«بۇگىنگى ۇكىمگە ءىشىنارا قاناعاتتاندىم دەۋگە بولادى، ساناۆياتسيا ەپيزودتارى بويىنشا كىناسىز دەپ تانىلدىم. ال پلاتفورما ەپيزودىنا كەلسەك، ارينە بۇل شەشىممەن كەلىسپەيمىن، مەنىڭ ەش كىنام جوق دەپ ەسەپتەيمىن. زاڭعا سايكەس، مەنىڭ بۇل ۇكىمگە شاعىمدانۋعا قۇقىعىم بار. ءبىز ونى مىندەتتى تۇردە قولدانامىز، سوندىقتان ماسەلە ءالى دە اشىق قالادى. ءبىز كۇرەسۋدى جالعاستىرامىز، ءوزىمىزدىڭ دۇرىستىعىمىزدى دالەلدەيمىز»، - دەدى ە. ءبىرتانوۆ سوت وتىرىسىنان كەيىن تىلشىلەرگە بەرگەن سۇحباتىندا.
ەكس ءمينيستردىڭ ايتۋىنشا، سيفرلىق پلاتفورما بويىنشا ەپيزودتا ايىپتاۋشى تاراپ نۇسقاسى ەش نارسەمەن دالەلدەنبەگەن جانە ەش ايعاق جوق.
«بۇل پلاتفورما - ايتارلىقتاي ءتيىمدى ءونىم، ونى پايدالانۋ كەرەك جانە ونى ەشكىم جاسىرمايدى. سوندىقتان، بىزگە دەنساۋلىق ساقتاۋ مينيسترلىگىنىڭ تالاپ ارىزى تۇسىنىكسىز. و. ابىشەۆ ەكەۋمىز نەگە 1,5 ميلليارد تەڭگە قايتارۋىمىز كەرەك؟ بۇل اقشا حورۆاتيالىق كومپانيانىڭ شوتىنا ءتۇستى. ەگەر دەنساۋلىق ساقتاۋ مينيسترلىگى ءوز مۇددەسى بۇزىلدى دەپ ساناسا، قاراجاتتى حورۆاتيالىق كومپانيادان ءوندىرىپ الۋى كەرەك دەپ ويلايمىن. حورۆاتيالىق كومپانيا دا شەتتە قالمايدى، ويتكەنى شەشىمنىڭ ءوزى داۋلى»، - دەدى ە. ءبىرتانوۆ.
ەلجان ءبىرتانوۆ قازىر ەموتسيالارعا ورىن جوقتىعىن، ادۆوكاتتارىمەن كەڭەسىپ، ءوز تاراپىنان ەش قىلمىس جاسالماعانىن دالەلدەيتىنىن ايتتى.
«بوستاندىعىمدى شەكتەۋ كەزىندە استانادا بولامىن. جۇمىس ىستەيمىن. مەديتسينالىق كومپانيادا باسقارۋشى بولىپ جۇمىس ىستەيمىن. كەلتىرىلگەن زالالدى قالاي وتەيتىنىمدى جوسپارلامادىم، ويتكەنى بۇل مۇمكىن ەمەس. وتە كوپ قاراجات. وزدەرىڭىز ەسەپتەپ كورىڭىزدەر، مەندە بيزنەس جوق، جالدانىپ جۇمىس ىستەيمىن. شەشىم ءالى كۇشىنە ەنگەن جوق. «ولتىرىلمەگەن ايۋدىڭ تەرىسىن بولۋگە» ءالى ەرتە. شاعىم تۇسىرەمىز»، - دەدى ەلجان ءبىرتانوۆ.
بۇعان دەيىن حابارلاعانىمىزداي، بۇگىن سارىارقا اۋدانىنىڭ 2№ سوتىندا بۇرىنعى دەنساۋلىق ساقتاۋ ءمينيسترى ەلجان ءبىرتانوۆ پەن ونىڭ ورىنباسارى ولجاس ابىشەۆتىڭ ىسىنە قاتىستى سوت ۇكىمى شىقتى.