ۇلتتىق بانك تەڭگە دەپوزيتتەرىنە تولەنەتىن وتەماقى تۋرالى ايتتى
ۇلتتىق بانكتىڭ باسقارما ءتوراعاسى عالىمجان ءپىرماتوۆ وسى ماعىنادا تاراعان اقپاراتتارعا تۇسىنىك بەردى، دەپ حابارلايدى قازاقپارات ءتىلشىسى.
«قازىر ۇلتتىق بانكتىڭ تەڭگە دەپوزيتتەرىنە 10 پايىزدىق سىياقى تولەۋ باستاماسى بەلسەندى ناسيحاتتالىپ جاتىر. وسى وتەماقىعا ءوتىنىش تىركەتۋ ءۇشىن 1 اپتا عانا قالعانى تۋرالى اقپارات تارادى؟ قانشالىقتى شىن»، - دەپ سۇرادى ب ا ق وكىلى ۇلتتىق بانكتىڭ بريفينگىسىندە.
ۇلتتىق بانك ءتوراعاسىنىڭ سوزىنە قاراعاندا، رەسمي كوزدەردەن ونداي مالىمەت شىقپاعان.
«بىرىنشىدەن، مەن بارشاڭىزدى رەسمي كوزدەردەن تاراعان اقپاراتتى عانا نەگىزگە الۋعا شاقىرامىن. اتالعان وتەماقىنى تولەۋدىڭ ەرەجەسىن ۇكىمەت قاۋلىسى بەكىتكەن. ول ەرەجە بويىنشا، وتىنىمدەر 2023-جىلدىڭ 1- قاڭتارىنا دەيىن بەرىلۋى كەرەك. ونداي ءوتىنىشتىڭ قاجەتتىگى وسى وتەماقىنى العىسى كەلگەن ءار ازامات ءوز نيەتىن بانككە حابارلاۋ كەرەكتىگىمەن جانە ءوزى تۋرالى بەلگىلى ءبىر دەرەكتەردى اشۋعا كەلىسىم بەرۋى قاجەتتىگىمەن بايلانىستى. بانكتەردىڭ كوبى ءوز كليەنتەرىنە بۇل ءوتىنىشتى ونلاين رەجيمدە راسىمدەۋگە مۇمكىندىك بەرىپ وتىر»، - دەدى عالىمجان ءپىرماتوۆ.
ونىڭ ايتۋىنشا، وزگە بانكتەر دە اتالعان ءوتىنىشتى ونلاين قابىلداۋ جۇمىستارىن جۇرگىزۋدە.
«تاعى دا ەسكە سالامىن، بۇل وتەماقىنى ۇلتتىق ۆاليۋتامەن دەپوزيت ۇستايتىن، 2022-جىلدىڭ 23- اقپانىندا شوتتارىندا اقشا بولعان جانە ول اقشا 2023-جىلدىڭ 23- اقپانىنا دەيىن ساقتالعان ازاماتتار الادى»، - دەدى ۇلتتىق بانك باسشىسى.