ايبەك سمادياروۆ پاندەميا كەزىندە ۋحاننان ستۋدەنتتەردى قالاي الىپ شىققاندارىن ەسكە الدى
«ۋحاندا كوروناۆيرۋس وشاعى انىقتالعان كەزدە ەڭ ءبىرىنشى ءبىزدىڭ ەلدىڭ ستۋدەنتتەرىن تاسىمالداعان ۇشاعى ۇشىپ كەلدى. ءبىزدىڭ بەيجىڭدەگى ديپلوماتتاردىڭ مىقتىلىعى سونشا، ەڭ ءبىرىنشى بولىپ ءبىزدىڭ ۇشاق 3 مەملەكەتتىڭ ستۋدەنتتەرىن الىپ شىقتى.
ۋحان قالاسى جابىق، اەرودروم جابىق. وزدەرىڭىز دە كوردىڭىزدەر عوي، ءبىر ادام كىرىپ، شىعا المايدى. تانكىمەن دە تۇردى، بارىمەن تۇردى. قىتاي ازاماتتارى قاشىپ تا جاتتى، كىرىپ تە جاتتى. سونىڭ اراسىنان 200-300 ستۋدەنتتى قالاي الىپ شىعامىز دەپ كۇنى-ءتۇنى ويلاندىق. ۇشاق دايىن، اقشا بار، ستۋدەنتتەر ءبىر قوناقۇيگە جينالعان، ءبارى دايىن. ءبىراق، كىرىپ-شىعۋ قيىن. قىتاي بيلىگىنىڭ وكىلدەرىنە حابارلاسساق، ءبىر دە ءبىر نوتامىزعا، ءبىر دە ءبىر تەلەفون قوڭىراۋىنا جاۋاپ بەرمەيدى. سونىمەن قىتايدىڭ وسى جەردەگى ەلشىلىگى ارقىلى سويلەسىپ، بەيجىڭدەگى بيلىكپەن ماسەلەنى شەشتى. بىزگە از عانا ۋاقىت بەردى.
«3 ساعاتتارىڭ بار. سول ۋاقىتتىڭ ىشىندە قونىپ، ستۋدەنتتەرىڭدى الىپ شىقساڭدار، شىقتىڭدار. ۇلگەرمەسەڭدەر، قالا جابىلادى»، - دەدى. بىزگە عانا سونداي تالاپ قويىلدى. 3 ساعاتتىڭ ىشىندە كىرىپ، الىپ شىقتىق»، - دەپ ەسكە الدى س ءى م رەسمي وكىلى.
ونىڭ ايتۋىنشا، العاشىندا كوروناۆيرۋس تۋرالى مالىمەتتىڭ از بولۋى ۋحانعا بارعان ەكيپاجدىڭ ىشىندە ءبىراز ۇرەي تۋدىرعان.
«ۇشاق كەلىپ قونعاننان كەيىن ەكيپاج دالاعا شىققىسى كەلمەيدى. قورقادى، كوروناۆيرۋس جاڭادان شىعىپ جاتقاندىقتان قالاي بولاتىنىن ەشكىم بىلمەيدى. سودان ەلىمىزدىڭ سىرتقى ىستەر مينيسترلىگىنەن قىتايشا بىلەتىن ادام ىزدەدىك. ءبىر ادام شىعىپ، تىزىمدەگى ستۋدەنتتەردى تۇگەندەپ، جەرگىلىكتى بيلىك ولكىدەرىمەن قاعاز الماسىپ، «وسىنشا ستۋدەنتتى الىپ شىعىپ بارا جاتىرمىز» دەپ ۆيزالاردى دۇرىستاپ، الىپ شىعۋى كەرەك ەدى. ول ادامدى تابۋ وڭاي بولعان جوق. قىتايشا بىلەتىن ديپلوماتتاردىڭ اراسىندا ءبىراز داۋ بولدى. سولاردىڭ اراسىنان ءبىر جىگىت شىقتى. سول بارىپ، 3 ساعاتتىڭ ىشىندە 200-دەن استام ادامدى ۇشاققا الىپ كەلدى»، - دەدى ايبەك سمادياروۆ.
سىرتقى ىستەر مينيسترلىگىنىڭ وكىلىنىڭ سوزىنە قاراعاندا، پاندەميا كەزىندە ۆەدومستۆو تاراپىنا الەۋمەتتىك جەلى ارقىلى جۇگىنۋشىلەردىڭ سانى ەسەلەپ ارتقان.
«كوروناۆيرۋس كەزىندە الەۋمەتتىك جەلىدە ءبىزدىڭ مينيسترلىكتى تەگتەۋشىلەر كوپ بولدى. ساعاتىنا مىڭنان اسا تەگ شىعىپ جاتتى. «ميد، پوموگي!»، «توكايەۆ، وتپراۆ سامولەت!»، «مى تۋت ۋميراەم!» دەگەن سياقتى تەگتىڭ ءبارى ورىسشا كەتتى. ءبىز نە ىستەيمىز؟ ءبىزدىڭ مەملەكەت قانا ەمەس، بۇكىل ەل جابىلىپ قالدى. اۋەجايلار جۇمىس ىستەمەيدى. مەملەكەتتەر اراسىنداعى شەكارالار جابىق. ءومىرى جابىلمايتىن شەنگەن ەلدەرى شەكارالارىن جاۋىپ تاستادى. ونى ايتاسىز، مىنا ماسكەۋدەگى شەرەمەتيەۆو مەن ۆنۋكوۆو اۋەجايلارىنىڭ اراسىندا بايلانىس جوق. ءبىزدىڭ ەۋروپادا جۇرگەن ازاماتتار ۆنۋكوۆوعا ۇشىپ كەلەدى، قازاقستانعا شەرەمەتەۆودان ۇشۋى كەرەك. ارادا 1 ساعات ۋاقىت قانا بار. ۆنۋكوۆودان شرەمەتەۆوعا 1 ساعاتتىڭ ىشىندە ۇشىپ كەلە المايدى.
ماسەلەنى شەشۋ ءۇشىن ەلىمىزدىڭ پرەمەر-مينيسترىنە حابارلاستىق. ءبىزدىڭ پرەمەر-مينيستر رەسەي پرەمەر-مينيسترىنە تەلەفون شالىپ، ەكى اۋەجاي اراسىنا ءبىزدىڭ ازاماتتارىمىزعا جەكە كونۆوي بەرىپ، تاسىمالداۋعا رۇقسات سۇرادىق. ياعني كىشىگىرىم جۇمىس بولسا دا، جوعارى دەڭگەيدە شەشىمىن تاباتىن ماسەلەلەر بار»، - دەدى س ءى م رەسمي وكىلى.