ىشكى ىستەر ءمينيسترى مارات احمەتجانوۆتىڭ بۇيرىعىمەن ىشكى ىستەر ورگاندارىنىڭ بىردەن ءۇش قىزمەتكەرى «قۇقىق ءتارتىبىن قامتاماسىز ەتۋگە قوسقان ۇلەسى ءۇشىن» مەدالدارمەن ماراپاتتالدى.
ولاردىڭ ءبىرى اقمولا وبلىستىق قىلمىستىق-اتقارۋ جۇيەسى دەپارتامەنتىنىڭ قىزمەتكەرى سالتانات جاكەنوۆا. قازان ايىنىڭ ورتاسىندا كولونيادان بوساپ شىققان ەر ادام سالتانات جاكەنوۆاعا قوڭىراۋ شالىپ، وعان ءبىر قوي مەن اي سايىن ازىق-تۇلىكپەن قامتاماسىز ەتىپ وتىرۋدى ۇسىنىپ، وزىمەن بىرگە تۇراتىن ايەلدى پروباتسيالىق تەكسەرۋدەن بوساتۋدى سۇراعان.
وسىعان بايلانىستى 37 جاستاعى اقمولالىق تۇرعىن ۇستالىپ، ۇستىنەن پارا بەرۋگە قاتىستى قىلمىستىق ءىس قوزعالدى.
بۇدان بولەك، 21-قازاندا ەلورداداعى دۇكەندەردىڭ ءبىرىنىڭ ساتۋشىسى 21 جاسقا تولماعان ازاماتقا الكوگول مەن تەمەكى ساتقان. ول اكىمشىلىك جاۋاپكەرشىلىكتەن جالتارۋعا تىرىسىپ، ۋچاسكەلىك پوليتسيا ينسپەكتورى باقىتجان قۇلجانوۆتىڭ كۇرتەشەسىنىڭ قالتاسىنا 50 مىڭ تەڭگە سالعان. ءدال وسى ءسات پوليتسەيدىڭ ۆيدەوتىركەگىشىنە ءتۇسىپ قالادى. ءقازىر سوتقا دەيىنگى تەرگەۋ ءجۇرىپ جاتىر.
ال 24-قازاندا اتىراۋ- ورال اۆتوجولىندا پاترۋلدىك پوليتسيا قىزمەتكەرى ريزابەك ساپانوۆ Chevrolet Lacetti كولىگىن توقتاتادى. رۋلدە رەسەي فەدەراتسياسىنىڭ 32 جاستاعى ازاماتى وتىرعان. ونىڭ ساقتاندىرۋ پوليسى بولماعان. كولىك جۇرگىزۋشىسى ينسپەكتورعا قۇجاتتارىن ۇسىنعاندا ءوزىن اكىمشىلىك جاۋاپكەرشىلىكتەن بوساتۋ ءۇشىن سىياقى تۇرىندە 500 رۋبلدى قوسا بەرگەن.
اقشانى بەرىپ جاتقان ءسات ساپانوۆتىڭ ۆيدەوتىركەگىشىنە ءتۇسىپ قالعان. ول دەرەۋ وقيعا ورنىنا اتىراۋ قالاسى پوليتسيا باسقارماسىنىڭ جەدەل-تەرگەۋ توبىن شاقىرادى. وسى فاكتى بويىنشا پوليتسيا قىزمەتكەرلەرى قىلمىستىق كودەكستىڭ 367-بابى 1-بولىگى (پارا بەرۋ) بويىنشا سوتقا دەيىنگى تەرگەپ-تەكسەرۋ امالدارىن باستادى.