جەلتوقساننان باستاپ وزبەكستانمەن شەكاراداعى «قاپلانبەك» وتكىزۋ بەكەتى جابىلادى

استانا. قازاقپارات - جەلتوقساننان باستاپ وزبەكستانمەن شەكاراداعى «قاپلانبەك» وتكىزۋ بەكەتى جابىلادى، دەپ حابارلايدى قازاقپارات مەملەكەتتىك كىرىستەر كوميتەتىنە سىلتەمە جاساپ.

قازاقستان رەسپۋبليكاسى مەن وزبەكستان رەسپۋبليكاسىنىڭ ۇكىمەتتەرى بەكىتكەن ەكى ەل شەكاراسىنداعى وتكىزۋ پۋنكتتەرىن رەكونسترۋكسيالاۋ جانە جاڭعىرتۋ جونىندەگى جول كارتاسىنا سايكەس جانە قازاقستان رەسپۋبليكاسى قارجى مينيسترلىگى مەملەكەتتىك كىرىستەر كوميتەتى مەن وزبەكستان رەسپۋبليكاسى مەملەكەتتىك كەدەندىك باقىلاۋ كوميتەتىنىڭ كەزدەسۋى اياسىندا تاراپتار بيىلعى 1-جەلتوقساننان باستاپ «قاپلانبەك» - «زانگيوتا» وتكىزۋ بەكەتتەرىن قايتا قۇرۋ كەزەڭىندە تولىق جابۋعا ۋاعدالاسقان.

«قايتا قۇرۋ قورىتىندىسى بويىنشا 2 دەن 6 جولاققا دەيىن كەڭەيتۋ جۇرگىزىلەدى، «قاپلانبەك» وتكىزۋ پۋنكتىنىڭ وتكىزۋ قابىلەتى تاۋلىگىنە 200 دەن 1000 كولىك قۇرالىنا دەيىن ۇلعايتىلادى، شەكارادان ءوتۋ ۋاقىتى 25 مينۋتقا دەيىن قىسقارادى.

بۇدان باسقا، كولىك قۇرالدارىنىڭ توقتاۋسىز قوزعالىسى ءۇشىن تەحنيكالىق باقىلاۋدىڭ ءبىرىڭعاي وتپەلى اۆتوماتتاندىرىلعان دالىزدەرىن پايدالانۋ جولىمەن وتكىزۋ پۋنكتىندە كولىك قۇرالدارىنىڭ قوزعالىسىنىڭ بارلىق سيكلىن اۆتوماتتاندىرۋ جوسپارلانۋدا، بۇل سىبايلاس جەمقورلىق تاۋەكەلدەرىن بولدىرماۋعا مۇمكىندىك بەرەدى»، - دەپ جازدى ۆەدومستۆودان.

ءوز كەزەگىندە، مەملەكەتتىك كىرىستەر كوميتەتى ەۋرازيالىق ەكونوميكالىق وداققا مۇشە مەملەكەتتەردى جانە ءىرى تاسىمالداۋشىلاردى كولىك قۇرالدارى مەن جەكە تۇلعالاردىڭ اعىنىن شەكارانىڭ وسى ۋچاسكەسىندەگى باسقا «قازىعۇرت»، «جىبەك جولى»، «ب. قونىسبايەۆ»، «اتامەكەن»، «سىرداريا» جانە «سەليننىي» وتكىزۋ پۋنكتتەرىنە قازاقستان رەسپۋبليكاسى مەن وزبەكستان رەسپۋبليكاسى اراسىنداعى ساۋدا- ەكونوميكالىق جانە ينۆەستيتسيالىق ىنتىماقتاستىقتى دامىتۋ جونىندەگى جول كارتاسىنا سايكەس قايتا ءبولۋ جونىندە اقپاراتتاندىرۋ جۇمىستارىن جۇرگىزدى.