مۇقاعاليدىڭ ولەڭدەرىن جاتقا بىلەتىن تۇتاس ءبىر اۋىل بالالارى فوتوگرافتى ءتانتى ەتتى
فوتوگراف ەرنار المابەك الەۋمەتتىك جەلىدەگى پاراقشالارىندا الماتى وبلىسى رايىمبەك اۋدانى قاراساز اۋىلىندا تۇسىرىلگەن ۆيدەونى ءبولىستى.
«قاراسازدان سالەم! بۇل اۋىلدىڭ بالالارى مۇقاعالي ماقاتايەۆتىڭ ولەڭدەرىن جاتقا بىلەدى دەۋشى ەدى. راس ەكەن! تاڭدانىپ، تامسانىپ قايتتىم»، - دەيدى فوتوگراف.
ۆيدەودا فوتوگراف كوشەدە كەزدەيسوق كەزىككەن كىشكەنتاي قىزداردان «مۇقاعالي ماقاتايەۆ اتالارىڭنىڭ ولەڭدەرىن بىلەسىڭدەر مە» دەپ سۇرايدى. قىزدار ەش ويلانباستان اقىننىڭ «ەي، ءومىر»، «وتان» جانە باسقا دا ولەڭىن جاتقا ايتىپ بەرەدى.
كوشەدە كەزدەسىپ قالعان ءبىر بالا اقىننىڭ «شىدا، شىدا» اتتى ولەڭىن وقىسا، تاعى ءبىرى «تۋعان ولكەگە» اتتى ولەڭدى مۇدىرمەي، جاتقا ايتىپ بەرەدى. ودان بولەك، فوتوگراف ۆەلوسيپەدپەن كەلە جاتقان بالانى توقتاتىپ، ماقاتايەۆتىڭ ولەڭىن وقىپ بەرۋىن سۇرايدى.
بالا ەنتىگىن باسىپ، اقىننىڭ ولەڭىن جاتقا ايتىپ بەرەدى.
ەرنار المابەكتىڭ وقىرماندارى بالالاردىڭ ونەرىنە ءتانتى بولعان.
«جارايسىڭدار، بالاپاندار! كەرەمەت، ءبارى ءوز تۋعان جەرىنىڭ سۋسىنىنا قانىق بولىپ ءوسىپ كەلە جاتىر ەكەن»، «تاماشا! مۇقاعالي اقىن اتامىزعا قۇرمەت!»، «بىلدىرلاعان بالاپاندارىم-اي، جارايسىڭدار!»، «ءما، نە دەگەن كەرەمەت. جاندارىم-اۋ، ءبىر مۇدىرمەيدى عوي»، - دەيدى فوتوگرافتىڭ وقىرماندارى.