسين ۇكىمەت وتىرىسىندا.
ءمينيستردىڭ ايتۋىنشا، مۇنداي ءادىس ءبىرقاتار دامىعان ەلدەردە، ونىڭ ىشىندە ۇلىبريتانيا، نورۆەگيا، وڭتۇستىك كورەيا جانە تۇركيانىڭ مەكتەپتەرىندە جاقسى ناتيجەگە اكەلدى. بۇعان قوسا، وقۋشىلار ءۇشىن شىعارماشىلىق پاندەر بويىنشا ءوز كونتەنتىن جاساۋعا مۇمكىندىك بەرەدى.
«اتالعان ەلدەردە وسى شەشىم نەگىزىندە وڭىرلەر اراسىنداعى «سيفرلىق» تەڭسىزدىكتى تومەندەتۋ، وقۋشىلاردىڭ ريۋكزاكتارىن جەڭىلدەتۋ باعىتىندا ماقسات قويىلدى. ءبىزدىڭ ۇسىنىس - 2023 -جىلى 400 مىڭنان استام ءبىرىنشى سىنىپ وقۋشىلارىن سەرۆيستىك مودەل ارقىلى پلانشەتتەرمەن قامتاماسىز ەتۋ»، - دەدى ول.
ۇسىنىلىپ وتىرعان مەحانيزنىڭ ءبىرقاتار ارتىقشىلىقتارى بار.
«بىرىنشىدەن، سەرۆيستىك مودەلدى پايدالانۋ تىكەلەي ساتىپ الۋعا قاراعاندا باستاۋىش سىنىپتاردا 4 جىلعا ارنالعان كەلىسىمشارت سوماسىن ءبولۋ ارقىلى بيۋدجەتكە جۇكتەمە ازايادى. بۇل مەحانيزم حالىق پەن بيزنەس اراسىندا تەلەفوندار مەن پلانشەتتەردى ساتىپ الۋ كەزىندە بەلسەندى تاپسىرىسقا يە. ەكىنشىدەن، پلانشەتتەردى جالعا بەرۋ قىزمەتىنەن باسقا، وقۋشىلار ءۇشىن ارنايى تاريفپەن موبيلدى ينتەرنەت، پلانشەتتەردىڭ ۇزدىكسىز جۇمىسىن قامتاماسىز ەتۋ ءۇشىن سەرۆيستىك قىزمەت ساتىپ الىنادى.
ۇشىنشىدەن، رۇقسات ەتىلگەن ونلاين رەسۋرستار ءتىزىمى، ياعني «اق ينتەرنەت» قاشىقتان جاڭارتىلىپ وتىرادى. ەڭ باستىسى، شەتەلدىك وندىرىستەرگە تاۋەلدىلىكتى ازايتۋ ماقساتىندا، بۇل مەحانيزم تەك وتاندىق وندىرۋشىلەر ءۇشىن عانا قولجەتىمدى بولادى»، - دەدى باعدات مۋسين.
بۇل رەتتە وتاندىق وندەۋدى 3 كەزەڭگە ءبولۋ ۇسىنىلادى.
«ءبىرىنشى كەزەڭ - ەلىمىزدە نەگىزگى كومپونەنتتەردى قۇراستىرۋ جەلىسىن ورناتۋ جانە ودان ماماندار دايارلاۋدى قامتيدى. ەكىنشى كەزەڭدە جاڭا مامانداردى وقىتۋ ءۇشىن جوعارى وقۋ ورىندارىمەن جانە كوللەدجدەرمەن سينەرگيا قاجەت. ءۇشىنشى كەزەڭ - پلانشەتتەردى جاساۋ كەزىندە پراكتيكالىق قولدانۋعا باعىتتالعان R&D جۇمىستارىنىڭ جيىنتىعىن قامتيدى. بۇل كەزەڭدە ۋنيۆەرسيتەت تۇلەكتەرى ميكروەلەكترونيكا سالاسىندا جاڭا ونىمدەردى جاساۋعا قاتىسادى»، - دەپ ءتۇسىندىردى سيفرلىق دامۋ ءمينيسترى.
باعدات مۋسين وقۋ-اعارتۋ مينيسترلىگىمەن بىرلەسىپ، بيىلعى 15-قاراشاعا دەيىنگى پلانشەتتەرگە قويىلاتىن نەگىزگى تالاپتاردى، ونىڭ ىشىندە ينتەرنەتكە قول جەتكىزۋگە ارنالعان سەنىمدى سايتتار ءتىزىمىن بەكىتۋدى، وقۋشىلارعا پلانشەتتەردى ساتىپ الۋ مەن بەرۋدىڭ جىل سايىنعى مەحانيزمىن انىقتاۋدى ۇسىندى.
«قارجى مينيسترلىگىمەن بىرلەسىپ، بيىلعى 1-جەلتوقسانعا دەيىن سەرۆيستىك مودەل بويىنشا پلانشەتتەردى ساتىپ الۋ ماسەلەسىن پىسىقتاۋ كەرەك. ءبىزدىڭ مينيسترلىك بايلانىس وپەراتورلارىمەن بىرلەسىپ، پلانشەتتەر مەن ينتەرنەتتىڭ ۇزدىكسىز جۇمىس ىستەۋى ءۇشىن سەرۆيستىك قىزمەت كورسەتۋدى قامتاماسىز ەتسىن»، - دەدى مينيستر.