بۇل تۋرالى قازاقپارات ءتىلشىسىنىڭ ساۋالىنا جاۋاپ بەرگەن قورعانىس مينيسترلىگىنىڭ رەسمي وكىلى عاني ارتىقوۆ ءمالىم ەتتى.
«اسكەري قىزمەتكە بارۋدان جالتارىپ جۇرگەن جاستارعا زاڭ وسىعان دەيىن قاتال بولعان. ول بۇرىننان بار ەدى. ەگەر اسكەردەن جالتاراتىن بولسا 1 جىلدان 3 جىلعا دەيىن باس بوستاندىعىنان ايىرۋ، بولماسا 1000 ايلىق كورسەتكىشتەن 3000 ايلىق ەسەپتىك كورسەتكىشكە دەيىن ايىپپۇل سالۋ زاڭمەن قاراستىرىلعان. ءبىراق، وسى كۇنگە دەيىن بىردە-ءبىر ادام وسىنداي اۋىر جازاعا ۇشىراعان جوق، ءىرى كولەمدە ايىپپۇل سالىنبادى. جاستاردىڭ كوبى زاڭدىق تۇرعىداعى جاۋاپكەرشىلىك جايىنان بەيحابار. ارينە، ولاردى اسكەري پۋنكتەرگە شاقىرىپ، ءتۇسىندىرۋ جۇمىستارىن جۇرگىزگەننەن كەيىن اسكەرگە بارىپ جاتىر»، - دەدى عاني ارتىقوۆ.
ونىڭ ايتۋىنشا، جاستار اسكەردەن جالتارمايدى. كوبىنە جوعارى وقۋ ورىندارىن اياقتاعان سوڭ اسكەرگە شاقىرىلۋعا جاتاتاتىن ازاماتتار ەلىمىزدىڭ وزگە وڭىرلەرىنە جۇمىس ىستەۋگە كەتەدى دە، ولاردى تابۋ قيىنعا سوعادى. دەگەنمەن، مينيسترلىك وكىلى ۆەدومستۆو بۇل ماسەلەنىڭ شەشىمىن تاپقانىن ءمالىم ەتتى.
«وقۋدى اياقتاعان جاستاردىڭ قىزمەت بابىمەن جان-جاققا كەتىپ قالۋى كوپ بولىپ تۇر. بۇل ماسەلەنى شەشۋدىڭ وتە وڭتايلى جولى تابىلدى. قازىر جاستارعا بۇرىنعىداي تۇرعىلىقتى ۇيلەرىنە شاقىرۋ قاعازىن اپارىپ، ياعني قاعاز جۇزىندەگى شاقىرۋ ۇسىنىلمايدى. قازىر ولاردى sms-حابارلاندىرۋ ارقىلى شاقىرىپ جاتىرمىز. وسى ارقىلى ءبىر جاعىنان بيۋدجەتىمىزدى ۇنەمدەيتىن بولساق، ەكىنشى جاعىنان جاستارىمىزدىڭ قايدا جۇرگەنى تۋرالى انىق مالىمەت الىپ وتىرمىز»، - دەپ تۇيىندەدى قورعانىس مينيسترلىگىنىڭ رەسمي وكىلى عاني ارتىقوۆ.
ەسكە سالايىق، استانا قالاسىنىڭ قورعانىس ىستەرى جونىندەگى دەپارتامەنتىنىڭ مالىمەتىنشە، ەلوردادا 3 مىڭعا جۋىق ازامات اسكەري مىندەتىن ورىنداۋدان جالتارىپ ءجۇر.