«كەربۇلاق جانە پانفيلوۆ اۋداندارى ارقىلى وتەتىن رەسپۋبليكالىق كۇرە جولدى جوندەۋ ماسەلەسى وزەكتى بولىپ تۇر. بۇل - وتە ماڭىزدى جول. سوندىقتان، ۇكىمەت پەن اكىمدىككە ونداعى كۇردەلى جوندەۋ جۇمىسىن الداعى 2 جىلدىڭ ىشىندە اياقتاۋدى تاپسىرامىن. قاجەتتى قاراجاتتى شۇعىل قاراستىرۋ كەرەك. ەڭ الدىمەن، جولدىڭ ساپاسى جاقسى بولۋى كەرەك. الايدا، قۇرىلىس تا سوزىلىپ كەتپەۋگە ءتيىس. بۇل جەرگىلىكتى جۇرتتىڭ تۇرمىسىنا جانە كولىك قوزعالىسىنىڭ قاۋىپسىزدىگىنە تىكەلەي اسەر ەتەدى. وبلىستاعى رەسپۋبليكالىق ماڭىزى بار كۇرە جولداردا بولعان جول اپاتتارىنان 9 ايدا 61 ادام قايتىس بولدى. بۇل - جان تۇرشىگەرلىك كورسەتكىش. ەلىمىزدە جول اپاتتارى، ونىڭ ىشىندە ادام ولىمىنە اكەپ سوقتىرعان وقيعالار كوبەيىپ بارادى. بۇعان ەش جول بەرۋگە بولمايدى. ادام ولىمىنە اكەپ سوقتىرعان ءاربىر جول اپاتىن توتەنشە جاعداي رەتىندە قاراستىرۋ قاجەت. ادام ءومىرى - ءبىزدىڭ باستى بايلىعىمىز. سوندىقتان، ازاماتتاردىڭ اماندىعى جانە قاۋىپسىزدىگى ءبىرىنشى ورىندا تۇرۋعا ءتيىس. جول قۇرىلىسى كەزىندەگى جەمقورلىق پەن سەلقوستىقتى تۇبىرىمەن جويۋ ءۇشىن جۇيەلى شارالار قابىلداۋ كەرەك»، - دەدى پرەزيدەنت.
ونىڭ ايتۋىنشا، سونىمەن بىرگە، كولىك جۇرگىزۋ مادەنيەتىن قالىپتاستىرۋ كەرەك.
«رولگە وتىرعان ءاربىر ادام جول ەرەجەسىن قاتاڭ ساقتاپ، بارىنشا مۇقيات بولۋى وتە ماڭىزدى. جولداعى قاۋىپسىزدىككە مەملەكەت پەن ازاماتتار بىردەي جاۋاپتى. بۇل - ورتاق مىندەت»، - دەپ اتاپ ءوتتى مەملەكەت باسشىسى.
رەداكتور
جانات قاپالبايەۆا