بۇل تۋرالى پارلامەنت سەناتى ءتوراعاسىنىڭ ورىنباسارى اسقار شاكىروۆ «ارال وڭىرىندەگى قورشاعان ورتا جانە حالىقتىڭ دەنساۋلىعى» حالىقارالىق عىلىمي-پراكتيكالىق كونفەرەنسيادا ايتتى، دەپ حابارلايدى قازاقپارات پالاتانىڭ باسپا ءسوز قىزمەتىنە سىلتەمە جاساپ.
«قازاقستان مەن وزبەكستان ارال تەڭىزى باسسەينىندەگى ەكولوگيالىق جانە الەۋمەتتىك-ەكونوميكالىق داعدارىستى ەڭسەرۋدە بىرلەسكەن كۇش-جىگەر جۇمساپ كەلەدى. ەكى ەلدىڭ پرەزيدەنتتەرى ارال وڭىرىندەگى وزەكتى ماسەلەلەردى جەدەل شەشۋدى، ترانسشەكارالىق سۋ رەسۋرستارىن ۇتىمدى پايدالانۋدى جانە قورشاعان ورتانى قورعاۋدى جۇيەلى تۇردە ايتىپ وتىر. ءوتىپ جاتقان فورۋمدى ءبىز ەكى ەل، ونىڭ ىشىندە پارلامەنتتىك بايلانىستار اياسىندا جۇرگىزىلىپ جاتقان جۇمىستاردىڭ زاڭدى جالعاسى رەتىندە قاراستىرامىز»، - دەدى ا. شاكىروۆ.
كونفەرەنسياعا قاتىسقان الەۋمەتتىك-مادەني دامۋ جانە عىلىم كوميتەتىنىڭ حاتشىسى، دەپۋتات اقمارال ءالنازاروۆا دا ارال وڭىرىندەگى كليماتتىڭ اسەرىن جانە تابيعي ورتانىڭ ازىپ-توزۋىن ازايتۋ ماقساتىندا سىرداريا وزەنى مەن سولتۇستىك ارال تەڭىزىن ساقتاۋ ماسەلەلەرىن شەشۋدە جالپىعا بىردەي قابىلدانعان حالىقارالىق كونۆەنتسيالار مەن ستاندارتتارعا سايكەس تۇبەگەيلى قادامدار قاجەتتىگىن اتاپ ءوتتى.
«ەكونوميكانىڭ بارلىق سالالارىندا كليماتتىڭ وزگەرۋىنە بەيىمدەلۋ شارالارىن قابىلداۋ قاجەت، اسىرەسە اۋىل شارۋاشىلىعىندا سۋ ۇنەمدەۋ تەحنولوگياسى مەن ىلعالدى از قاجەت ەتەتىن داقىلدارعا كوشۋ قاجەت. تاياۋ جىلداردا قۇرعاپ قالعان تەڭىز ءتۇبىنىڭ جالاڭاش جەرلەرىنە ورمان ءوسىرۋ، مال شارۋاشىلىعىن دامىتۋ ءۇشىن سۋى وزدىگىنەن شىعاتىن ۇڭعىمالاردىڭ اينالاسىندا وازيس جۇيەسى جاسالۋى قاجەت. بۇۇ قامقورلىعى اياسىندا تەرەڭ زەرتتەۋلەر جۇرگىزىپ، ءتيىستى ۇسىنىمدار ازىرلەنۋى كەرەك»، - دەپ اتاپ ءوتتى سەناتور.
كونفەرەنسياعا وزبەكستان رەسپۋبليكاسى وليي ءماجىلىسى سەناتى ءتوراعاسىنىڭ ورىنباسارى سوديك سافويەۆ، د د ۇ ەۋروپالىق بيۋروسىنىڭ باسشىسى حانس كليۋگە، USAID جوباسىنىڭ جەتەكشىسى ەكاتەرينا ستريكەليەۆا قاتىسىپ، ءسوز سويلەدى.
بۇعان دەيىن حابارلاعانىمىزداي، سەناتتىڭ جالپى وتىرىسىندا دەپۋتات مۇرات باقتيار ۇلى «ەگەر شۇعىل تۇردە شارالار قابىلدانباسا، كىشى ارالدان ايىرىلىپ قالۋىمىز مۇمكىن» دەپ ماسەلە كوتەردى.