پرەزيدەنت سايلاۋى نەلىكتەن كۇزگە بەلگىلەندى - ەرلان قوشانوۆتىڭ جاۋابى
«ءبىز بۇل سايلاۋدى ساياسي رەفورمالاردىڭ زاڭدى جالعاسى دەپ ەسەپتەۋىمىز كەرەك. ساياسي رەفورمالاردى قابىلداعاننان كەيىن، ءبىزدىڭ ينستيتۋتتار دا جاڭارۋى كەرەك. ونى قوعام دا تالاپ ەتىپ وتىر. ءوزىڭىز بىلەتىندەي، الەۋمەتتىك جەلىلەردە جۋرناليستەر مەن قوعام تاراپىنان «ءماجىلىس سايلاۋى قاشان بولادى؟»، «پرەزيدەنت سايلاۋى بولا ما؟» دەگەن سۇراقتار كوبەيدى. بۇل - زاڭدى سۇراقتار. سوندىقتان پرەزيدەنت بارلىق ەلەكتورالدى كەستەنى، الدا بولاتىن سايلاۋ ناۋقاندارىنىڭ كەستەسىن الدىن- الا جاريالادى. ياعني، بيىل پرەزيدەنت سايلاۋى، كەلەسى جىلدىڭ ءبىرىنشى جارتىسىندا ءماجىلىس سايلاۋى بولادى، ودان كەيىن ۇكىمەت تە جاڭارادى. جاڭارادى نەمەسە قايتا جاساقتالادى. بۇل - ساياسي اشىقتىقتىڭ، مادەنيەتتىڭ ۇلگىسى. پرەزيدەنت سايلاۋىنىڭ بيىل كۇزدە ءوتۋى - سول بيلىك ينستيتۋتتارىنىڭ جاڭارۋىنىڭ باسى دەپ ايتار ەدىم. حالىق قابىلداعان ساياسي رەفورمالاردىڭ ارقاسىندا، سونىڭ ىشىندە پرەزيدەنتتىڭ، پارلامەنتتىڭ قۇزىرەتىنە، ۇكىمەت پەن ساياسي پارتيالارعا قاتىستى ماسەلەلەردىڭ بارلىعى قامتىلعان. ەندى بارلىعى جاڭا جاعدايدا جۇمىس ىستەيدى. وسىلاردىڭ بارلىعى جاڭعىرىپ جاتقان كەزدە پرەزيدەنت ونى وزىنەن باستاۋ تۋرالى شەشىم قابىلدادى»، - دەدى ەرلان قوشانوۆ.
سونىمەن قاتار، سۇحبات بارىسىندا پارلامەنت ءماجىلىسىنىڭ سپيكەرى پرەزيدەنتتى 7 جىل مەرزىمگە ءبىر رەت سايلاۋ تۋرالى وزگەرىسكە قاتىستى دا پىكىر ءبىلدىردى.
«پرەزيدەنت 7 جىلدىق مەرزىمگە ءبىر مارتە عانا سايلانادى دەگەن - ول كونستيتۋتسيانىڭ 91-بابىنا ەندى. بۇل وزگەرمەيدى. ءبىزدىڭ تاۋەلسىزدىگىمىز جانە ءبىزدىڭ رەسپۋبليكامىزدىڭ بىرتۇتاستىعىمەن قاتار وسى نورما دا ەندى وعان. ول بولاشاقتا وزگەرمەيدى»، - دەپ تۇيىندەدى ق ر پارلامەنتى ءماجىلىسىنىڭ سپيكەرى.