بۇل جاعدايدا سىزگە كەپىلگەر بولۋعا ۇسىنىس تۇسسە نە ىستەۋ كەرەك؟ كەپىلگەر كەپىل تۋرالى شارتتى قالاي بۇزىپ، مىندەتتەمەلەرىنەن قاشان باس تارتا الادى؟ كەپىلدىك مەرزىمى قاشان توقتايدى؟
Massaget.kz ءتىلشىسى بۇل سۇراقتارعا جاۋاپ ىزدەپ كوردى.
كەپىلگەردىڭ قۇقىعى قانداي؟
Fingramota.kz سايتىنىڭ مالىمەتىنشە، كەپىلگەر بورىشكەردىڭ كرەديتور الدىنداعى مىندەتتەمەنى ورىنداۋى ءۇشىن جاۋاپ بەرەدى. ەگەر بورىشكەر كرەديتوردان جالتارسا، ءوز مىندەتتەمەلەرىن ورىنداماسا، وندا بۇل جاعدايدا بانك كەپىلگەرگە جۇگىنەدى.
كەپىلگەر نەسيە بەرۋشىمەن اراداعى كەپىلدىك شارتىنىڭ تالابى ورىندالماي جاتقانىن بايقاعان بولسا، قارسىلىق بىلدىرۋگە قۇقىلى. بورىشكەر بۇل قارسىلىقپەن كەلىسپەسە دە نەمەسە ءوزىنىڭ قارىزىن مويىنداسا دا، كەپىلگەر قۇقىعى وزگەرمەيدى.
ەگەر كەپىلگەر كەپىلدىك شارتى بويىنشا ءوز مىندەتتەمەسىن ورىنداعان بولسا، وندا ول بورىشكەردەن وزىنە كەلتىرىلگەن زالالدىڭ ورنىن تولتىرۋدى تالاپ ەتۋگە قۇقىلى. بۇل نەگىزگى مىندەتتەمەنى، ياعني نەسيەنى تولەۋ دە، نەسيە بەرۋشىگە تولەنگەن سوما ءۇشىن تۇراقسىزدىق ايىبى مەن سىياقىنى تولەۋ دە، بورىشكەردىڭ جاۋاپكەرشىلىگىنە بايلانىستى باسقا دا شىعىنداردى وتەۋ بولۋى مۇمكىن.
ەگەر كەپىلگەر كرەديتور الدىنداعى مىندەتتەمەنى ورىنداعان جاعدايدا، وندا ول كرەديتوردان نەگىزسىز الىنعان تالاپ ەتۋدى ءوندىرىپ الۋعا نە بورىشكەرگە تالاپ قويۋعا قۇقىلى.
ەگەر بورىشكەر بانك الدىنداعى مىندەتتەمەسىن ورىنداسا، ول بۇل تۋرالى كەپىلگەرگە حابارلاۋعا ءتيىس.
كەپىلدىك قاشان توقتايدى؟
كەپىلگەر بانك الدىنداعى مىندەتتەمەلەر ورىندالعان جاعدايدا شارتتا كورسەتىلگەن جاۋاپكەرشىلىكتەن بوساتىلادى. كەپىلدىكتىڭ قولدانىس مەرزىمى كەپىلدىك شارتىندا كەلىسىلەدى. ەگەر كەپىلدىكتىڭ قولدانىس مەرزىمى قانداي دا ءبىر سەبەپتەرمەن شارتتا كورسەتىلمەسە جانە كرەديتور كەپىلدىكپەن قامتاماسىز ەتىلگەن مىندەتتەمەنى ورىنداۋ مەرزىمى باستالعان كۇننەن باستاپ ءبىر جىل ىشىندە كەپىلگەرگە تالاپ قويماسا، وندا كەپىلدىك توقتاتىلادى.
قازاقستان رەسپۋبليكاسى ازاماتتىق كودەكسىنىڭ 336-بابىنا سايكەس، ەگەر بەرىلگەن قارىز بويىنشا بارلىق مىندەتتەمە جابىلسا، كەپىلدىك توقتاتىلادى. سونىمەن قاتار، كەپىلگەر شارت تالاپتارى وزگەرگەن كەزدە نەسيە بويىنشا جاۋاپكەرشىلىكتى توقتاتا الادى. قارىز باسقا تۇلعاعا اۋىسقان، ياعني قارىز الۋشى وزگەرگەن جاعدايدا، كەپىلگەر وزىنە العان مىندەتتەمەلەردەن باس تارتۋعا قۇقىلى.
ەسكە سالايىق، بۇعان دەيىن نەسيە العاندا كەپىلگەر بولۋدىڭ قاۋپىن زاڭگەر لاۋرا جولشىبايەۆا ايتىپ بەرگەن ەدى.