«ەلجان ءبىرتانوۆقا 2 ەپيزود بويىنشا ايىپ تاعىلعان ەدى. ءبىرىنشىسى - لاۋازىمدىق وكىلەتتىكتەردى اسىرا پايدالانۋ، سانيتارلىق اۆياتسيانىڭ اۋە كەمەسىن قولدانۋ. بۇل ەپيزود بويىنشا ول اقتالدى، ويتكەنى سوت ونىڭ ارەكەتىنەن ق ر ق ك 361-بابىنىڭ 3-بولىمىندە كوزدەلگەن قىلمىستىق قۇقىق بۇزۋشىلىقتى تاپقان جوق. ەكىنشى ەپيزود - ەلجان ءبىرتانوۆ ولجاس ابىشەۆپەن بىرگە دەنساۋلىق ساقتاۋ مينيسترلىگىن سيفرلاندىرۋ بويىنشا جۇمىس ىستەمەيتىن پلاتفورمانى قابىلداپ، ورىندالعان جۇمىستار اكتىسىنە قول قويعان، ال ءىس جۇزىندە بۇل جۇمىس ورىندالماعان. ولاردىڭ زاڭسىز ارەكەتىنىڭ سالدارىنان 1,3 ميلليارد تەڭگە بيۋجەت قاراجاتى حورۆاتيالىق كومپانيانىڭ شوتىنا اۋدارىلدى، سول ارقىلى ءۇشىنشى تۇلعالاردىڭ پايداسىنا وكىلەتتىكتى اسىرا پايدالانۋ فاكتىسى دالەلدەندى. بۇل - مەملەكەت ءۇشىن ۇلكەن شىعىن»، - دەدى سۋديا.
ي. الكەنوۆتىڭ ايتۋىنشا، ولاردىڭ كىناسى قىلمىستىق ءىس ماتەريالدارى، ساراپتاما قورىتىندىلارى جانە كۋاگەرلەر تۇسىنىكتەمەلەرى ارقىلى دالەلدەندى.
«قازىرگى ۋاقىتتا پلاتفورما جۇمىس ىستەمەي تۇر. سوت قىلمىستىق ءىستىڭ وسى ەپيزودى بويىنشا سوتتالۋشىلاردى كىنالى دەپ تانۋ ءۇشىن قارالعان دالەلدەمەلەر جيىنتىعىن جەتكىلىكتى دەپ سانايدى. سوت جازا تاعايىنداۋ كەزىندە ە. ءبىرتانوۆتىڭ كامەلەتكە تولماعان 3 بالاسى، ابىشەۆتىڭ مۇگەدەكتىگى بار بالاسى بار ەكەنىن ەسكەردى. مەملەكەتكە ماتەريالدىق زالال كەلتىرگەن ءۇشىنشى تۇلعالارعا اۋدارىلعان اقشالاي قاراجاتتى سوتتالۋشىلار تىكە ۇرلاعان جوق. ءبىراق، بۇل اۋدارىم سوتتالعانداردىڭ قىلمىستىق ارەكەتى سالدارىنان جۇرگىزىلدى. جوعارىدا كورسەتىلگەن ءمان-جايلاردى ەسكەرە وتىرىپ، سوت باس بوستاندىعىن شەكتەۋ تۇرىندەگى جازا تاعايىنداۋدى ۇيعاردى»، - دەدى يبراگيم الكەنوۆ.
بۇعان دەيىن حابارلاعانىمىزداي، بۇگىن سارىارقا اۋدانىنىڭ 2№ سوتىندا بۇرىنعى دەنساۋلىق ساقتاۋ ءمينيسترى ەلجان ءبىرتانوۆ پەن ونىڭ ورىنباسارى ولجاس ابىشەۆتىڭ ىسىنە قاتىستى سوت ۇكىمى شىقتى.
ەسكە سالا كەتسەك، بۇرىنعى دەنساۋلىق ساقتاۋ ءمينيسترى ەلجان ءبىرتانوۆ 2020-جىلدىڭ 3- قاراشاسىندا بيۋجەت قاراجاتىن ىسىراپ ەتتى دەگەن كۇدىكپەن قاماۋعا الىنعان بولاتىن.
تەرگەۋ ماتەريالى بويىنشا، ەلجان ءبىرتانوۆ پەن ونىڭ ورىنباسارى ولجاس ابىشەۆكە «Ericsson Nicola Tesla» كومپانياسىنىڭ قىزمەتىن قولدانۋ كەزىندە «لاۋازىمدىق وكىلەتىن تەرىس پايدالانۋ» ارقىلى مەملەكەتكە 1,5 ميلليارد تەڭگە شىعىن كەلتىردى دەگەن ايىپ تاعىلعان.
بۇعان دەيىن پروكۋرور باۋىرجان شەكەنوۆ سوتتاعى جارىس ءسوز كەزىندە دەنساۋلىق ساقتاۋ مينيسترلىگىنىڭ بۇرىنعى باسشىسى ەلجان ءبىرتانوۆتى 6 جىلعا باس بوستاندىعىنان ايىرۋدى سۇراعان ەدى.