بەلارۋستە ت م د ەلدەرىنىڭ ويىندارى وتەدى

استانا. قازاقپارات – ت م د ەلدەرىنىڭ ويىندارى 2023 -جىلى بەلارۋس رەسپۋبليكاسىندا وتەدى. بۇل تۋرالى بەلارۋس پرەمەر-ءمينيسترىنىڭ ورىنباسارى يگور پەتريشەنكو ايتتى، دەپ حابارلايدى قازاقپارات ءتىلشىسى.

«العاشقى ويىندار 2021 -جىلى قازاندا ءساتتى ءوتتى. ت م د ەلدەرىنىڭ كەلەسى ويىنى 2023 -جىلدىڭ 4-تامىزىندا باستالىپ، 14-تامىزدا اياقتالادى»، - دەدى يگور پەتريشەنكو.

وسى ورايدا ول بەلارۋس بۇل جارىستاردى ۇيىمداستىرۋعا تولىق دايىن ەكەنىن، بارلىق قاجەتتى سپورت ينفراقۇرىلىمى جاساقتالعانىن ايتتى.

«ويىنداردىڭ تۇجىرىمداماسى اياسىندا بەلارۋس وڭىرلەرىنىڭ توعىز قالاسىندا سپورتتىڭ 21 تۇرىنەن ءىس-شارالار وتكىزۋ جوسپارلانعان»، - دەدى بەلارۋس ۆيتسە-پرەمەرى.

بۇدان بۇرىن حابارلانعانداي، ەلوردادا ت م د ۇكىمەت باسشىلارىنىڭ كەڭەسى باستالدى.