بۇل تۋرالى سەنات ءتوراعاسى بۇگىن ءوزىنىڭ Facebook پاراقشاسىندا جازدى، دەپ حابارلايدى قازاقپارات
«بيىل ەلىمىز ءۇشىن ەرەكشە جىل. مەملەكەت باسشىسى قاسىم- جومارت كەمەل ۇلى توقايەۆتىڭ باستاماسىمەن اۋقىمدى ساياسي، الەۋمەتتىك- ەكونوميكالىق رەفورمالار جۇرگىزىلىپ جاتىر. ولاردىڭ بارلىعى ادىلەتتى قازاقستان قۇرۋ قاعيداسىنا تابان تىرەيدى. وسى رەتتە رەسپۋبليكا كۇنىن ۇلتتىق مەرەكە رەتىندە قايتا قالپىنا كەلتىرۋ دە ادىلەتتىلىك قاعيداتىنىڭ جارقىن كورىنىسى ەكەنى ءسوزسىز.
شىن مانىندە، 25-قازان ءبىز ءۇشىن تاۋەلسىزدىككە ۇمتىلىس جولىندا تاعدىرشەشتى ناتيجەگە قول جەتكىزگەن كۇن رەتىندە قىمبات. سەبەبى، مەملەكەتتىك ەگەمەندىك تۋرالى دەكلاراتسيانى قابىلداۋ ارقىلى حالقىمىز ەركىندىك جولىندا جۇيەلى ساياسي- قۇقىقتىق قادام جاسادى. سوندىقتان بۇل كۇنگە ۇلتتىق مارتەبە بەرىپ، ونى جالپىحالىقتىق مەرەكەگە اينالدىرۋدىڭ ماڭىزى زور»، - دەيدى سەنات ءتوراعاسى.
ونىڭ سوزىنشە، ەلدىك جانە ۇلتتىق مۇددەنى كوزدەيتىن وسىنداي تاريحي شەشىمدەردى، ەڭ الدىمەن، زاڭدىق تۇرعىدا شەگەندەۋ قاجەت ەكەنى بەلگىلى. وسىعان وراي پارلامەنت قازىرگى تاڭدا ءبىرقاتار ماڭىزدى زاڭدار قابىلداپ جاتىر. بۇل رەتتە سەنات دەپۋتاتتارى مەن اپپارات قىزمەتكەرلەرىنىڭ ەڭبەگىن ەرەكشە اتاپ وتكەن ءجون.
«بۇگىن رەسپۋبليكا كۇنىنە وراي سەنات قابىرعاسىندا ۇيىمداستىرىلعان مەرەكەلىك جيىندا ءبىر توپ سەناتور مەن اپپارات قىزمەتكەرىنە مەملەكەت باسشىسىنىڭ جارلىعىمەن بەكىتىلگەن مەملەكەتتىك ناگرادالاردى سالتاناتتى تۇردە تاپسىردىق. سونداي- اق الەمدىك جانە ءداستۇرلى دىندەر ليدەرلەرىنىڭ VII سەزىن ۇيىمداستىرۋعا جانە وتكىزۋگە ايرىقشا ۇلەس قوسقان بەلسەندى ازاماتتار دا مەملەكەتتىك ناگرادالارمەن ماراپاتتالدى. بارشا ماراپات يەلەرىن بۇگىنگى جەتىستىكتەرىمەن شىن جۇرەكتەن قۇتتىقتاي وتىرىپ، ولارعا زور دەنساۋلىق، جۇمىستارىنا تولايىم تابىس تىلەيمىز.
كەلە جاتقان ۇلتتىق مەرەكەمىز - رەسپۋبليكا كۇنى قۇتتى بولسىن! ەلدىگىمىز ەڭسەلى، ەگەمەندىگىمىز باياندى بولسىن! تاۋەلسىز ەلىمىز ماڭگى جاساي بەرسىن!»، - دەپ جازدى ماۋلەن اشىمبايەۆ.