ق ر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ Air Asia Aviation Group كومپانياسى توبىنىڭ كوممەرتسيالىق ديرەكتورى كارەن چان حانىممەن كەزدەستى. اتالعان كەزدەسۋگە ازاماتتىق اۆياتسيا كوميتەتىنىڭ ءتوراعاسى تالعات لاستايەۆ، Air Asia Aviation Group كومپانياسى توبىنىڭ كىرىستەر مەن باعىتتار جونىندەگى ديرەكتورى پول كەررول مىرزا، Air Asia X اۆياكومپانياسىنىڭ اتقارۋشى ديرەكتورى بەنيامين يسمايل مىرزا قاتىستى.
كەزدەسۋ بارىسىندا ەكى تاراپ قازاقستان مەن مالايزيا اراسىنداعى تۇراقتى جولاۋشىلار تاسىمالى جانە جۇك اۋە قاتىناسى ماسەلەلەرىن تالقىلادى. Air Asia Aviation Group وكىلدەرى اۆياكومپانيانىڭ ءبىرىنشى كەزەڭدە كۋالا-لۋمپۋر (Air Asia X) مەن بانگكوكتان (Thai Air Asia X) الماتىعا ءاربىر باعىت بويىنشا اپتاسىنا 4 رەيس جيىلىكپەن جانە اپتاسىنا 3 رەيس جيىلىكپەن استاناعا ۇشاتىن رەيستەردى ىسكە قوسۋدى جوسپارلاپ وتىرعاندارىن ايتىپ جەتكىزدى.
سونداي-اق Air Asia اۋەكومپانياسى قازاقستان اۋماعىندا «ۆيرتۋالدى حاب» قۇرۋدى، سونىمەن بىرگە ستامبۋل (تۇركيا)، پاريج (فرانسيا)، فرانكفۋرت (گەرمانيا)، لوندون (ۇلى بريتانيا) قالالارىنا «اۋا ەركىندىگىنىڭ» بەسىنشى دارەجەسىمەن ۇشۋدى جوسپارلاپ وتىر. ەكى ەل اراسىنداعى رەيستەردىڭ اشىلۋى ساۋدا-ەكونوميكالىق قاتىناستاردى، تۋريزم مەن ىسكەرلىك ىنتىماقتاستىقتى ودان ءارى دامىتۋعا ىقپال ەتەدى دەپ كۇتىلۋدە.
ايتا كەتەرلىگى، Air Asia ازياداعى ەڭ ءىرى بيۋجەتتىك اۆياكومپانيا بولىپ تابىلادى. ءوز جۇمىسىن 1996-جىلى باستاعان اۆياكومپانيا بۇگىنگە دەيىن 600 ميلليوننان استام جولاۋشى تاسىمالداعان. سونىمەن قاتار كومپانيانىڭ اۋە كەمەلەرى الەمنىڭ 25 ەلىندە 400 دەن استام باعىت بويىنشا ۇشادى. اۋە كەمەلەرى پاركىندە 250 دەن استام ۇشاق بار.