بۇل تۋرالى بۇگىن ەلوردالدا قازاقستان پرەمەر- ءمينيسترىنىڭ ورىنباسارى - سىرتقى ىستەر ءمينيسترى مۇحتار تىلەۋبەردى ايتتى، دەپ حابارلايدى قازاقپارات ءتىلشىسى.
مينيستر گەرمانيا ەكونوميكاسىنىڭ جەتەكشى سەكتورلارىنىڭ وكىلدەرى كىرەتىن ءىرى بيزنەس دەلەگاتسيانىڭ قازاقستانعا كەلگەنىن ايتتى. وسى ورايدا جۇرگىزىلەتىن كەلىسسوزدەر الەۋەتتى جوبالاردى جانە ءوزارا ءتيىمدى جاڭا باعىتاردى انىقتاۋعا ىقپال ەتەدى.
«قازاقستان ينۆەستيتسيا ءۇشىن تارتىمدى ەل. 2021 -جىلى ءبىز شەتەلدىك ينۆەستيتسيا اعىنىنىڭ پاندەمياعا دەيىنگى دەڭگەيىنە ورالىپ قانا قويماي، ونى 38 پايىزعا ارتتىرا الدىق. بىلتىردڭ قورىتىندىسى بويىنشا قازاقستانعا تىكەلەي شەتەلدىك ينۆەستيتسيالاردىڭ جالپى اعىنى 24 ميلليارد دوللاردى قۇرادى، بۇل 2020 -جىلمەن سالىستىرعاندا 37,7 پايىزعا جوعارى. الەمدەگى ءتورتىنشى ەكونوميكا بولىپ سانالاتىن گەرمانيا ءبىزدىڭ ەكونوميكاعا ينۆەستيتسيا سالاتىن العاشقى ون ەلدىڭ قاتارىنا ءالى كىرمەگەن. سوندىقتان قازاقستاننىڭ نەمىس ينۆەستورلارى مەن كاسىپكەرلەرىنە جۇمىس ىستەۋ ءۇشىن بارىنشا قولايلى جاعدايلار ۇسىنعانىمىزعا نازار اۋدارامىز. وسى ماقساتتا ءبىز پرەمەر- ءمينيستردىڭ ءبىرىنشى ورىنباسارى رومان سكلياردىڭ باسشىلىعىمەن نەمىس ينۆەستورلارىمەن جانە كاسىپكەرلەرىمەن ءوزارا بايلانىس ءۇشىن تەڭدەسسىز ۇكىمەتتىك جۇمىس توبىن قۇردىق»، - دەدى م. تىلەۋبەردى گەرمانيانىڭ فەدەرالدىق سىرتقى ىستەر ءمينيسترى اننالەنا بەربوكپەن كەزدەسۋدەن كەيىن.
وسى ورايدا اتالعان جۇمىس توبىنىڭ ارقاسىندا نەمىس ينۆەستورلارىنىڭ جوبالارىنا كەلىسسوزدەردىڭ باسىنان باستاپ ءوندىرىستى تولىق قۇرۋعا دەيىن قولداۋ جاسالادى.
«ءبىز ەكونوميكامىزدىڭ 700 ءىرى، ورتا جانە شاعىن اكتيۆتەرىن جەكەشەلەندىرىپ جاتىرمىز. بۇل نەمىس كاسىپكەرلەرى ءۇشىن قوسىمشا پەرسپەكتيۆالار اشادى. نەمىس ينۆەستيتسيالارى، وزىق تەحنولوگيالارى مەن نوۋ- حاۋلارى جانە قازاقستاننىڭ شيكىزاتى، بىلىكتى جۇمىسشىلارى ءارى قولايلى بيزنەس جاعدايلارى «win-win» قاعيداتى بويىنشا ىنتىماقتاستىقتى كەڭەيتۋگە سەنىمدى نەگىز جاسايدى. وسى تۇرعىدا قازاقستاندا ەكونوميكانىڭ جوعارى تەحنولوگيالىق سەكتورلارى ءۇشىن قاجەتتى شيكىزاتتى، سيرەك كەزدەسەتىن مەتالداردى باستاپقى وڭدەۋ، سونداي- اق ەكولوگيالىق تازا ەنەرگيا كوزدەرىنىڭ ءوندىرىسىن قۇرۋ سالاسىنداعى ىنتىماقتاستىق وزەكتى. مۇنىڭ قۇقىقتىق نەگىزى سوناۋ 2012 -جىلى شيكىزاتتىق، وندىرىستىك جانە تەحنولوگيالىق ارىپتەستىك تۋرالى ۇكىمەتارالىق كەلىسىمگە قول قويۋ ارقىلى جاسالعان بولاتىن»، - دەدى م. تىلەۋبەردى.
اۆتور
رۋسلان عابباسوۆ