پرەزيدەنتكە اۋىل شارۋاشىلىعى سالاسىن دامىتۋدىڭ بيىلعى 9 ايداعى نەگىزگى قورىتىندىلارى تۋرالى ەسەپ بەرىلدى. ءمينيستردىڭ ايتۋىنشا، جالپى ءونىم كولەمى 6,9 پايىزعا ارتىپ، 6,8 تريلليون تەڭگەگە جەتكەن. 21,8 ميلليون توننا ءداندى جانە بۇرشاقتى داقىلدار جينالدى. بۇل - سوڭعى 10 جىلداعى ەڭ جوعارى كورسەتكىشتەردىڭ ءبىرى. سونداي- اق ەلىمىز تۇتىنۋعا قاجەتتى اۋىل شارۋاشىلىعى ونىمدەرىنىڭ بارلىق نەگىزگى ءتۇرى بويىنشا تولىق قامتاماسىز ەتىلگەن.
قاسىم- جومارت توقايەۆقا تاپسىرمالارىنىڭ ورىندالۋ ناتيجەسى تۋرالى مالىمەت بەرىلدى. اتاپ ايتقاندا، مەملەكەتكە 5 ميلليون گەكتاردان استام جەر مەرزىمىنەن بۇرىن قايتارىلدى. بۇل جەرلەر نەگىزىنەن جايىلىم تاپشىلىعى ماسەلەلەرىن شەشۋگە بەرىلەدى. سونىمەن قاتار جۇرگىزىلگەن تەكسەرۋلەردىڭ ناتيجەسىندە جەر پايدالانۋشىلار بۇعان دەيىن بوس جاتقان 1,8 ميلليون گەكتار جەردى يگەرۋگە كىرىستى.
بۇدان بولەك، پرەزيدەنتكە ۆەتەريناريا جۇيەسىن رەفورمالاۋ ءۇشىن قابىلدانعان كەشەندى شارالار تۋرالى باياندالدى.
كەزدەسۋ سوڭىندا مەملەكەت باسشىسى اگرارلىق سەكتوردى سيفرلاندىرۋ جانە سۋبسيديالاۋ مەحانيزمىن جەتىلدىرۋ، سونداي- اق اۋىل شارۋاشىلىعى تاۋارلارىن وندىرۋشىلەردى مەملەكەتتىك قولداۋ شارالارىن كۇشەيتۋ جونىندە ءبىرقاتار مىندەت جۇكتەدى.