بۇل تۋرالى ق ر ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆ ايتتى، دەپ حابارلايدى قازاقپارات ءتىلشىسى.
«قازىر ەكى نەگىزگى باعىت ايقىندالعان قازاقستان رەسپۋبليكاسىنىڭ سۋ رەسۋرستارىن باسقارۋ جۇيەسىن دامىتۋدىڭ 2023-2027-جىلدارعا ارنالعان تۇجىرىمداماسىنىڭ جوباسىن ازىرلەپ جاتىرمىز. ءبىرىنشىسى - سۋدى باسقارۋ جۇيەسىن جەتىلدىرۋ، ەكىنشىسى - تۇراقتى دامۋ ءۇشىن سۋعا دەگەن سۇرانىستى باسقارۋ»، - دەدى مينيستر ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
ونىڭ اتاپ وتۋىنشە، تۇجىرىمدامانىڭ نەگىزگى ماقساتى - ەلدىڭ سۋ رەسۋرستارىن ساقتاۋ جانە ۇتىمدى پايدالانۋ، ەكونوميكا سالالارى مەن قورشاعان ورتا قاجەتتىلىكتەرىنىڭ تەڭگەرىمىن قامتاماسىز ەتۋ پروبلەمالارىن شەشۋ.
«تۇجىرىمداماعا سونداي-اق مەملەكەت باسشىسىنىڭ بيىلعى 1 - قىركۇيەكتەگى جولداۋىنىڭ قورىتىندىسى بويىنشا ءبىز ازىرلەيتىن سۋ سالاسىن دامىتۋدىڭ ءۇش جىلدىق كەشەندى جوسپارى ەنگىزىلەتىن بولادى. ول ءبىرىنشى كەزەكتە ىسكە اسىرۋدى تالاپ ەتەتىن ءىس-شارالاردى قامتيدى. كەشەندى جوسپاردىڭ جوباسى جاقىن ارادا سۋ كەڭەسىنىڭ وتىرىسىندا قارالاتىن بولادى»، - دەدى سەرىكقالي برەكەشيەۆ.