ەلوردادا ات سپورتىنان اشىق بىرىنشىلىك ءوتىپ جاتىر

استانا. قازاقپارات - ەلوردادا رەسپۋبليكا كۇنى قارساڭىندا ات سپورتىنىڭ ءتۇرى - كونكۋردان اشىق بىرىنشىلىك ءوتىپ جاتىر.

وعان، باس شاھاردان بولەك، قاراعاندى جانە الماتى قالارىنان كەلگەن 50 گە جۋىق شاباندوز قاتىستى، دەپ حابارلايدى قازاقپارات ءتىلشىسى.

جارىس استانا ىرگەسىندەگى «ەتنواۋىل» ۇلتتىق-مادەني كەشەنىندە ءوتىپ جاتىر. اتالعان سايىستا شاباندوزدار بەلگىلەنگەن تارتىپپەن، كۇردەلى ءارى بيىك كەدەرگىلەردى ەڭسەرۋى كەرەك.

«سايىستىڭ العاشقى كۇنى، ياعني بىرىنشىلىكتىڭ ىرىكتەۋ كەزەڭىنە 50 گە جۋىق شاباندوز قاتىستى. وليمپيادالىق تارتىپتە شاباندوزدار ءۇش ءتۇرلى ساناتتا باق سىنايدى. ولار - «اشىق سىنىپ ساناتى»، «جاس جىلقىلار ساناتى» جانە «بالالار ساناتى» . ءبىرىنشى سانات بويىنشا جارىسقا 12 جاستان 15 جاسقا دەيىنگى بالالار، ال ەكىنشى جانە ءۇشىنشى سانات بويىنشا 16 جاستان اسقان شاباندوزدار قاتىسادى.

كونكۋر - ات سپورتىنىڭ ىشىندەگى ەڭ اسەرلىسى، قىزىعى جانە بەينەلىسى. بۇل جارىستا سپورتشى مەن جىلقىنىڭ ءارتۇرلى جاعدايدا كەزدەسكەن كەدەرگىلەردەن ارنايى باعىت بويىنشا ءجۇرىپ وتكەن جولى ەسەپكە الىنادى. تورەشىلەر جولدىڭ جىلدامدىعى مەن تازالىعىنا ءمان بەرەدى. ءاربىر قۇلاعان كەدەرگى ءۇشىن ايىپپۇل سەكۋندتارى بار»، - دەدى ات سپورتىنىڭ وليمپيادالىق تۇرلەرىنەن مەملەكەتتىك جاتتىقتىرۋشى امانجول حاسەنوۆ.

سپورتشىلاردىڭ ايتۋىنشا، كونكۋر - وليمپيادا ويىندارى مەن حالىقارالىق جارىستاردىڭ اراسىندا جانكۇيەرلەرى كوپ سايىس ءتۇرى.

«ات سپورتىمەن ءۇش جىلدان اسا اينالىسىپ كەلەمىن. قاراعاندى قالاسىنان كەلىپ تۇرمىن. بۇگىن مەن 120 س م بيىكتىكتەگى كەدەرگىلەردى ەڭسەرۋ بويىنشا جارىس جولىنا شىعامىن. قاتىسۋشىلار وتە كوپ. اراسىندا ەڭ مىقتىلارى دا بار»، - دەپ توقتالدى جارىسقا قاتىسۋشى نيكا سيم.

ايتا كەتەيىك، جارىستىڭ فينالى 25- قازان كۇنى، ياعني بۇگىن وتەدى. سايىستىڭ جالپى جۇلدە قورى - شامامەن 7 ميلليون تەڭگە.