Massaget.kz ءتىلشىسى مامانداردان سۇراپ ءبىلدى.
«قۇراندا ارنايى سۇرە بار»
ق م د ب شاريعات جانە ءپاتۋا ءبولىمىنىڭ مامانى مەدەت قۇرماش ۇلىنىڭ ايتۋىنشا، قۇراندا «جىن» دەگەن ارنايى سۇرە بار.
«بىرنەشە سۇرەدە جىندار جايىندا ايتىلعان. جىندار دا - ادام سەكىلدى جاراتىلىس. جالپى جىننىڭ ادامعا كىرۋى-كىرمەۋى - عالىمداردىڭ اراسىندا تارتىستى ماسەلە. عالىمداردىڭ كەيبىرى جىن ادامنىڭ ىشىنە كىرەدى دەسە، كەيبىر عالىم ىشىنە كىرمەيدى، الايدا سىرتىنان اسەر ەتەدى دەگەن. جىننىڭ ادامعا تيەتىن جولى كوپ»، - دەيدى ول.
ماماننىڭ سوزىنشە، ونىڭ ارنايى بەلگىلەرى دە جوق. ءارقيلى جانە ءارتۇرلى سەبەپتەر بولۋى مۇمكىن. مىسالى، ەسىك الدىنا كىردىڭ سۋىن توگۋ، دالادا تۇنەپ قالۋ، كۇل-قوقىستى باسۋ، مالدىڭ سۇيەگىن تەبۋ، كۇنا ىستەۋ جانە سيقىرلانۋ سياقتى سەبەپتەرمەن جىن ءتيۋى مۇمكىن.
ورىنسىز كۇلۋ نەمەسە جىلاۋ، قۇران وقىعاندا ىشتەي قارسىلىق سەزىنۋ، اقىل-وي كەمتارلىعى، بۇلشىقەت قۇرىسۋى، ۇيقىسىزدىق، لاس جەردە ءجۇرۋسىندى ارەكەتتەر جىن كىرگەن ادامنىڭ باستى بەلگىلەرى بولىپ سانالادى.
«جىننان ساقتانۋ جولدارى، پايعامبارىمىز (وعان اللانىڭ سالاۋاتى مەن سالەمى بولسىن) ۇيرەتكەن تاڭعى جانە كەشكى زىكىرلەردى، دۇعالاردى وقىپ ءجۇرۋى كەرەك. سونداي-اق، «فاتيحا»، «ىقىلاس»، «فالاق»، «ناس» سۇرەلەرى مەن اياتۋل كۋرسيدى وقىپ، وزىنە دەم سالىپ ءجۇرۋ كەرەك»، - دەيدى باسقارما وكىلى.
«عىلىمدا تەوريا ءارتۇرلى»
ال پسيحواناليز باعىتىندا جۇمىس ىستەيتىن پسيحوتەراپيەۆت كاميلا مەرگەنبايەۆانىڭ ايتۋىنشا، پسيحواناليز نەگىزىن قالاۋشىلاردىڭ جىن كىرۋ دەگەن تاقىرىپ بويىنشا تەوريالارى، تۇجىرىمدارى ءبىر-بىرىنە ساي كەلە بەرمەيدى. مىسالى، جىن كىرۋدى ءبىرى پسيحوز، پارانويا، كەيبىرى شيزوفرەنيا، ءبىرى نيەۆروز دەيدى ەكەن.
«پسيحواناليزدىڭ اتاسى زيگمۋند فرەيد جىن كىرۋ، شيزوفرەنيا جانە تاعى باسقا اۋىتقۋى بار ادامداردى پسيحواناليزبەن نەمەسە پسيحولوگيامەن ەمدەۋدىڭ مۇمكىندىگى جوق دەپ ايتقان. ەگەر بىزگە كەلگەن كليەنتتەن جىن كىرۋ سەكىلدى اۋىتقۋدى بايقاساق، مىندەتتى تۇردە پسيحياترعا جىبەرەمىز. پسيحياتردىڭ قابىلداۋىندا بولىپ، كەيىن دارىلەردىڭ جانە پسيحواناليزدىڭ كومەگىمەن وسىنداي اۋىتقۋى بار ادامداردى ءبىر قالىپتا ۇستاپ تۇرا الامىز»، - دەيدى ول.
نەگىزى مۇنداي اۋىتقۋدىڭ شىعۋ تاريحىنا كەلەر بولساق، ماماننىڭ ايتۋىنشا، پسيحواناليزدە بارلىق جاعداي بالالىق شاقتان باستالادى دەپ ايتىلادى.
«پروبلەمانىڭ ءتۇپ تامىرى سودان. مىسال كەلتىرسەم، ويدان شىعارىلعان دوس، تۇلعانىڭ ەكىگە ءبولىنۋى - بالانىڭ ءوز الەمى بولۋىنان. ول الەمدە ءوز زاڭدىلىقتارى بولادى. سونى وتباسىداعى ۇلكەندەر قابىلداماي قويعاندا، بالا ۇلكەندەردىڭ تارتىپتەرىن قابىلداماي قويعاندا باستالادى. ال قيالىنداعى دوسى بالانىڭ زاڭدىلىقتارىن قابىلدايدى، سونىمەن ويناي باستايدى. جۇرت ونى جىن دەپ ايتىپ جاتادى»، - دەيدى كاميلا مەرگەنبايەۆا.
مامان زيگمۋند فرەيدتىڭ شاكىرتى فرانسۋز پسيحواناليتيگى جاك لاكاننىڭ ءسوزىن كەلتىردى. لاكان كەز كەلگەن قالىپتى ادامنىڭ بويىندا شيزوفرەنيا دا، باسقا اۋىتقۋلار دا بولشەكتەرى بولاتىنىن ايتقان.